2
1 Askái Noemĩ wetsama ãwẽ anero Boaz, yora kakáya, mestẽpá aya iti, aaro Noemĩ venẽ Elimelequẽ wetsamásevi.
2 Shavá wetsã, Rutẽ Noemi tanamakĩ, iokaĩ ẽ askákatsavere, shateki atõ para aká ato ẽ mavẽkãi kakatsai, wetsã etxõsho maĩ ãwẽ para ikí ivo topirí ea akatsai taíse ikí. Ãwẽ askámaĩnõ Noemi ase oĩta
3 ãwẽ akátõsho Rute wai matxi kashõ mee ikívotxõsho atõ para aká topi topikõvãi kaí, wai wetsa, Boaz, Elimelequẽ wetsamanatõ tachikaĩi, ãwẽná ikĩ tanamasho.
4 Ãwẽ askánamãsho Boaz, Belémnamãsho nokói okĩ ãwẽ mee imarasĩ, ato aská akĩ, Awetima Yovepa mato oĩshotikĩ ẽ iki, ãwẽ askámaĩnõ, Awetima Yovepa mia askásevi atikĩ irawẽ, akávo.
5 Askávaíki Boaznẽ, atõ mee itĩ txirõya nĩkãki, tsoa kaní venára waa nã iinã,
6 ãwẽ nĩkãtõsho, Moabenamãsho Noeminĩ ovaiya shavotsikĩ.
7 Mee ikíyavorasĩni tovaki para aká atotxõsho ẽ topitanõ iinã ea yokái. Askái iinã, shavá nako ise ãwẽ mee ikí shovia, rama yomei iinã pãténamãsho ãwẽ tenerívi, akĩ.
8 Ãwẽ askámaĩnõ, Boaznẽ Rute tanamakĩ, oĩ, ori wai wetsanamãro topiói karoa, neno ẽ mee ima aĩvorasĩnĩse mee itso,
9 neno atonĩ nitso, ato ma ẽ tanamai, meskotsomaroa iinã, nenose atonĩsho shatetso, wakapashã vetsa iinãro, atõ weavarã ivo, chomõ tsaóa atso, akĩ.
10 Ãwẽ aská aká, aa veyó maĩ rãtipái vetseki ipásho vanaiRute, miapa yoramamẽkĩ roakatõ ea mĩ vana aka, akĩ.
11 Ãwẽ askái vana nikã iinã, Boaznẽ vana akĩ, mĩ vene vopimaĩnõ, mĩ vavãwã mĩ vesoa, mia kaká ẽ nĩkãya, mia ẽ tanai. Mĩ papanĩ mĩ ewa, mĩ anõ kania mai aká, enevarãi, oshõ, yora mĩ kãwãmarasĩnamã mĩ niá
12 askái katsése, roakakĩ, mĩ ikãkarãtõsevi akĩ, Awetima Yovepa roaka ivo mia ashõótikĩra. Awetima Yovepa awe roapa ivo mia ashõtikĩra. IsraelYové, peiyai ãwẽ nimaĩnõ chinãvaĩ kashõ anõ pãtéi ikítõ mĩ iki, akĩ vana akĩ.
13 Ãwẽ aská akátõsho, Rute vanai, vana roakatõ ea mĩ amaĩnõ, ea mekíai, roakakĩ ea mĩ take aka, mia mee ishõya yoramamẽkĩ, ikí.
14 Askái pikatsi iinã, Boaznẽ Rute kenaki, tava virí, vinhõneshõ pinosho, iinã ãwẽ aská akátõsho, ãwẽ shokõkenávo kesó tsaópakéi oí, ãwẽ askámaĩnõ, Boaznẽ, cevada tovãnáya inãtõsho pikĩ teshe akĩ.
15-16 Askávai, Rute, topiónõ iinã ãwẽ iokaĩmaĩnõ, Boaznẽ ãwẽ mee imarasĩ ato aská akĩ, ãwẽ sevi masoa naki ãwẽ topimaĩnõ oĩstsoma, ãwẽ meshkã ravé para ashõi atsoma, ave vinõ, ato akĩ.
17 Askái Rute, ãwẽ meshkã ãwẽ sairasĩ aká para ikí topi topi, yãtai. Askávaiki cevada ãwẽ kãtxia ivo, shaká vero akĩ, 20 litro tanáti nokoki.
18 Aská avarãi oshõ, ãwẽ kãtxia ivorasĩ vivarãi oí Belémnamã, ayasho ãwẽ vavãwã meramatachíki. Askáki vari matxika, pikĩ piti teshéa ãwẽ mekevarã ivo ãwẽ vavãwã inãóki.
19 Askátani ãwẽ omaĩnõ, Noemĩ Rute nĩkãki, ramaro atonamã mĩ topitana, atonamã mĩ mee itãi? Mia ãwẽ mekíma keskásevi akĩ, aa yora Yovepa, roapa ivo ashõ aótikĩ irawẽ, akĩ. Noemĩ aská akĩ nĩkãtõsho, Boaznẽ wai matxi ẽ mee itãi akĩ.
20 Aská akĩ ãwẽ yoãmaĩnõ Noemi vanai, Yovepa, Boaz roapa ivo ashõ aótikĩ irawẽ. Yovéro noke pashairí ashkãyai shokoyavo, nokẽ keyótaivo aká enesmarvi, askatá nokemẽ vesotái niárvi. Boazro nokẽ wetsama, nokemẽ noíti chinãya, noke revomaiya.
21 Ãwẽ imaĩnõ Rute vanai, Boaznẽ, mee ikí enéroa, ẽ shokõkenávonĩshoparí cevada tovaki mashteshoyoitso ea aka, ikí.
22 Ãwẽ askámaĩnõ Noemĩ vana akĩ, aase, mivé aĩvorasĩnĩ mĩ mee ikí roase, wai wetsã mĩ karo, mia atimísivo, akĩ.
23 Aská akĩ Rutẽ, Boaz mee ishõyavo, avé aĩvorasĩnĩ takékaĩsho cevada, trigo aká keyoki tovaki mashtevo. Askávai, ãwẽ vavãwã taváse noitakéti.