3
1 Shavá wetsã Noemĩ Rute aská akĩ, ẽ aĩvake nã, vene mia merashonõ, mia ave vesonõ, roai tsaókoĩnoshõ.
2 Mĩ chinãi, Boaz nã, atonĩkĩ mia mee imaya, nokẽ wetsama nã. Ãatõ anõ cevada vero akánamã yamé cevada vero akí kakatsai.
3 Neskátso, nachii, yoípakekawãi avaí Boaznẽ anõ cevada vero akánamã chinãvaĩtátso. Wená akĩ meramaroa, ave pió inõ,
4 Askávaíki ãwẽ osha verõ atso, ãwẽ raká inámaĩnõ yosíkaĩki ãwẽ rakóti vepẽnivaí ãwẽ taekirí rakákawãtso. Mia awesakĩ vana akatsíki nĩkãnoshõ, akĩ.
5 Ãwẽ askámaĩnõ, aase, ea mĩ yosĩatõ ẽ akatsaivere, ikí.
6 Askávai, anõ cevada vero akánamã kashõ, ãwẽ vavãwane aská atãtso akĩ, ãwẽ yonoatõse ikí.
7 Askávai Boaz, pivaí, cevada masoa kesó mekípákai oshai rakái. Ãwẽ askámaĩnõ Rute yosíchtasho ikãkaĩki, ãwẽ rakóti vepẽnivaí, taekirí rakákawãi.
8 Ãwẽ askámaĩnõ, yamé potxĩni, Boaznẽ vesokaĩki ãwẽ oĩa, aĩvo ãwẽ taekiri raká mera iinã mechpakẽwãi, ratei tsaó inái.
9 Askávai vanai, yei! Mia tsoa nokerá, ãwẽ imaĩnõ ea Rute, mia mee ishõya ivo nã. Mĩ matsi õpo ea matxi poẽtso, miaro nokẽ wetsama roaka ivo, noke revomaiya, akĩ
10 Ãwẽ imaĩnõ Boaznẽ revíki, aĩvaké, neská nikãtso, Awetima Yovepa roakarasĩ mia ashõtikĩ ẽ iki. Tekísma ivo chinãne ikĩ tsaóki ato mĩ oĩmai, mĩ venẽ papã wetsamavorasĩ. Vevo mĩ ivai, tavákepátõ mĩ ióai, yora niá wetsa ivomẽ kẽeti yomẽi mĩ askáikĩ.
11 Aase, ramaro rakéroa, katsése mia ẽ kashmashõkatsa, shavo chinã koĩyai mĩ tsaómaĩnõ, yora ashkãsho mia tanaivo.
12 Anõse, earo mato revomaiya, askámẽkĩ yora wetsa ẽ wetsama eakaipásevi nióa, Elimelequẽnĩsho ẽ wetsama orakama aya.
13 Askámẽkĩ nenose osha, shaváma awesáraki nõ oĩkõnõ, ãatõ mia awesakatsíki nõ oĩnõ, vesokatsi iinãro mia ave vesonõ. Vesomasenõ awẽ ikí ivoro Awetima Yovékirí chinãsho eã mia vesokatsa. Aase ramaro osha, ave shavá inõ.
14 Ãwẽ akátõsho Rute anose ãwẽ taekiri rakásho oshai, askávai vakíchnõse nipái, yorã tanamísi iinã. Boaz askásevi aói, aĩvo anõ cevada vero akánamã iwãi ikĩ tanamísivo iinã.
15 Askávai Rute vesokaĩmaĩnõ, Boaznẽ kenavaiki, aa õpo anõ mĩ marákmea ivo vivarã, avaikĩ, atxitso, akĩ. Ãwẽ aská akátõsho ãwẽ atximaĩnõ, 6 lata tanáti cevada rakonivaíki Rute iyámakĩ. Askámaĩnõ Rute arimẽse iókaĩi.
16 Askái Rute shovõ nokókaĩmaĩnõ ãwẽ vavãwãne nĩkãki, mia awesarái mĩ oĩ nã, ãwẽ akátõsho Rutẽ Boaznẽ vana, ãwẽ ashõarasĩ aká katseki yoãshokĩ.
17 Askávaíki cevada 6 lata tanáti ea mesposhoa, yamakasho mĩ vavãwã meramái karoa, iinã Boaznẽ ea aská aka, akĩ.
18 Askái iinã Noemĩ Rute vana akĩ, aase, ramaro awesáraki manátso, mia awesákatsíki oĩnoshõ, ãwẽ chinã mekimase enétĩpá, ramase taíse mia chinãkatsa, akĩ.