4
1 Askávai txipo Boaz yora meskóanamã kaí, Belém kenéya kepoti sawéa orakama tsaói kaí, ano tsaósho ãwẽ oĩa, Elimelequẽ wetsama, Boaznẽ Rute yoãshovai ivo tachikarãmaĩnõ, Boaznẽ kenaki, naaro nĩkãrí neno tsaópakéri akĩ. Ãwẽ aská akátõsho tsaópakéi kaí.
2 Askái ãwẽ tsaópakéi kamaĩnõ, Boaznẽ, Belémnamã shokoyavo, 10 yora vevokerasĩ ato kenasho, neno kãtxípakéna, iinã, ato kãtxipakésho,
3 Boaznẽ ãwẽ wetsama avé ãwẽ vanakatsikí ivo, atõ nĩkãne yoãshokĩ, Noemi, Moabe mainamã rakásho ovaiya, ãatõ nokẽ wetsamatõ mai, Elimelequẽ viyãtá ivo, yora inãkatsiki.
4 Aská iinã mivé ẽ vanakatsikí. Aa mai, mĩ vikatsikíro, ramase vitso, naa kãtxíavo nokẽ vevokerasĩni oĩníse. Askámaĩnõ, mĩ vikatsikímaro yoãtso, rayá ẽ tananõ. Yorã viátĩpá, miãparí mĩ chinãtirívi, txiporo aská, eã ẽ ati chinãki, akĩ. Ãwẽ aská akátõsho revíki, ẽe, ẽ vikatsai, akĩ.
5 Ãwẽ askámaĩnõ, Boaznẽ aská aóki, Noemĩ mai mĩ vikatsikíro, Moabe shavo, mekẽya, Rute, nokẽ tanátikirí chinãsho, ninivarãsho oĩtso. Askái ãwẽ revoatõ Malomnẽ mekẽya mai ave viakenõvo.
6 Ãwẽ aská akátõsho vanai, askáro, mai ea viátĩpávere, ẽnásemẽkĩ ẽ merávõ ivokéimamísivo. Miãse virí, eãro ea aská akátĩpá, iinã Boaz tanamakĩ.
7-8 Askái vanavaikíse, ãwẽ taríti kochavaíki Boaz inãki. (Atiã Israelrasĩni tanátiro aská, yorã awe atõ ivõkéa, awe atõ katónanã aká, atõ taríti kochavaíki, yora inãmtsãwãvo Israelrasĩro, askái meki ikinanãpaovo).
9 Aská iinã Boaznẽ vevokerasĩ ato aská akĩ, ramaro mã nĩkãivere, Elimeleque, Quiliom, Malom aatísho viyãtá ivo mai, Noemi ẽ viãkãivere ato akĩ.
10 Askávaíki Rute, Moabe shavo Malomnẽ mekẽya tsaõkoĩ ẽ akatsai, askásho, ato ivovo, atõ anõ pakéa ivo shavá, Belém, aa ivo mai aká makimísi. Askái ãwẽ revoatõ Malomnẽ mekẽya mai avé viakenõvo. Ramaro matõ mã nĩkãivere, ato akĩ, yora vevokerasĩ ato tanamakĩ.
11 Ato ãwẽ aská akátõsho vanai, mã, aase, nõ nĩkãi, Yovepa aa ivo shavõ mia onis aká, mia tavá ma tsaókoĩai taíse, Jacopa Raquelnĩ Liamẽsho, Israel yorarasĩ ato revomatitõ ave iónõ. Askái, Belém, Efrátanamã yorã mia kaka ivo, yora kakatáiya ninosho!
12 Awetima Yovepa aa ivo shavomẽsho, vakerasĩ mia merashoa, Judapa, Tamarmẽsho vake merati, Perez ititõ ave inõvo! iinã Boaz tanamávo.
13 Atõ askámaĩnõ, Boaznẽ Rute ninivarãki. Askái Rutenĩ ãwẽ tasánanãa, too inái, Awetima Yovepa venevake merashokĩ.
14 Askái iinã, avé aĩvorasĩni Noemi aská akávo, yorarasĩni Awetima Yové ave ravinõvo. Awetima Yovepa rama vesokatsaya mia merashoa! Naa vake Israel kakáya ave shovinõ.
15 Nãatõ mia rona petxĩmakĩ, mia vesokatsa, askásho mĩ vavãwãne, vake mia merashoa, minõ noikasho. Aská iinã, Rute, westíchtamẽkĩ roaka, vake ãtsa oĩatĩ ikĩ mĩ oĩai, akávo.
16 Askái iinã Noemĩ aa ivo vake vesoki.
17 Aská iinã, avé aĩvorasĩ mekívo, Noemĩ, venevakechta merai iinã, aneshokĩro, Obed akávo. Opediro Jessepa papa, Jesséro, Davipa papa aká.
18 Naa yoãro Davipa shenirasĩ, Peresmẽsho revoa ivo yoã. Peresro Esrom meraya.
19 Esromro Rão meraya. Rãoro Aminadabe meraya.
20 Aminadabero Naassom meraya. Naassomro Salmom meraya.
21 Salmomro Boaz meraya. Boazro Obed meraya.
22 Opedro Jessé meraya. Jesséro Davi meraya aká.