11
Haali Yéesú Yerusalem
(Saame Maccëe 21.1-11 ; Lúkkë 19.28-40 ; Saŋ 12.12-19)
1 Tílúu Yéesú a taalibe ya níi wa leɓuute Yerusalem, yeeddaꞌ ki Betfase a Betani, hëbís daŋi Ëlíiffë rë, Yéesú wolte ow ana waa na
2 won wa tih : « Pëyí gina fíi bín, ɗon haale na rek, ɗon ay naa ɗeef cúmbúr mbaam poku, bi ow yëegírëy rí. Lah pëkísí rí, ɗon kom soꞌ ri.
3 Ow meel ron yee tah ɗon na pëkísú rí rëe, lah wëní rí biti Yíkëe daa sohlaꞌ ri, te ɗi woc na raa, ɗi ay rii yíppí nimiliɗ. »
4 Taalibe ya koluu daaha suute. Lahuu wa ra, wa ɗeefute cúmbúr pokute íl faam di ɓúk waala ; wa pëkísúté rí.
5 I ow di ɓëewë húmú daaha ra wonu wa tih : « Ɗon pagu yi ɓal ? Yi tah ɗon na pëkísú cúmbúrë ? »
6 Taalibe ya wonute wa yee nah wa Yéesú rë ; ɗaaha, ɓëewë yeɗɗute wa suute.
7 Wa komute Yéesú cúmbúrë, larute sabidoorri wa sun, Yéesú yaagohte.
8 I ow caak anutee ɓeɓ sabidoorri wa larute waala, ƴee haalu luufa saamute i yaꞌ kilik hilsiɗ, larute waala ɓal.
9 Ɓëewë ɓéeɓ, dalaꞌte ƴee paaꞌuu Yéesú fí a ƴee paaꞌuu ri filoon ra ɓéyrúté unni wa sun na njooɓu ri wonu tih :
« Oosaanaa ! Koo laha ndam !
Koo-Yíkëe barkela ɓëeꞌ ɗi wol ri ra !
10 Koo barkela Nguur ka na ac ɗa !
Koo barkela Nguur ki ciffi yen Dawit !
Oosaanaa ! Koo laha ndam di sunaa-sun ! »
11 Yéesú lahte Yerusalem, haalte Faam fi gaani Koope, kénsëhté filiɓ ɓéeɓ. Bi elkuu wa, ɓani taalibe yi sabboo a ana ya koluute suute Betani.
Cuñi eena lahay koy ra
(Saame Maccëe 21.18-19)
12 Na ɗúhú wë Betani kéy fín rë, yaaɓ hampe Yéesú.
13 Ɗi séenté tal eeni kíffé, ɗi ɗalte kénsëhí nda ri lahte koy raa ; ndaa lahaꞌ ri na ra, gét nëe saaf, ɗi olay na koy, ɗeef wahtu ɓeen een lahay doom.
14 Yéesú won eena tígí daaha tih : « Ow ɗamaayti ñamil koyyu faw ! » Taalibe ya keluute yee won ɗi ra.
Lígí yaayoh ya Faam fi gaani Koope
(Saame Maccëe 21.12-17 ; Lúkkë 19.45-48 ; Saŋ 2.13-22)
15 Lahuu wa Yerusalem Yéesú haalte baylii Faam fi gaani Koope ra, ɗi yampe na lík yaayoh ya a lomoh ya homu na ra, júlkëñcé taabulli ɓëewë në lofrantuu hélíis rë a ñaanni yaayoh yi bëdú yë.
16 Ɗi kaddaꞌte ow kúɗ yii tappe iñƴaaha daaha, di Faam fi gaani Koope.
17 Ɗi na yëedíɗ wë won tih : « Koo wonay Téerëe bitih : “Faam soꞌ ay wonuu faam fa na ɗaguu soꞌ heetta ɓéeɓ rë” ë ? Ndaa ɗon yíssúté rí “faam lohoh” ! »
18 Keluu kélfë yí seeƴoh yi Faam fi gaani Koope a yëeddëh yí kootii Mëyíis iñƴaaha ra, wa na saamu ɗee nay wa rii hawee húl rë ; ndaa wa kaañuy ri af biti dúukëlí ɓëewë éemúté iña na yëeddëꞌ rí rë.
19 Fíníin fín, Yéesú a taalibe yi ɗúhúté gina.
Tal eena cuju ra
(Saame Maccëe 21.20-22)
20 Na suu wa kéy ɓaaɓ fin cúɓ rë, wa olute biti tal eena súhté níi lahte keeña.
21 Peer nérsëhté yee húmú lah ra, ɗi won Yéesú tih : « Ɓahaa ole kan ! Tal eena cuñ fu ra súhté kok. »
22 Yéesú won wa tih : « Gémí Koope.
23 Mee ron won kaaf ka ra ee : ɓëyí nah daŋi bee ɗofoh dee saañ yípée kísí, te ɗi laheh nuf ana na, ɗi gém biti yee won ɗi ra ay lah raa, ɗi ay ri rii pagiɗ.
24 Daa tah mi won ɗon tee : yii ɗaŋ ɗon Koope ɓéeɓ, lah gémí biti ɗon liilute ri níi wocce ; yii baaha ay lahee ɗaaha.
25 Te ɗon koloh ɗaŋ Koope ɗeefa ɗon habrute ow yin keeññon raa, lah bëelí rí, nda Boffee ke ron sunaa-sun mín ron baal tooññon ɓal. [
26 ] »
Tígë ɗúhëꞌ sañ-sañi Yéesú rë
(Saame Maccëe 21.23-27 ; Lúkkë 20.1-8)
27 Lahaatu wa Yerusalem ra, Yéesú haalte filiɓ Faam fi gaani Koope na tílëesëh. Kélfë yí seeƴoh ya, yëeddëh yí kootii Mëyíis a ɓaha ya ɗeefrute ri,
28 wonu ri tih : « Fu pagaꞌ iña na paŋ fu ra sañ-sañi bih ? Daa nah ro paŋi wa ? »
29 Yéesú won wa tih : « May ron meele yin yínë kut. Ɗon tiil soꞌ na raa, may ron teeɓ ɓëeꞌ yeɗ soꞌ sañ-saña na pagaꞌ mi wa ra.
30 Bëtsë në húmú bëtís Saŋ ɓëewë rë, Koope daa húmú nah ri mbée ɓëewë ? Tíilí sëꞌ ! »
31 Tígí daaha, wa na wonantuu hanndal ki wa tih : « Yen won biti Koope daa nah ri raa, ɗi ay yen meel yee tah níi yen gémúy iña won Saŋ ra.
32 Te yen won biti ɓëewë daa nahu ri raa, yen ay oluu ɗíh ? » (Wa kaañuy, ndée ɓëewë ɓéeɓ habuu Saŋ yonente kaah).
33 Wa wonu Yéesú tígí daaha tih : « Fun yíih yin na ! » Ɗi nampee waa won tih : « Kon soꞌ ɓal, mii ron won ɓëeꞌ yeɗ soꞌ sañ-saña na pagaꞌ mi wa ra. »