आमोसया सफू
म्हसीका
बाइबलया अगमवक्तात मध्ये आमोस दकलय् न्हापांम्ह खः, गुम्हय्सिगु बुखँ ताहाकः यानाः च्वयातःगु दु। आमोस यहूदा देशया छगू शहरय् च्वंम्ह खः, अय्नं परमेश्वरं वयात उत्तरी इस्राएल राज्यया जुजु व हाकिमतय्त परमप्रभुया ख्याच्वः धायेत छ्वल। थ्व ई.पू. ७५० लय् जूगु घटना खः। थ्व ई व देशया निंतिं तःधंगु उन्नतिया ई खः। तर आमोस अगमवक्तां अन तःमित जुयाच्वंगु खन, तःमितय्सं मगाःमचाःपिन्त अन्याय यानाः अले क्वत्यलाः थःगु प्वाः जाय्काच्वंगु खन। इमिसं दुनुगलंनिसें धर्म व थितिकुति मानय् मयाः अले सुरक्षा स्वयेबलय् दु थें च्वं अय्नं अन धात्थेंया सुरक्षा मदु। तःधंगु साहस व जोश कयाः वं थ्व देशयापिं मनूतय्त सजाँय बियादीत्यंगु दु धकाः प्रचार यात। “न्याय खुसि थें न्ह्याना वनेमा” धकाः वं ततःसलं हालाः प्रचार यात। वं थथे नं धाइगु, “योसेफया म्वनाच्वंपिं मनूतय्त दया यानादी।” (५:१५)।
धलः पौ
इस्राएलया जःलाखःला राज्यतय्गु न्याय १:१–२:५
इस्राएलया न्याय २:६–६:१४
न्यागू दर्शन ७:१–९:१५
आमोस
1
1 तकोय् च्वंपिं फैजवाःत मध्ये छम्ह आमोसया वचन। वं इस्राएलय् भुखाय् ब्वःगु निदँ न्ह्यः इस्राएलया बारे थ्व दर्शन खन। उबलय् उज्जियाह यहूदाया जुजु व येहोआशया काय् यारोबाम इस्राएलया जुजु खः।
2 वं धाल,
“परमप्रभु सियोन पर्वतं सिंह थें गर्जय् जुयादी,
अले वय्कः यरूशलेमं थ्वय्क हालादी।
फैजवाःतय्गु घाँय्ख्यः
व कर्मेल डाँडाया च्वकाय् दुगु घाँय् गनावनी।”
इस्राएलया जःलाखःला देशतय्गु न्याय
अरामया न्याय
3 परमप्रभुं थथे धयादीगु दु,
“दमस्कसया मनूतय्सं तःक्व हे पापयात,
जिं इमित सजाँय मब्यूसे त्वःते हे मखु।
छाय्धाःसा नँयागु वा दुगु ज्याभलं अन्न दाथें हे
इमिसं गिलादया मनूतय्त तसकं बांमलाःगु व्यवहार यात।
4 जिं जुजु हजाएलया दरबारय् मि तयाः छ्वय्काबी,
अले उकिं बेन-हददया किल्लात भज्यंक नाश याइ।
5 जिं दमस्कसया मू ध्वाखात तछ्यानाबी,
जिं आवनया ब्यासिइ च्वंपिन्त
व बेथ-अदनया शासकयात भज्यंक नाश यानाबी।
अरामया मनूतय्त ज्वनाः कीर देशय् यंकी,”
परमप्रभुं धयादी।
पलिश्तीया न्याय
6 परमप्रभुं थथे धयादी –
“गाजाय् च्वंपिं मनूतय्सं तःक्व हे पापयात,
जिं इमित सजाँय मब्यूसे त्वःते मखु!
इमिसं फुक्क खलःयात ज्वनायंकाः
एदोमया ल्हातय् मियाबिल।
7 जिं गाजाया पखालय् मि तयाः छ्वय्काबी,
उकिं वया फुक्क किल्लात भज्यंक नाश याइ।
8 अश्दोदया जुजुयात व अश्कलोनया शासकयात
भज्यंक नाश यानाछ्वये।
जिं एक्रोनया विरोधय् जिगु ल्हाः ल्ह्वने,
अले ल्यंदुपिं फुक्क पलिश्तीत सी,”
परमप्रभु परमेश्वरं धयादी।
टुरोसया न्याय
9 परमप्रभुं थथे धयादी –
“टुरोसया मनूतय्सं तःक्व हे पापयात,
जिं इमित सजाँय मब्यूसे त्वःते मखु!
इमिसं फुक्क खलःयात एदोमयात मियाः इस्राएलीलिसें,
दाजुकिजा थें जुइगु सन्धियात त्वाथुल,
10 जिं टुरोसया पखालय् मि तयाः छ्वय्काबी,
उकिं वया किल्लात भज्यंक नाश याइ।”
एदोमया न्याय
11 परमप्रभुं थथे धयादी,
“एदोमया मनूतय्सं तःक्व हे पाप यात,
जिं इमित सजाँय मब्यूसे त्वःते मखु!
इमिसं थः दाजु, इस्राएलीतय्त भतिचा नं दया माया मयासें
तरवार ज्वनाः लिनाछ्वल,
इमिगु तच्वःगु तंया कारणं याना,
इमित झन अप्वः तं पिहां वल।
12 जिं तेमान शहरय् मि तयाः छ्वय्काबी,
उकिं बोज्राया किल्लात भज्यंक नाश याइ।”
अम्मोनया न्याय
13 परमप्रभुं थथे धयादी –
“अम्मोनया मनूतय्सं तःक्व हे पापयात,
जिं इमित सजाँय मब्यूसे त्वःते मखु!
इमिसं थःगु सिमाना अप्वः दय्केत गिलादया
प्वाथय् दुपिं मिसातय्गु प्वाः तरवारं फायाबिल,
14 जिं रब्बाया पखालय् मि तयाः छ्वय्काबी,
उकिं वया किल्लात भज्यंक नाश याइ।
व लडाइँया दिनय् तसकं हल्ला जुइ,
अले तसकं तःच्वगु वाफय् वःगु दिनय् थें लडाइँ जुइ।
15 इमि जुजु व
भारदारतय्त ज्वना यंकी,”
परमप्रभुं धयादी।