2
मोआबया न्याय
1 परमप्रभुं थथे धयादी –
“मोआबया मनूतय्सं तःक्व हे पापयात,
जिं इमित सजाँय मब्यूसे त्वःते मखु!
इमिसं एदोमया जुजुतय्गु क्वँय्त
च्याकाः चूं चूं याःगुलिं,
2 जिं मोआबय् मि तयाबी,
अले उकिं किर्योतया किल्लात भज्यंक नाश याइ।
लडाइँया हो हल्ला,
तःच्वगु लडाइँया सः व तुरहीया सःया दथुइ मोआबया मनूत नाश जुइ।
3 जिं इमि शासक व
इमि दक्व भारदारतय्त भज्यंक नाश याये,”
परमप्रभुं धयादी।
यहूदाया न्याय
4 परमप्रभुं थथे धयादी –
“यहूदाया मनूतय्सं तःक्व हे पापयात,
जिं इमित सजाँय मब्यूसे त्वःते मखु।
इमिसं परमप्रभुया व्यवस्थायात हेला यात,
वय्कःया विधित पालन मयात।
इमि पुर्खात ल्यूवंपिं द्यःतय्सं
इमित मखुगु लँय् यंकल।
5 अथे जुयाः जिं यहूदाय् मि तयाबी,
उकिं यरूशलेमया किल्लात भज्यंक नाश याइ।”
इस्राएलया न्याय
6 परमप्रभुं थथे धयादी –
“इस्राएलया मनूतय्सं तःक्व हे पापयात
जिं इमित सजाँय मब्यूसे त्वःते मखु,
इमिसं धर्मीतय्त वहःया लागि
व चीमिपिन्त छज्वः चप्पलया लागि मिया छ्वइ।
7 इमिसं चीमितय्गु छेनय्
बँय् च्वंगु धू थें न्हूत्तुमतु न्हुइ,
क्वत्यका च्वनेमाःपिन्त न्याय याइ मखु।
अबु व काय् छम्ह हे मिसायाथाय् वनाः
जिगु पवित्र नांयात क्वह्यंकी।
8 इपिं सकलें वेदीया न्ह्यःने
बर तयातःगु वसतय् ग्वारातुली।
बं पूगु ध्यबां न्यागु दाखमद्य
थः द्यःतय् देगलय् त्वनी।
9 “जिं थःम्हं हे इमिगु न्ह्यःने एमोरीतय्त भज्यंक नाश यानाबिया,
इपिं खयः सिमा ति तःजाः अले स्वसिमा थें बल्लाः जूसां नं,
जिं इमिगु च्वय्च्वंगु फल
व इमिगु क्वय् च्वंगु हा नाश यानाबिया।
10 एमोरीतय्गु देश बीत
जिं छिमित मिश्र देशं लिगना हया,
पिइदँ तक मरुभूमिइ न्ह्यलुवाः जुयाः यंकाः।
11 “जिं छिमि काय्पिंपाखें अगमवक्तात ल्यया
अले छिमि ल्याय्म्हपिंपाखें नाजिरीत ल्यया।
अय् इस्राएलया मनूत,
छु थ्व खँ खःगु खँ मखु ला?”
परमप्रभुं धयादी।
12 “तर छिमिसं नाजिरीतय्त दाखमद्य त्वंकल,
अले अगमवक्तातय्त अगमवाणी ल्हाये मते धकाः आज्ञा बिल।
13 “स्व, आः ला जिं छिमित अन्नं जाःगु
गाडां क्यलायंकूगु थें क्यले।
14 तसकं ब्वाँय् वनेफुम्ह नं उम्के जुइ फइ मखु,
अले बल दुम्हय्सिनं नं थःगु बल छ्यले फइ मखु,
लडाइँलय् वनीम्हय्सिनं नं थःत बचय् याये फइ मखु।
15 धनुष वाण चले याइम्ह नं थःगु थासय् दनाच्वने फइ मखु,
फुर्ति पिकयाः ब्वाँय् वनीम्हं नं थःत बचय् याये फइ मखु,
न त सल गया वनीम्हं थःगु प्राण बचय् याये फइ।
16 दक्व शक्ति दुम्ह सिपाइँ नं
थःगु हतियार त्वःताः ज्यान बचय् यायेत बिस्युं वनी,”
परमप्रभुं धयादी।