9
इस्राएल भज्यंक नाश जूगु
1 जि प्रभुयात वेदीनापं दनाच्वंगु खना, वय्कलं धयादी –
“देगःया थांया च्वका च्वकाय् तसकं दा
अले दक्व जग हे सनेमा।
व त्वदुलाः कुतुं वयाः दक्व मनूतय्गु छेनय् लायेमा
अले ल्यंदनिपिन्त धाःसा जिं तरवारं स्यानाबी।
छम्ह नं बिस्युं वने फइ मखु,
छम्ह नं बचय् जुइ फइ मखु।
2 गाः म्हुयाः इपिं पातालय् क्वय् वंसां
इमित जिं साला हये।
इपिं आकाशय् हे थाहां वंसां
जिं इमित साला क्वकाये।
3 इपिं कर्मेल डाँडाय् सुला च्वंसां
जिं इमित मालाः ज्वने।
इपिं जिपाखें सुलाः समुन्द्रया क्वय् वंसां
जिं सर्पयात इमित न्यायेगु आज्ञा बी।
4 शत्रुतय्सं इमित ज्वनायंकूसां
जिं इमित स्यायेत आज्ञा बी।
“जिं इमिके विपत्ति हयेगु पक्का यानागु दु,
इमित ग्वाहालि यायेगु निंतिं मखु।”
5 दक्व शक्ति दुम्ह परमप्रभु परमेश्वर वय्कः हे खः,
गुम्हं पृथ्वीयात थीबलय् व नायावनी,
उकी च्वंपिं दक्वसिनं दुखं च्वनी।
पृथ्वी खुसिबाःया इलय् नील खुसि थें थाहां वइ
अले मिश्र देशया खुसि थें क्वहां वनी।
6 परमप्रभुं स्वर्गय् थः च्वनेगु थाय् दय्कादी,
पृथ्वीइ उकिया जग दय्कादी।
परमेश्वरं लःयात सःतादी अले उकियात छथाय् मुंकादी
अनंलि वय्कलं उकियात बँय् प्वंकादी,
वय्कःया नां परमप्रभु खः।
7 “अय् इस्राएलीत,
छिपिं जिगु निंतिं कूशया सन्तान थें खः”
परमप्रभुं धयादी।
“छु जिं इस्राएलीतय्त मिश्र देशंनिसें,
पलिश्तीतय्त कप्तोरंनिसें,
अले अरामीतय्त कीरंनिसें लिकानाः हयागु मखु ला?
8 “परमप्रभु परमेश्वरया मिखा
दुष्ट राज्यय् लाःगु दु।
जिं वयात पृथ्वीं नाश यानाबी,
तर याकूबया फुक्क घरानायात धाःसा नाश याये मखु,”
परमप्रभुं धयादी।
9 “जिं आज्ञा बी,
इस्राएलया घरानायात दक्व जातितय्गु
दथुइ हासाय् अन्न हाःगु थें जिं हाये,
छग्वः चिग्वःगु ल्वहं नं बँय् कुतुं वनी मखु।
10 दुःखकष्ट जिमिथाय् वइ मखु,
‘जिमित छुं मभिं जुइ मखु’
धाइपिं जि प्रजा मध्येयापिं
फुक्क पापीतय्त तरवारं स्याइ।
इस्राएलयात हाकनं पलिस्था यानादी
11 “व दिंखुन्हु
“जिं दाऊदया नाश जुइ धुंकूगु वंशयात हाकनं थापं याये,
व दुंगु छेँ थें जूगु खः।
जिं उकिया पःखाः दय्के अले उकियात हाकनं थापं याये।
जिं उकियात हाकनं दय्के अले उकियात यक्व न्हापायागु थें दय्के।
12 अले इस्राएलया मनूतय्सं एदोमय् ल्यंदनिपिं मनूतय्त
व जिगु नां दुपिं दक्व जात जातितय्त अधिकार याइ,”
परमप्रभुं थथे धयादी, वय्कलं थथे हे यानादी।
13 परमप्रभुं धयादी, “थज्याःगु दिं वयाच्वंगु दु,”
“गुबलय् छिमिके यक्व अन्न बाली दइ,
छिमिसं फुक्क छ्व बुँपालेगु ई स्वयाः न्ह्यः हये फइ मखु,”
दाखमद्य दय्केगु स्वयाः याकनं दाख सइ।
पर्वत व डाँडां क्वहां वयाच्वंगु थें
तसकं साःगु दाखमद्य जुइ।
14 जिं थः मनू इस्राएलीतय्त ज्वना यंकूगु थासं लित हये।
“भज्यंक नाश जुइ धुंकूगु शहरयात हाकनं इमिसं दय्कीतिनि,
अले अन च्वनी। इमिसं दाखक्यबय् दाखमा पी अले दाखमद्य त्वनी।
इमिसं क्यबय् फलया सिमात पी अले यक्व फलफुल नइ।
15 जिं जि प्रजा इस्राएलयात इमित बियागु देशय् पी,
इमित सुनानं हाकनं लिनाकाये फइ मखु,”
परमप्रभु छिमि परमेश्वरं धयादी।