11
सेवा यायेबलय् छ्यं त्वपुइगु
1 ख्रीष्टं यानादी थें तुं जिं नं यानाच्वनागुलिं, जिं याना च्वंथें तुं छिमिसं नं याना च्वँ।
2 छिमिसं जितः लुमंका च्वंगुलिं व जिं स्यना थें च्वनाच्वंगुलिं छिमित स्याबास!
3 अय्नं छता खँ न्यँ – न्ह्याम्ह मिजंयागु छ्यं ख्रीष्ट खः, अले मिसायागु छ्यं वया भाःत खः, अले ख्रीष्टयागु छ्यं परमेश्वर खः धयागु खँ छिमिसं थुइके माल।
4 अय्जूगुलिं प्रार्थना यायेबलय् व अगमवाणी कनीबलय् मिजंतय्सं छ्यं त्वपुया तल धाःसा वं ख्रीष्टयात क्वह्यंकूगु जुइ।
5 अथे हे मिसातय्सं थःगु छ्यं त्वमपुसे प्रार्थना यात धाःसा वा अगमवाणी कन धाःसा वं थः भाःतयात क्वह्यंकूगु जुइ। थज्याःम्ह मिसा छ्यं छगलं सँ खाना तःम्ह थें खः।
6 थथे छ्यं त्वपुइ मयःम्ह मिसां सुचुक सँ खाना छ्वयेगु हे बांलाः। अय्नं सुचुक सँ खायेगु व चिहाकय्क चायेगु लज्यायागु खँ खःसा वं छ्यं त्वपुइमाः।
7 मिजंतय्सं थःगु छ्यं त्वपुइ म्वाः छाय्धाःसा मिजंत परमेश्वरयागु रूप व शोभा खः, तर मिसा मिजंया शोभा खः।
8 मिजं मिसापाखें दुगु मखु बरु मिसा मिजंपाखें दुगु खः।
9 मिसाया निंतिं मिजं दय्कातःगु मखु, बरु मिजंया निंतिं मिसा दय्कातःगु खः।
10 उकिं भाःतयागु खँ मानय् याना धकाः स्वर्गदूततय्त क्यनेत मिसातय्सं थथःगु छ्यं त्वपुइमाः।
11 अथेजूसां प्रभुया न्ह्यःने मिसातय्त मिजंत मदय्क मगाः, अले हानं अथे हे मिजंतय्त मिसात मदय्क मगाः।
12 मिसात मिजंतय्पाखें दुगु खः थें मिजंत नं मिसातय्पाखें बूपिं खः। थ्व फुक्कं सृष्टि यानादीम्ह परमेश्वरपाखें जूगु खः।
13 छिमिसं हे बिचाः याना स्व – छ्यं त्वमपुसे मिसातय्सं परमेश्वरयात प्रार्थना यायेगु बांलाः ला?
14 मिजंतय्सं ताहाःकय्क सँ लहिना तयेगु बांमलाः धकाः ला झीसं अथें स्यू नि।
15 मिसातय्सं ताहाःकय्क सँ लहिना तयेगु तसकं बांलाः। छ्यं त्वपुइत हे मिसातय्त ताहाःकगु सँ बियातःगु खः।
16 थ्व खँय् सुं मनुखं जवाःसवाः याः वःसा वयात जिं थुलि हे जक धाये – थ्व बाहेक जिमिगु मेगु थितिकुति मदु। अले मण्डलीइ मेगु थितिकुति नं मदु।
प्रभुयागु भ्वय्
मत्ती २६:२६-२९; मर्क १४:२२-२५; लूक २२:१४-२०
17 आः धायेत्यनागु खँय् धाःसा जिं छिमित च्वछाय् मफु, छाय्धाःसा छिमिसं मण्डलीइ मुनेबलय् भिंगु ज्या यायेगु स्वयाः मभिंगु ज्या यानाच्वंगु दु।
18 न्हापां ला जिं छिमि दथुइ ल्वापु दु धयागु खँ न्यना तयागु दु। थ्व खँ ला जितः नं खः थें च्वन।
19 भिंम्ह मनू म्हसीकेत ला थथे ल्वापु नं दयेमाः मखु ला?
20 छिपिं फुक्कं छथाय् मुनीगु प्रभु भ्वय् नयेत मखु खनिसा
21 छाय्धाःसा नयेबलय् छिपिं फुक्कसिनं थःगु ब्वतिं मेपिं स्वयाः न्हापालाका नइ। थुकथं गुलिं ला नये मखंका नं च्वनी, अले गुलिसिनं भ्यभ्यलुक्क नं त्वनी।
22 थथे नयेत्वने यायेत छिमि थथःगु छेँ मदु ला? छिमिसं नये मखंपिं मनूतय्गु इज्जत कायेत्यनागु ला? थथे यानाः छिमिसं परमेश्वरयागु मण्डलीयात हेपय् यानागु ला? थज्याःगु खँय् जिं छिमित छु धाये? जिं छिमित भिंपिं मनूत खः धकाः धाये फइ ला? जिं छिमित भिंपिं मनूत खः धकाः धाये मफु।
23 प्रभुं हे जितः स्यनादीगु खँ जिं छिमित स्यना बियागु खः। येशूयात ज्वंकूगु चान्हय् वय्कलं मरि कयाः
24 परमेश्वरयात सुभाय् बियादिल। अले मरि कुचा थलाः थथे धयादिल – “छिमित बियागु थ्व जिगु म्ह खः। जितः लुमंकेत छिमिसं थथे हे यायेगु या।”
25 नये धुंकाः वय्कलं अथे हे ख्वला कयाः थथे धयादिल – “थ्व ख्वला जिगु हि हाय्काः यानागु परमेश्वरयागु न्हूगु बाचा खः। जितः लुमंकेत थथे ख्वलां त्वनेगु यायेगु या।”
26 प्रभु मझातले थ्व मरि व थ्व ख्वलाय् च्वंगु दाखमद्य छिमिसं नयेत्वनीबलय् प्रभु सिनादीगु खँ फुक्कसित कंगु जुइ।
27 अय्जूगुलिं अयोग्य रितिं सुनानं थ्व मरि व थ्व ख्वलाय् च्वंगु त्वन धाःसा प्रभुयागु म्ह व हिया दोष लाइ।
28 थथे जूगुलिं फुक्क मनूतय्सं थथःगु मन जाँचय् याना स्व। अले जक मरि न, ख्वलाय् च्वंगु नं त्वँ।
29 छाय्धाःसा प्रभुया म्हयात म्हमसीकं सुनां नयेत्वने याइ वं नःगु व त्वंगुलिं थःके सजाँय हइ।
30 उकिं हे ला खः नि, छिपिं मध्ये यक्व हे म्हंमफु, बमलाः अले सिना नं वन।
31 झीसं थथःगु मन जाँचय् याना स्वःगु जूसा परमेश्वरयागु सजाँय फयेमाली मखुगु।
32 सजाँय फयेबलय् संसारयापिं मनूतनापं नाश मजुइमा धकाः प्रभुं झीत कजय् यानाः ख्याच्वः बियादीगु खः।
33 अय्जूगुलिं यःपिं दाजुकिजापिं, प्रभुयागु भ्वय् नयेत मुनीबलय् छम्हं मेम्हय्सित पियाच्वनेगु या।
34 सुं मनूया नयेपित्याइगु जूसा वं छेँय् हे न। थुकथं प्रभुयागु भ्वय् नयेबलय् छिपिं दोषी ठहरय् जुइ माली मखु। मेगु खँ धाःसा जिं आम्कन वयेबलय् हे मिलय् याये।