12
पवित्र आत्मां बियादीगु वरदान
1 यःपिं दाजुकिजापिं, पवित्र आत्मां बियादीगु वरदानयागु सत्य खँ छु खः धकाः छिमिसं सीकि।
2 छिपिं विश्वासी जुइ न्ह्यः छिपिं नमवाइपिं मूर्तितय्त पुजा याइपिं खः धकाः छिमिसं सि हे स्यू।
3 अय्जूगुलिं थ्व छता खँ छिमिसं लुमंका ति, परमेश्वरया आत्माय् जुयाः नवाइपिं सुनानं हे येशूयात सराः लायेमा धकाः धाइ मखु। अले हानं पवित्र आत्मा दुपिं मनूतय्सं जक येशूयात प्रभु धकाः धाये फइ।
4 थीथी वरदान विश्वासीतय्त बियातःगु जूसां, वरदान बियादीम्ह ला छम्ह हे पवित्र आत्मा जक खः।
5 प्रभुयागु सेवा ला तःताकथं याये फु। न्ह्यागुकथं सेवा याःसां छम्ह हे प्रभुयागु सेवा यायेगु खः।
6 थज्याःगु ज्या तःताकथं याये फु, फुक्क ज्या यायेत झीत शक्ति बियादीम्ह ला छम्ह हे परमेश्वर खः।
7 फुक्क विश्वासीत भिना वइगु ज्या याये फयेमा धकाः हे परमेश्वरं झीत पवित्र आत्मा बियादीगु खः।
8 अले थ्व हे पवित्र आत्मां छम्हय्सित बुद्धि बियादीसा मेम्हय्सित ज्ञान बियादी।
9 थ्व हे पवित्र आत्मां छम्हय्सित तःधंगु विश्वास बियादीसा मेम्हय्सित ल्वय् लाय्केगु वरदानत बियादी।
10 थ्व हे पवित्र आत्मां छम्हय्सित अजू चायापुगु ज्या यायेगु शक्ति बियादीसा मेम्हय्सित अगमवाणी कने फइगु शक्ति बियादी। अथे हे गुम्हय्सित आत्मा म्हसीकेगु शक्ति बियादी। गुम्हय्सितं थीथी भाषां नवायेगु शक्ति बियादीसा, गुम्हय्सितं थुकथं थीथी भाषां नवाःगु खँयात थुइकाबीगु शक्ति बियादी।
11 थथे थीथी वरदान बियादीम्ह थ्व हे पवित्र आत्मा खः। थ्व हे पवित्र आत्मां थःत यःथें फुक्कसित थीथी वरदान बियादी।
छगू हे म्हया तःता ब्व
रोम १२:३-८
12 मण्डली म्ह थें खः। गथे तःता म्हब्व दःसां म्ह ला छगू हे जुइ। म्ह छगू हे जूसां तःता म्हब्व दइ। ख्रीष्ट नं अथे हे खः।
13 थथे हे झीपिं यहूदीत, यहूदीमखुपिं, दास, दासमखुपिं फुक्कं छम्ह हे पवित्र आत्मां बप्तिस्मा कयागुलिं छगू म्ह जूगु दु। अले झीपिं फुक्कसिके छम्ह हे पवित्र आत्मा च्वनादीगु दु।
14 म्ह नं छगू जक म्हब्व मखु, तःता म्हब्व मिलय् जुयाः जक छगू म्ह जुइ।
15 तुतिं – “जि ल्हाः मखु, अय्जूगुलिं जि म्हयागु मखु” धकाः धाःसा छु तुति म्हयागु हे मजुइ ला?
16 थथे हे न्हाय्पनं नं – “जि मिखा मखु, अय्जूगुलिं जि म्हयागु मखु” धकाः धाःसा छु न्हाय्पं नं म्हयागु हे मजुइ ला?
17 म्ह छम्हं मिखाया मिखा जक जूसा छुकिं न्यनेगु? अले हानं म्ह छम्हं न्हाय्पंया न्हाय्पं जक जूसा छुकिं नँतुनेगु?
18 म्हय् च्वंगु म्हब्वत परमेश्वरयात यःथें तयादीगु खः।
19 म्ह छम्हं छगू हे जक म्हब्व जूसा म्ह धयागु हे गनं जुइ?
20 अथे जूगुलिं हे खः – छगू म्हय् तःता म्हब्व दुगु।
21 उकिं मिखां ल्हाःयात – “छ जितः म्वाः” धकाः धाये फइ मखु। अले हानं छेनं तुतियात – “छ जितः म्वाः” धकाः धाये फइ मखु।
22 अथे मखु, म्हय् चिधंगु व बमलाःगु म्हब्व नं झीत मदय्क मगाः।
23 गुगु म्हब्वयात झीसं बांलाः ताय्कि मखु उकियात हे झीसं बांलाक बिचाः यानाच्वन। खने मदुगु म्हब्वयात धाःसा बांलाक त्वपुयाच्वन।
24 बांलाःगु म्हब्वयात बिचाः याये म्वायेक, बरु चिधंगु व बांमलाःगु म्हब्वयात जक अप्वः बिचाः याये माय्क परमेश्वरं झीगु म्हय् म्हब्वयात मिलय् यानादीगु खः।
25 अय्जूगुलिं म्हय् च्वंगु म्हब्वत अलग जुयाच्वनी मखु, बरु फुक्कं थःथवय् मिलय् जुयाच्वनी।
26 म्हय् च्वंगु छगू म्हब्वयात जक दुःख जूसा फुक्क म्हब्वयात दुःख जुइ। अथे हे म्हय् च्वंगु छगू म्हब्वयात जक तःधंकल धाःसा फुक्क म्हब्वत लय्ताइ।
27 अथे हे छिपिं फुक्कं ख्रीष्टयागु मण्डली खः। छिपिं छम्ह छम्ह ख्रीष्टयागु म्हय् च्वंगु म्हब्वत खः।
28 अय्जूगुलिं परमेश्वरं मण्डलीइ सुयात गन गन तयेमाः अन अन हे तयादीगु दु।
दकलय् च्वय् प्रेरितत,
वयां ल्यू अगमवक्तात,
वयां ल्यू गुरुत,
अले अजू चायापुगु ज्या याइपिं,
ल्वय् लाय्केगु वरदान दुपिं,
मेपिन्त ग्वाहालि याइपिं,
मेपिन्त सल्लाह बीपिं,
अले हानं थीथी भाषां नवाये फुपिं तयादीगु दु।
29 फुक्कं प्रेरितत जुइ मखु, अथे हे फुक्कं अगमवक्तात, फुक्कं गुरुत, फुक्क अजू चायापुगु ज्या याइपिं जुइ मखु।
30 थुपिं फुक्कसिके हे ल्वय् लाय्केगु वरदान दइ मखु, थुपिं फुक्कसिनं मथूगु थीथी भाषां नवाये फइ मखु। अथे हे फुक्कसिनं थीथी भाषां नवाःगु खँ थुइकाबी फइ मखु।
31 अय्जूगुलिं अज्ज तःधंगु वरदान कायेत स्वयाच्वँ।
जिं अज्जं हे भिंगु लँ क्यने।