3
लुँयागु मूर्ति व मिया भट्टी
1 नबूकदनेसर जुजुं स्विगू मिटर तःजाःगु व स्वँगू मिटर ब्या दुगु छगू लुँयागु मूर्ति दय्कल, अले वं वयात बेबिलोन प्रान्तया दूरा धाःगु मैदानय् पलिस्था यात।
2 अनंलि नबूकदनेसर जुजुं थःम्हं पलिस्था याःगु मूर्ति देछायेगु इलय् वयेत प्रान्त प्रान्तयापिं बडा-हाकिमत, प्रशासकत, राज्यपालत, सल्लाहबीपिं मनूत, दांभरित, न्यायाधीशत व प्रान्त प्रान्तयापिं सकल हाकिमतय्त सःतके छ्वल।
3 उकिं प्रान्तया बडा-हाकिमत, प्रशासकत, राज्यपालत, सल्लाहबीपिं मनूत, दांभरित, न्यायाधीशत व प्रान्त प्रान्तयापिं सकल हाकिमत वयाः नबूकदनेसर जुजुं पलिस्था याःगु मूर्तियात देछायेत मुनाः मूर्तियागु न्ह्यःने दन।
4 उबलय् नाय्खिं च्वय्कः वःम्ह मनुखं ततःसलं हालाः थथे धाल, “हे देश-देशयापिं, जाति जातियापिं, थीथी भाय् ल्हाइपिं मनूत जुजुया आज्ञा न्यँ!
5 छिमिसं तुरही, बाँसुरी, सितार, सारंगी, वीणा, सनई व मेमेगु बाजाया सः तायेवं नबूकदनेसर जुजुं पलिस्था याःगु लुँयागु मूर्तियात छिपिं सकसिनं भ्वसुलाः भागि यायेमाः।
6 अथे भ्वसुलाः भागि मयाइपिं दक्वसित अबलय् हे ह्वाना ह्वाना च्यानाच्वंगु मिया भट्टीइ वांछ्वयाबीगु जुइ।”
7 अथे जुयाः उपिं तुरही, बाँसुरी, सितार, सारंगी, वीणा, व मेमेगु बाजंतय्गु सः तायेवं थीथी भाय् ल्हाइपिं, जाति जाति व देश-देशयापिं मनूतय्सं नबूकदनेसर जुजुं पलिस्था याःगु लुँया मूर्तियात भ्वसुलाः भागि यात।
8 अबलय् छुं ज्योतिषीतय्सं न्ह्यःने वयाः यहूदीतय्त द्वपं बिल।
9 इमिसं नबूकदनेसरयात धाल, “हे महाराज, छःपिं ताःई तक म्वानादीमा।
10 हे महाराज, तुरही, बाँसुरी, सितार, सारंगी, वीणा, सनई व मेमेगु बाजाया सः तायेवं सकल मनूतय्सं भ्वसुलाः लुँयागु मूर्तियात भागि यायेमाः धकाः छःपिन्सं आज्ञा बियादीगु खः।
11 अले भ्वसुलाः भागि मयाइम्हय्सित ह्वाना ह्वाना च्यानाच्वंगु मिया भट्टीया दथुइ वांछ्वयेगु जुइ धकाः छःपिन्सं आज्ञा बियादीगु खः।
12 हे महाराज, छःपिन्सं बेबिलोन प्रान्तयापिं शासक दय्कूपिं शद्रक, मेशक व अबेद्नगो नांयापिं यहूदीतय्सं छःपिनिगु आज्ञायात वास्ता याःगु मदु। इमिसं छःपिनि द्यःतय्त पुजा मयाः व छःपिन्सं पलिस्था यानादीगु लुँयागु मूर्तियात भागि नं मयाः।”
13 थ्व खँ न्यनाः जुजु तसकं तंचाल अले शद्रक, मेशक व अबेद्नगोयात थःगु न्ह्यःने हयेगु आज्ञा बिल। उकिं इमित जुजुयाथाय् हल।
14 नबूकदनेसरं इमित न्यन, “हे शद्रक, मेशक व अबेद्नगो, छिमिसं जिमि द्यःपिन्त पुजा मयाः अले जिं पलिस्था यानागु लुँयागु मूर्तियात भ्वसुलाः भागि नं मयाः धाःगु खँ जिं न्यनागु दु। छु थ्व धात्थें खः ला?
15 आः छक्वः नं छिमिसं तुरही, बाँसुरी, सितार, सारंगी, वीणा, सनई व मेमेगु बाजायागु सः तायेवं जिं दय्कागु मूर्तियात भ्वसुलाः भागि मयात धाःसा छिमित उघ्रिमय् हे ह्वाना ह्वाना च्यानाच्वंगु मियागु भट्टीइ वांछ्वयाबी। छु, छिमित बचय् याये फुम्ह सुं द्यः दु धकाः च्वनागु ला?”
16 शद्रक, मेशक व अबेद्नगों जुजुयात धाल, “हे महाराज नबूकदनेसर, थ्व खँय् जिमिसं छःपिन्त लिसः बी हे माः धइगु मदु।
17 ह्वाना ह्वाना च्यानाच्वंगु मिया भट्टीइ जिमित वांछ्वःसां जिमिसं सेवा यानाम्ह परमेश्वरं जिमित बचय् यानादी फु। वय्कलं जिमित छःपिनिगु ल्हातं त्वःतकादी फु।
18 तर वय्कलं जिमित बचय् याना मदीसां महाराज, जिमिसं छःपिनि द्यःतय्गु सेवा याये मखु, अले छःपिन्सं पलिस्था यानादीगु लुँयागु मूर्तियात भ्वसुलाः भागि नं याये मखु। थ्व खँ छःपिन्सं सीकादिसँ।”
19 अले नबूकदनेसर शद्रक, मेशक व अबेद्नगो खनाः तसकं तम्वल, तमं वयागु ख्वाः ह्याउँसे च्वन। वय्कलं मिया भट्टीयात न्हय्दुगं च्याकेत आज्ञा बिल।
20 अले वं थः छुं बहादुर सिपाइँतय्त शद्रक, मेशक व अबेद्नगोयात चिनाः व ह्वाना ह्वाना च्यानाच्वंगु मियागु भट्टीइ वांछ्वयाब्यु धकाः आज्ञा बिल।
21 अले इमिसं इपिं स्वम्हय्सित पुनातःगु जामालं, सुर्वा, व बेतालि, अले मेगु वसःनापं चिनाः ह्वाना ह्वाना च्यानाच्वंगु मिया भट्टीइ वांछ्वयाबिल।
22 जुजुं भट्टीयागु मि झन तच्वकं च्याकेत कडा आज्ञा ब्यूगुलिं शद्रक, मेशक व अबेद्नगोयात मिया भट्टीइ वांछ्वःपिं सिपाइँत मिजलां भस्म जुल।
23 थुकथं स्वम्ह चिनातःपिं मनूत ह्वाना ह्वाना च्यानाच्वंगु मिया भट्टीइ दुने लात।
24 जुजु नबूकदनेसर अजू चायाः जुरुक्क दनाः थःत सल्लाहबीपिं मनूतय्त न्यन, “छु झीसं स्वम्हय्सित जक चिनाः मिइ वांछ्वयागु मखु ला?”
इमिसं लिसः बिल, “खः, महाराज।”
25 वं धाल, “स्व, जिं ला प्यम्ह मनू व मिइ थुखे उखे न्यासि जुयाच्वंगु खना, इमित चिनातःगु नं मदु, छुं जूगु नं मदु। प्यम्हम्ह मनू धाःसा द्यःया काय् थें च्वं।”
26 नबूकदनेसर व मि ह्वाना ह्वाना च्यानाच्वंगु भट्टीया लुखाया लिक्क वनाः तःसलं धाल, “हे शद्रक, मेशक व अबेद्नगो, दक्वसिबय् तःधंम्ह परमेश्वरया सेवा याइपिं दासत, पिहां वा!”
अथे जुयाः शद्रक, मेशक व अबेद्नगो मिं पिने पिहां वल।
27 अले प्रान्तयापिं बडा-हाकिमत, प्रशासकत, राज्यपालत, जुजुयात सल्लाह बीपिं मनूत इपिं स्वम्हय्सित स्वयेत प्यखेरं मुन। मिं इमिगु म्हयात छुं मस्यंकूगु व इमिगु सँ मिं मनःगु नं इमिसं खंकल। वसः नं च्याःगु मदु, अले इमिके मिया बास तक नं मवः।
28 जुजुं धाल, “शद्रक, मेशक व अबेद्नगोया परमेश्वरया प्रशंसा जुइमा। थःत विश्वास याइपिं व थःगु सेवा याइपिं थुपिं स्वम्ह मनूतय्त बचय् यायेत वय्कलं थः स्वर्गदूतयात छ्वयाहयादिल। इमिसं जिगु खँ मन्यं, थः परमेश्वरयात त्वःताः मेपिं द्यःतय्त पुजा यायेगु स्वयाः थः सिनावनेत तयार जुल।
29 अथे जुयाः गुगु नं देश, जाति वा भाय् ल्हाइम्ह मनुखं शद्रक, मेशक व अबेद्नगोया परमेश्वरया विरोधय् छुं न्ववात धाःसा वयात कुचा कुचा यानाबीगु जुइ, अले वयागु छेँयात नाश यानाबीगु जुइ धकाः जिं आज्ञा बी। छाय्धाःसा थुकथं बचय् याये फुम्ह मेम्ह सुं द्यः मदु।”
30 अनंलि जुजुं बेबिलोन प्रान्तय् शद्रक, मेशक व अबेद्नगोया पद थकया बिल।