10
इस्राएलया विरोधय् परमप्रभुया न्याय
1 इस्राएल न्यनावनाच्वंगु छमा दाखमा खः।
वं ला थःगु हे लागि फल सय्कल।
गुलि यक्व वं फल सय्कल
उलि हे वं वेदीत दय्कल।
थःगु देशय् गुलि अन्न सल उलि हे
वं थः पुजा यायेगु ल्वहंया थांत बांलाकल।
2 इपिं ध्वंलाइपिं खः।
आः इमिसं थःगु दोषया सजाँय फये हे माली।
परमप्रभुं इमिगु वेदीत नाश यानाबी,
अले च्वखगु ल्वहंया थांत थुनाबी।
3 अले इमिसं थथे धाइ,
“जिमि जुजु मन्त, छाय्धाःसा जिमिसं परमप्रभुया भय मकया।
तर जिमिगु निंतिं जुजु हे दुसां
वं जिमिगु निंतिं छु याये फइ धकाः?”
4 इमिसं यक्व बचं बी,
मखुगु पाः फइ, अले सन्धि याइ।
अथे जुयाः बुँ पालीगु बुँइ बिखं जाःगु झाः बुया वः थें
अन्यायया मुद्दात अप्वया वःगु दु।
5 सामरियाय् च्वंपिं मनूतय्सं बेथ-आवनय्
इमि द्वहंचाया मूर्तियात छु गथे जुइ धकाः धन्दा काइ।
इपिं व मूर्तिया निंतिं दुखं च्वनी,
अले मूर्तियात पुजा याइपिं पुजाहारीत नं,
गुपिं महिमाया कारणं लय्लय् ताःगु खः,
छाय्धाःसा व मूर्तियात देशं पिने यंकी।
6 तःधंम्ह जुजुयात कोसेलि बीत
व मूर्ति अश्शूरय् यंकी।
एफ्राइम लाजय् लाइ।
इस्राएल धाःसा थःगु हे सिँया मूर्तिपाखें लाजय् लाइ।
7 सामरिया व वया जुजु लखं चुइकायंकूगु
सिँया कुचात थें नाश जुइ।
8 इस्राएलया पाप अर्थात दुष्टताया ततःजाःगु थाय् नाश जुइ।
इमिगु वेदीइ कं व झाः बुया वइ।
अले इमिसं पाहाडयात धाइ, “जिमित त्वपु।”
अले डाँडायात धाइ, “जिमित ल्हाः वा।”
इस्राएलय् परमप्रभुया न्याय
9 परमप्रभुं धयादी, “अय् इस्राएल, गिबाय् पाप याःबलय् निसें छं
आः तक नं जिगु विरोधय् पाप यायेगु मत्वःतूनी।
दुष्ट ज्या याइपिनिगु विरोधय् लडाइँनं
छु गिबाय् इमित नाप मलाइ ला?
10 गुबलय् जिगु इच्छा जुइ जिं इमित सजाँय बी।
इमिगु निदुगं अधर्मया निंतिं
इमित चीत जात जातित मुनी।
11 एफ्राइम अन्न दाइबलय् लय्लय्ताइम्ह
भाय् थूम्ह साचा थें खः।
तर जिं वयागु बांलाःगु ब्वहलय्
जुवा तयाबी।
जिं एफ्राइमयात न्ह्याकाः यंके,
यहूदां बुँपाली, अले याकूबं खः दाइ।
12 थःगु निंतिं धार्मिकताया पुसात प्यु,
न्ह्याबलें दयाच्वनीगु दयामायाया फल मुंकी।
छिमिसं बाझः तयातःगु छाःगु बुँ पा,
छाय्धाःसा परमप्रभुयात मालेगु ई थ्व हे खः,
गुकिं यानाः वय्कः झायाः छिमित
धार्मिकताया आशिष प्वंकादीमा।
13 तर छिमिसं ला अधर्मया पुसात पित,
अन्यायया फल मुंकल।
छिमिसं छलया फल नःगु दु।
छिमिसं थःगु हे शक्तिइ भलसा तल,
थःगु यक्व सिपाइँतय्के भलसा तःगुलिं,
14 छिमि मनूतय्गु विरोधय् तसकं लडाइँ जुइ,
लडाइँलय् शल्मनं बेथ-आर्बेलयात नाश याःथें
छंगु दक्व किल्लात नाश याइ– उबलय् मांपिन्त
थः काय्म्ह्याय्पिंनापं कुचा कुचा याःगु खः।
15 अय् बेथेलयापिं मनूत,
छिमिसं याःगु तसकं मभिंगु ज्याया कारणं छिमिके अज्याःगु हे दुःख वइतिनि।
व दिनय् सुथ जुइबलय्,
इस्राएलया जुजुयात भज्यंक नाश यानाबी।