11
इस्राएलया निंतिं परमप्रभुया माया
1 “इस्राएलयात मचाबलय् निसें हे जिं माया याना।
जिं थःकाय्यात मिश्र देशं सःता।
2 तर जिं गुलि गुलि इस्राएलयात सःता,
उलि उलि हे इपिं जिपाखें तापात।
इमिसं बालद्यःतय्त बलि छाल।
मूर्तिया थासय् धुँपाय् च्याकल।
3 एफ्राइमयात ल्हाः ज्वनाः न्यासि
वनेत स्यनाबियाम्ह जि हे खः।
तर जिं इमित लंका बियागु
धकाः इमिसं मसिल।
4 जिं इमित मनूतय्गु दया व मायाया
खिपतं सालाः हया।
इमिगु गःपतं जुवा ल्ह्वनाबिया
अले इमित नकेत जि क्वछुना।
5 “तर जिमि मनूत जिथाय् लिहां वयेत मानय् मजुल।
इपिं मिश्र देशय् लिहां वनेमाली,
अले अश्शूरीतय्सं इमित शासन याइ।
6 इमिगु शहरय् लडाइँ जुइ,
इमिगु मू ध्वाखात स्यंकाबी,
अले इमिगु योजनायात नाश यानाबी।
7 जिमि मनूत जिपाखें फस्वया वनेगु जिद्दी यानाच्वंगु दु।
इमिसं दकलय् तःधंम्ह परमेश्वयात सःतूसां
जिं इमित च्वछाये मखु।
8 “अय् एफ्राइम, जिं छन्त गथे यानाः त्वःते फइ?
अय् इस्राएल, जिं छन्त गथे यानाः दुष्टतय्गु ल्हातिइ लःल्हाये फइ?
जिं छन्त गथे यानाः अदमायात थें नाश याये फइ?
जिं छन्त गथे यानाः सबोयीमयात थें स्यंके फइ?
जिगु मन जिगु दुने हिले धुंकल।
जिगु मन दया मायां जाये धुंकल।
9 जिं जिगु तच्वकं च्याःगु तमं छुं नं याये मखुत,
जिं एफ्राइमयात हाकनं भज्यंक नाश याये मखुत।
छाय्धाःसा जि परमेश्वर खः, मनू मखु,
जि परमपवित्र छिपिंनापं हे दु,
जि तःच्वगु तमं छिमिथाय् वये मखु।
10 इपिं परमप्रभुया ल्यूल्यू वनी
अले वय्कः सिंह थें हालादी।
गुबलय् वय्कः हाली,
वय्कःया मस्त थरथर खाखां पच्छिमं वइ।
11 इपिं मिश्र देशं चखुंचा थें
व अश्शूर देशं सुकुभत्तु थें ग्याग्यां
व थरथर खाखां वइ।
जिं इमित थथःगु हे छेँ च्वनेबी,”
परमप्रभुं धयादी।
इस्राएलया पाप
12 एफ्राइमं जितः मखुगु खं घेरय् याःगु दु,
अले इस्राएलं जितः ध्वंलानाः घेरय् याःगु दु।
तर यहूदां आः नं परमेश्वरया आज्ञा मानय् मयाः,
आः नं पवित्र परमेश्वर प्रति इमान्दार मजू।