66
जाति जातितय्त परमप्रभुया न्याय
1 परमप्रभुं थथे धयादी, “स्वर्ग जिगु सिंहासन खः,
अले पृथ्वी जिगु तुति तइगु थाय् खः।
आः छिमिसं जिगु निंतिं गज्याःगु देगः,
जि च्वनेत गज्याःगु थाय् दय्के फु?
2 छु थःगु हे ल्हातं जिं आकाश व पृथ्वी दय्कागु मखु ला?
अले फुक्कं थथे जू वःगु मखु ला?
परमप्रभुं घोषणा यानादी।
“आत्माय् चीमि खनीपिं व नुगः ख्वःपिन्त
अले जिगु वचनय् थरथर खाइपिन्त जिं दयां स्वये।
3 तर द्वहंया बलि छाइपिं मनूयात स्याइपिं थें खः।
चिधिकःम्ह भ्याःचा बलि छाइपिं धाःसा खिचाया ककु त्वथुलीगु थें हे खः।
अन्नबलि छाइपिं फाया हि छाःगु थें हे खः।
लुमन्ति कथं धुपाँय् च्याकीपिं मूर्तियात पुजा याःगु थें हे खः।
इमिसं थःगु हे लँ ल्यःगु दु,
अले इमिगु प्राण थःगु हे घच्चाइपुगु ज्याय् लय्ताइ।
4 अथे जुयाः जिं नं इपिंनापं कडा व्यवहार याये,
इमित भय दुगु खँ हे जिं इमिथाय् हये।
छाय्धाःसा जिं सःताबलय् सुनानं लिसः मब्यू।
गुबलय् जिं सःता सुनानं वास्ता मया।
छु जिगु मिखाय् मभिंगु खः व हे इमिसं यात।
अले छु जितः मयः व हे इमिसं यात।”
5 छिपिं मध्ये सुनां परमप्रभुया वचनया भय काइ,
वय्कःया वचन न्यँ, “छिकपिनि थः मनूत,
सुनां छिमित यय्की मखु, सुनां छिमित जिगु नांया निंतिं हेला याइ,
इमिसं छिमित थथे धाइ, ‘परमप्रभुया महिमा जुइमा,
अले जिमिसं छिमिगु आनन्द स्वये।’
अय्नं इपिं लाजय् लाइ।
6 शहरपाखें पिहां वःगु हाःसः न्यँ!
देगलं पिहां वःगु सः न्यँ!
थः शत्रुतय्त पाय्छिगु बदला कायेगु
थ्व परमप्रभुया सः खः!
7 “मचाबू ब्यथा जुइ न्ह्यः हे
वं मचा बुइकी,
मचाबू ब्यथाया सास्ती जुइ न्ह्यः हे
वं छम्ह काय् बुइकी।
8 थज्याःगु खँ सुनां न्यंगु दु?
थज्याःगु खँ सुनां खंगु दु?
छु! छन्हुं हे छगू देश दय्के फइ ला?
वा छुं भतिचा इलय् हे छगू जाति पिकाये फइ ला?
अय्नं सियोनं ला ब्यथा शुरु जुइ सात हे थः मचात बुइकी।
9 छु! मचाबुइकेगु ई थ्यने धुंकाः नं मचा मबुइकेगु ला?”
परमप्रभुं धयादी, “छु! जिं सुयात मचा बुइके बी,
वयात मचाबुइकेगुपाखें पनी ला?”
छिमि परमेश्वरं धयादी।
10 “हे यरूशलेमयात माया याइपिं,
छिपिं सकलें वनापं लय्ता,
अले वयागु निंतिं लय्ता।
हे वयागु निंतिं दुखं च्वनीपिं,
आः लय्तायाः खुसि जु!
11 छाय्धाःसा वया निंतिं सान्त्वना बीपिं दुरु त्वनाः लुधंकी,
अले पूरा दुरु त्वने धुंकाः छिपिं तसकं लय्ताइ।”
12 परमप्रभुं थथे धयादी,
“जिं शान्तियात खुसि थें
अले जाति-जातितय्गु सम्पत्ति खुसिबाः थें यरूशलेमपाखे न्ह्याकाबी।
छिमिसं दुरु त्वनेखनी अले छिमित ब्वहलय् क्वबियायंकी,
अले मुलय् म्हितकीगु याइ।
13 मांम्हं थः मचायात सान्त्वना ब्यू थें जिं छिमित सान्त्वना बी।
अले छिमिसं यरूशलेमया कारणं सान्त्वना काये खनी।”
14 छिमिसं थ्व खनी अले छिमिगु नुगः तसकं लय्ताइ
अले छिपिं घाँय् थें च्वन्ह्याइ।
परमप्रभुया ल्हाः थः दासतपाखे न्ह्यज्याकूगु,
वय्कःया तं धाःसा शत्रुतपाखे न्ह्यानाच्वंगु खंके बियादी।
15 स्व, परमप्रभु मिनापं झायादी,
अले वय्कःया रथत ग्वःफय् थें खः।
वय्कलं तच्वःगु तमं पलेसा कयादी, अले मिप्वालं सजाँय बियादी।
16 मि व तरवारपाखें परमप्रभुं फुक्क मनूतय्गु न्याय यानादी,
अले परमप्रभुपाखें सीपिं यक्व हे दइ।
17 “उपिं मध्ये सुनां थःत पवित्र व शुद्ध यानाः क्यबय् वनेत फा व छुँ वा मेमेगु घच्चाइपुस्य च्वंगु चिजत नइपिनिगु ल्यू वन धाःसा इपिं फुक्कसिगु नापं हे नाश जुइ,” परमप्रभुं घोषणा यानादी।
18 “इमिगु ज्या व इमिगु मतिया कारणं जि फुक्क जातितय्त व थीथी भाय् ल्हाइपिन्त छथाय् मुंकेत वये। अले इपिं सकसिनं जिगु महिमा खनी।
19 “जिं इमिगु दथुइ छगू चिं बी। अले इपिं मध्ये बचय् जूपिन्त जिं जाति जातितय्थाय् छ्वये, तर्शीशय्, लिबियालीतय्थाय्, धनुष वाण चले याये सःपिं लूदीतय्थाय्, तूबल व ग्रीसय् अले तातापागु देशय्, अन इमिसं जिगु नां च्वन्ह्यागु न्यनातःगु मदु अले जिगु महिमा नं खंगु मदु। अय्नं इमिसं जाति जातितय् दथुइ जिगु महिमा घोषणा याइ।
20 अले इमिसं फुक्क जाति-जातितपाखें छिमि फुक्क थः मनूत, सलत, रथत, खच्चरत, ऊँटतय्के क्वबिकाः जिगु पवित्र पर्वत यरूशलेमय् परमप्रभुया निंतिं बलि थें यानाः हइ,” परमप्रभुं धयादी। “इस्राएलया सन्तानतय्सं थःगु अन्नबलि शुद्धगु थलय् तयाः परमप्रभुया देगलय् हइगु थें इमिसं थुमित हइ।
21 अले इपिं मध्ये गुलिसित पुजाहारी व लेवी जुइत जिं ल्यये,” परमप्रभुं धयादी।
22 “गथे न्हूगु आकाश व न्हूगु पृथ्वी जिं दय्के, उपिं जिगु न्ह्यःने दयाच्वनी,” परमप्रभुं धयादी। “थुकथं छिमिगु नां व छिमि सन्तान ल्यनाच्वनी।
23 छगू अमाइ निसें मेगु अमाइ व छगू विश्रामबारंनिसें मेगु विश्रामबार तक फुक्क मनूत, जातित वयाः जिगु न्ह्यःने भ्वपू वइ।” परमप्रभुं धयादी।
24 “अले इपिं पिहां वयाः जिगु विरोधय् जिराहा जूपिं मनूतय्गु सीम्ह स्वःवइ। इमिगु की सी मखु, इमिगु मि सी मखु, अले इपिं फुक्क मनूत व जातितय्त घच्चाइपुस्य च्वनी।”