44
मूर्ति पुजां यानाः नाश जूगु
1 मिश्र देशया उत्तरय् च्वंगु शहरत मिग्दोल, तहपनेस, नोप व मिश्रय् दच्छिनपाखे च्वंपिं सकलें यहूदाया मनूतय्गु बारे परमप्रभुयागु थ्व वचन यर्मियायाथाय् वल।
2 “दक्व शक्ति दुम्ह परमप्रभु, इस्राएलयाम्ह परमेश्वरं थथे धयादी – यरूशलेम व यहूदाया फुक्क शहरय् जिं हयागु फुक्क विपत्ति ला छिमिसं खंगु हे दु। थौं व झिजांमिजां दंगु सुनसान थाय् जूगु दु, अन सुं नं मच्वं।
3 थ्व इमिसं मभिंगु ज्या याःगुलिं जूगु खः। इमिसं छिमिसं म्हमस्यूपिं व छिमि पुर्खातय्सं म्हमस्यूपिं मेपिं द्यःत पुजा यानाः जितः तंचाय्कल।
4 अय्नं जिं जिम्ह दास अगमवक्तातय्त बारम्बार इमिथाय् थथे धाय्के छ्वया, ‘जितः तसकं मयःगु थज्याःगु घच्चाइपुगु ज्या याये मते।’
5 तर इमिसं जिगु खँ मन्यं, उकी ध्यान हे मब्यू। इमिसं मभिंगु ज्या यायेगु मत्वःतू व इमिसं मेपिं द्यःतय्त धुपाँय् च्याकेगु ज्या मत्वःतू।
6 उकिं जिं थःगु तं यहूदाया शहर शहर व यरूशलेमया गल्लि गल्लिइ प्वंका। उपिं थौं तक नं झिजांमिजां दंगु व सुनसान थाय् जुयाच्वंगु दु।
7 “आः दक्व शक्ति दुम्ह परमप्रभु, इस्राएलया परमेश्वरं थथे धयादी – यहूदापाखें मिजंपिं, मिस्त, चीधिकःपिं मस्त व ह्याउँमस्त नाश याकाः सुं छम्ह हे ल्यं मदय्क छिमिसं थःपिन्के थज्याःगु विपत्ति छाय् हयेगु?
8 छिपिं च्वंवःगु थ्व मिश्र देशय् मेपिं द्यःतय्त धुपाँय् च्याकाः जितः छाय् तं चाय्कागु? थथे यानाः छिमिसं थःत हे नाश याइ अले पृथ्वीया फुक्क जातिया मनूतय्सं छिमित हेस्याइ अले छिमिगु नां कयाः सराः बी।
9 छु छिमि पुर्खात, यहूदाया जुजुपिं व रानीपिं अले छिमिसं व छिमि कलाःपिन्सं यहूदा देशय् व यरूशलेमया गल्लि गल्लिइ याःगु मभिंगु ज्या छिमिसं ल्वःमन ला?
10 छिपिं थौं तक नं क्वमिलु जूगु मदुनि, छिमिसं जितः हनाबना तःगु नं मदु, जिं छिपिं व छिमि पुर्खातय्गु न्ह्यःने तयागु जिगु व्यवस्था व विधि छिमिसं पालन याःगु मदु।
11 “उकिं दक्व शक्ति दुम्ह परमप्रभु, इस्राएलया परमेश्वरं थथे धयादी – स्व, जि थः हे छिमिगु विरोधय् वनाः छिमित स्यंके, अले यहूदाय् मनूत छम्ह नं मदय्काबी।
12 मिश्रय् च्वंवने मास्ति वय्कूपिं यहूदाय् ल्यनाच्वंपिन्त जिं नाश याये। मिश्र देशय् हे इपिं नाश जुइ। तरवारं वा अनिकालं इपिं नाश जुइ। चीधिकःपिंनिसें तःधिकःपिं तक सकलें मनूत तरवार व अनिकालं सी। जिं इमित लिनाछ्वयागु फुक्क जातितय्गु दथुइ जिं इमित सराः, भय, गिल्ला व निन्दाया पात्र दय्के।
13 जिं यरूशलेमयात तरवार, अनिकाल व महामारीं सजाँय बियागु थें हे मिश्र देशय् च्वंपिन्त जिं सजाँय बी।
14 मिश्र देशय् च्वंवंपिं यहूदाया ल्यनाच्वंपिं छम्ह नं म्वानाच्वनी मखु, न बचय् जुइ। इमिसं यहूदा देशय् हे लिहां वयाः अन च्वने मास्ति वय्कूसां छुं शरण काःवपिं बाहेक इपिं छम्ह नं लिहां वयेखनी मखु।”
15 अले उगु महासभाय् दुपिं मिजंतय्सं, थः कलाःपिन्सं मेपिं द्यःतय्गु लागि धुपाँय् च्याकूगु स्यूपिं मनूतय्सं व अन दनाच्वंपिं मेपिं सकलें मिसातय्सं अले मिश्रया उत्तरपाखे व दच्छिनपाखेयापिं सकलें यहूदाया मनूतय्सं यर्मियायात धाल,
16 “छिं परमप्रभुया नामय् धाःगु खँ जिमिसं मानय् याये मखु।
17 जिमिसं याये धकाः धयागु फुक्क ज्या या हे याये। स्वर्गयाम्ह रानी जिमि द्यःमय्जुया निंतिं जिमिसं अथे हे धुपाँय् च्याके अले त्वँसाबलि नं वयात छाये गथे जिमि पुर्खा, जुजुपिं व नायःतय्सं यहूदाया शहर शहरय् व यरूशलेमया गल्लि गल्लिइ छाःगु खः। उबलय् जिमिके नयेगु नसा गाक्क दुगु खः, जिमित बांलानाच्वंगु खः, जिमिके विपत्ति नं वःगु मदु।
18 तर गुबलय् निसें जिमिसं स्वर्गयाम्ह रानी द्यःमय्जुयात धुपाँय् च्याकेगु व त्वँसाबलि छायेगु त्वःताः, उबलय् निसें जिमित फुक्क खँया मगाःमचाः जुया वयाच्वंगु दु, जिमि मनूत तरवार व अनिकालं सीगु दु।”
19 अले मिसातय्सं धाल, “जिमिसं स्वर्गयाम्ह रानीया लागि धुपाँय् च्याकाबलय् अले वयात त्वँसाबलि छायाबलय् छु जिमि थः भाःतपिन्सं मसीकं हे वयागु मूर्ति बांलूगु मरि दय्काच्वंगु व वयात त्वँसाबलि छायाच्वंगु धकाः च्वना ला?”
20 अले यर्मियां थथे लिसः ब्यूपिं सकलें मनूतय्त, मिस्त व मिजंपिन्त धाल,
21 “छिमिसं, छिमि पुर्खात, छिमि जुजुपिं व हाकिमत व देशयापिं मनूतय्सं यहूदाया शहर शहरय् व यरूशलेमया गल्लि गल्लिइ च्याकूगु धुपाँय्या बारे छु परमप्रभुयात लुमंसे मवः ला? छु! वय्कलं बिचाः याना मदिल ला?
22 छिमिसं याःगु मभिंगु ज्या व घच्चाइपुगु ज्या परमप्रभुं यक्व अप्वः सह यानादी मफुत। अले छिमिगु देश झिजांमिजां दंगु, मनू मदुगु सुनसान थाय् जुल। अले मनूतय्सं छिमिगु नां कयाः सराः बियेगु यानावयाच्वंगु दु, थौं नं अथे जुयाच्वंगु दु।
23 छिमिसं धुपाँय् च्याकाः परमप्रभुया विरोधय् पाप याःगुलिं, अले वय्कःया आज्ञा पालन मयाःगुलिं वा वय्कःया व्यवस्था वा नियम वा वय्कःया विधि पालन मयाःगुलिं थ्व विपत्ति छिमिके वःगु खः, थौं छिमिसं खनाच्वंगु थें।”
24 अले यर्मियां सकलें मनूत व मिस्तय्त धाल, “छिपिं मिश्रय् दुपिं यहूदायापिं सकलें मनूतय्सं परमप्रभुया थ्व वचन न्यँ,
25 दक्व शक्ति दुम्ह परमप्रभु, इस्राएलयाम्ह परमेश्वरं थथे धयादी – स्वर्गयाम्ह रानीयात धुपाँय् च्याकेत व त्वँसाबलि छायेत जिमिसं यानागु ‘भाकल धात्थें हे जिमिसं पूरा याये धकाः छिमिसं व छिमि कलाःपिन्सं थःम्हं बचं ब्यूगु खँ थःगु हे ज्यां छिमिसं पूरा याःगु दु।’
“उकिं छिमिसं थःगु बचं पूरा या! छिमिसं यानागु भाकल पूरा या!
26 तर हे मिश्र देशयापिं सकलें यहूदाया मनूत, परमप्रभुया वचन न्यँ! परमप्रभुं धयादी, ‘जिगु तःधंगु नामय् जिं पाफयाच्वनागु दु कि मिश्र देशय् च्वनाच्वंपिं सुं नं यहूदाया मनूतय्सं नं “गथे परमप्रभु धात्थें म्वाःम्ह खः” धकाः आवंलि गुबलें जिगु नामं पा फइ मखु वा जिगु नां काइ मखु।
27 छाय्धाःसा जिं इमित भिंया लागि मखु तर मभिंया लागि स्वयाच्वनागु दु, मिश्र देशय् दुपिं सकलें यहूदाया मनूत नाश मजुतले तरवार व अनिकालं सी।
28 तरवारं बचय्जूपिं मिश्र देशं यहूदा देशय् कम हे जक लिहां वइ। अबलय् मिश्र देशय् च्वंवःपिं यहूदाया ल्यंदुपिं सकसिनं इमिगु वचन सत्य खः लाकि जिगु वचन सत्य खः, व सी।’
29 “परमप्रभुं धयादी, ‘छिमिगु विरोधय् स्यंकेगु जिगु वचन धात्थें हे पूरा जुइ धकाः छिमिसं सीमा धकाः जिं छिमित थ्व थासय् सजाँय बी। अले व हे छिमित चिं जुइ।’
30 परमप्रभुं थथे धयादी, ‘गथे जिं यहूदाया जुजु सिदकियाहयात वयात स्यायेत स्वःम्ह वया शत्रु बेबिलोनया जुजु नबूकदनेसरया ल्हातय् बियागु खः, अथे हे मिश्रया जुजु फारो होप्रायात नं जिं वयात स्यायेत स्वःम्ह वया हे शत्रुया ल्हातय् बी।’ ”