45
बारूकयात परमप्रभुया बचं
1 यहूदाया जुजु, योशियाहया काय्, यहोयाकीमं राज्य यानाच्वंगु प्यंगूगु दँय् नेरियाहया काय्, बारूकं यर्मिया अगमवक्तां च्वकेत नवाःगु थुपिं वचन छथू भ्वँतय् च्वये धुंकाः यर्मियां वयात धाल,
2 “बारूक, परमप्रभु, इस्राएलया परमेश्वरं छन्त थथे धयादी –
3 छं धाल, ‘धिक्कार जितः! छाय्धाःसा परमप्रभुं जिगु दुःखय् दुःख तनादिल! झसुकाः ततं जि त्यानुइ धुंकल, जितः गनं नं आराम मदु।’
4 “उकिं परमप्रभुं धयादी – छं वयात थथे धा, ‘परमप्रभुं थथे धयादी – जिं छु दय्कागु दु, व जिं स्यंकाबी। जिं पृथ्वी न्यंक छु पिनागु दु व जिं लिनाकाये।
5 तर न्यँ! छं थःगु निंतिं ततःधंगु खँ माला च्वनागु ला? अथे माले मते! जिं थःम्हं हे फुक्क मनूतय्के विपत्ति हये, परमप्रभुं धयादी, तर छ न्ह्याथाय् वंसां जिं अन छंगु ज्यान बचय् यानाः छन्त म्वाकातये।’ ”