11
शुद्धपिं व अशुद्धपिं पशुत
व्य १४:३-२१
1 परमप्रभुं मोशा व हारूनयात धयादिल,
2 “इस्राएलीतय्त धा, ‘पृथ्वीइ च्वंपिं फुक्क पशुत मध्ये थुपिं पशुत छिमिसं नयेफु।
3 तुतिख्वः बाःपिं व लिन्ह्ययाः नइपिं पशुत छिमिसं नये ज्यू।
4 “ ‘अथे खःसां लिन्ह्ययाः जक नइपिं वा तुतिख्वः जक बाःपिं पशुत धाःसा नये मज्यू। गथेकि ऊँट, वं लिन्ह्ययाः नःसां वयागु तुतिख्वः मबाः। व छिमिगु निंतिं अशुद्ध खः।
5 अले शापन – वं लिन्ह्ययाः नःसां वयागु तुतिख्वः मबाः। व छिमिगु निंतिं अशुद्ध खः।
6 अथे हे खराचा – वं लिन्ह्ययाः नःसां वयागु तुतिख्वः मबाः। व छिमिगु निंतिं अशुद्ध खः।
7 अथे हे छिमिसं फा नं नये मज्यू। छाय्धाःसा वयागु तुतिख्वः बाःसां वं लिन्ह्ययाः मनः। उकिं व छिमिगु निंतिं अशुद्ध खः।
8 थुपिं पशुतय्गु ला छिमिसं नये मज्यू, अज्ज ला थुमिगु सीम्ह तक नं थीमज्यू। थुपिं अशुद्धपिं खः।
9 “ ‘लखय् च्वनिपिं पपू व बिखू दुपिं जन्तुत धाक्व छिमिसं नये ज्यू।
10 समुद्र व खुसिइ च्वनिपिं पपू व बिखू मदुपिं जन्तुत, चाहे ब्वया जुइपिं जुइमा वा लखय् च्वनिपिं मेपिं जन्तु जुइमा छिमिगु लागिं घच्चाइपुपिं खः।
11 थज्याःपिं जन्तुत घच्चाइपुपिं जूगुलिं छिमिसं थुमिगु ला नये मज्यू, अज्ज ला थुमिगु सीम्ह तक नं थीमज्यू।
12 लखय् च्वनिपिं पपू व बिखू मदुपिं जुक्व छिमिगु लागिं घच्चाइपुपिं खः।
13-19 “ ‘झंगःत मध्ये थुपिं घचाइपुसे च्वंपिं खः धकाः थुइकि। गथेकि थीथी कथंयापिं गरूड, गिद्ध, हाकुम्ह गिद्ध, ह्याउँम्ह इमा, हाकुम्ह इमा, क्वः, अस्ट्रिच, हुचिल, लःहँय्, बाय्चा, न्हिकांझंगः, हाडगील, भुल्का, राजहंस, धनेस, न्या नइम्ह क्वः, सलांत्याः झंगः, न्याखुं ब्वह, कल्कि झंगः व चिकंलापा। थुमिगु ला नये मज्यू।
20 “ ‘पपू दुपिं तुतिं चुइपिं कीत फुक्क छिमिगु लागिं घच्चाइपुपिं खः।
21 पपू दुपिं तुतिं चुइपिंलय् नं तिंन्हुयेत तुतिइ स्वापु दुपिं कीत धाःसा नये ज्यू।
22 छिमिसं क्वःबुइँचा, बुइँचा व त्वाति नये ज्यू।
23 पपू दुपिं घिसय् जुयाः जुइपिं फुक्क कीत छिमिगु लागिं घच्चाइपुपिं खः।
24 “ ‘थुमिगुपाखें छिपिं अशुद्ध जुइ। सुनां थुमिगु सीम्ह थी, व सन्ध्याः ईतक अशुद्ध जुइ।
25 सुनां थुमिगु सीम्ह क्वबिइ वं थःगु वसः हीमाः, अले सन्ध्याः ईतक व अशुद्ध जुइ।
26 “ ‘तुतिख्वः बांलाक मबाःपिं पशु, लिन्ह्ययाः नइमखुपिं पशु फुक्क छिमिगु निंतिं अशुद्ध खः। सुनां इमिगु सीम्ह थी, व अशुद्ध जुइ।
27 प्यपां चुयाः जुइपिं मध्ये पन्जांया बलं जुइपिं फुक्क पशु छिमिगु निंतिं अशुद्ध खः। सुनांनं इमिगु सीम्ह थी, व सन्ध्याः ईतक अशुद्ध जुइ।
28 इमिगु सीम्ह क्वबीपिन्सं थःगु वसः हीमाः, अले सन्ध्याः ईतक अशुद्ध जुइ। इपिं फुक्क छिमिगु निंतिं अशुद्ध खः।
29-30 “ ‘नवःचा, म्हालकाय्चा, छुँ, माय्बिलिचा, थज्याःपिं बँय् घिसय् जुया जुइपिं फुक्कं छिमिगु निंतिं अशुद्ध खः।
31 बँय् घिसय् जुया जुइपिं मध्ये थुपिं फुक्कं छिमिगु निंतिं अशुद्ध खः। सुनां थुमित व थुमिगु सीम्ह थी, व सन्ध्या ईतक अशुद्ध जुइ।
32 उपिं मध्ये सुं सीबलय् थुमिगु सीम्ह छुं चीजया लात धाःसा व अशुद्ध जुइ। सिँ, कापः, छेंगू, भांग्रा वा न्ह्यागुयागु दय्कातःगु जूसां सन्ध्या ईतक व अशुद्ध जुइ। उकियात लखय् थुना तयेमाः अले तिनि व शुद्ध जुइ।
33 थुमिगु सीम्ह गुगुं नं कथंया चाया थलय् लात धाःसा उकी च्वंगु फुक्क वस्तु अशुद्ध जुइ। अले व चा थलयात तछ्याना छ्वयेमाः।
34 उकी च्वंगु लखं थ्यूगु व दय्कूगु फुक्क नसा अशुद्ध जुइ, थज्याःगु थलय् दुगु छुं नं त्वंसा अशुद्ध जुइ।
35 थुमिगु सीम्ह गुगुं कथंया चाया भुतू वा नसा दय्केगु थलय् कुतुंवन धाःसा व अशुद्ध जुइ। उकियात तछ्याना छ्वयेमाः।
36 बुंगाःचा व लः मुंकातःगु थाय् धाःसा शुद्ध जुइ। अथेसां सुनां अनं सीम्ह लिकाइ व धाःसा अशुद्ध जुइ।
37 गुगुं नं कथंयागु पीत तयातःगु पुसाय् थुमिगु सीम्ह लात धाःसा पुसा शुद्ध हे जुयाच्वनी।
38 लखय् माःबुइकातःगु पुसाय् थुमिगु सीम्ह कुतुंवन धाःसा पुसा अशुद्ध जुइ।
39 “ ‘छिमिसं ला नये ज्यूम्ह पशु सित धाःसा, वयागु सीम्ह सुनां थी व सन्ध्या ईतक अशुद्ध जुइ।
40 सीम्ह पशुया ला नइम्ह व सीम्ह क्वब्यूम्हं थःगु वसः हीमाः, अले व सन्ध्या ईतक अशुद्ध जुइ।
41 “ ‘बँय् घिसय् जुया जुइपिं फुक्क पशु घच्चायापुपिं खः इमिगु ला नये मज्यू।
42 प्वाथं चुयाः जुइपिं वा प्यपा व प्यपां अप्वः तुतिं बँय् घिसय् जुया जुइपिं पशुत फुक्क घच्चाइपुसे च्वंपिं खः।
43 थुमित थी तक नं मते, मखुसा छिपिं अशुद्ध जुइ।
44 जि परमप्रभु छिमि परमेश्वर खः। छिमिसं थःपिन्त अर्पण यानाः पवित्र याना तयेमाः, छाय्धाःसा जि पवित्र खः। बँय् घिसय् जुया जुइपिं छुं नं कथंयाम्ह जन्तुपाखें छिपिं अशुद्ध जुइ मते।
45 छाय्धाःसा जि छिमि परमेश्वर जुइत छिमित मिश्रंनिसें हयाम्ह परमप्रभु जि हे खः। उकिं छिपिं पवित्र जुइमाः, छाय्धाःसा जि पवित्र खः।
46 “ ‘पशुत, झंगःपंक्षीत अले लखय् च्वनिपिं व बँय् घिसय् जुया जुइपिं फुक्क प्राणीया बारे यायेमाःगु विधि थुपिं हे खः।
47 छिमिसं शुद्ध व अशुद्ध, अले नये ज्यूपिं व नये मज्यूपिं प्राणीत पाःगु म्हसीकेमाः।’ ”