12
मचाबूबलय् अशुद्ध जुइगु खँ
1 परमप्रभुं मोशायात धयादिल,
2 “इस्राएलीतय्त धा – ‘प्वाथय् दयाः काय् बुइकूम्ह मिसा न्हय्न्हु तक अशुद्ध जुइ। थीमज्यू जूगु इलय् थें व अशुद्ध जुइ।
3 च्यान्हु दुखुन्हु काय्या म्हय् चिं तयेमाः।
4 अनंलि व मिसां हिबा वःगुपाखें शुद्ध जुइत स्विस्वन्हु तक मब्यंकुतले पीमाः। मब्यंकुतले वं गुगुं नं शुद्धगु वस्तु थीमज्यू अले पवित्रगु थासय् नं वने मज्यू।
5 म्ह्याय् बुइकल धाःसा व मिसा थीमज्यू जुइबलय् थें झिंप्यन्हु तक अशुद्ध जुइ। अनंलि खुइखुन्हु लिपा ब्यंके धुंकाः तिनि शुद्ध जुइ।
6 “ ‘शुद्ध जुइगु ई पूरा जुइ धुंकाः काय् बूसां म्ह्याय् बूसां वं होमबलिया निंतिं दच्छि दुम्ह चिधिकःम्ह भ्याःचा, व पापबलिया निंतिं बखुंचा वा सुकुभत्तु छम्ह परमप्रभुया न्ह्यःने नापलायेगु पालया ध्वाखाय् पुजाहारीयाथाय् हयेमाः।
7 पुजाहारीं व फुक्क परमप्रभुया न्ह्यःने छानाः वयागु निंतिं प्रायश्चित याइ अले वयागु हिबा वःगुपाखें व शुद्ध जुइ।
“ ‘मिसां काय् वा म्ह्याय् बुइके धुंकाः यायेमाःगु विधि थ्व हे खः।
8 चिधिकःम्ह भ्याःचा हये मफुसा वं होमबलिया निंतिं छम्ह व पापबलिया निंतिं छम्ह यानाः सुकुभत्तु जूसां बखुं जूसां निम्ह हयेमाः। थुकथं पुजाहारीं वयागु निंतिं प्रायश्चित याइ। अले व शुद्ध जुइ।’ ”