122
यरूशलेमया शान्तिया निंतिं प्रार्थना
दाऊदया भजन
यरूशलेमय् थहां वनेत हाःगु म्ये
1 इमिसं जितः
“परमप्रभुया देगलय् झीपिं वनेनु”
धकाः धाःबलय् जि लय्ताया।
2 अय् यरूशलेम,
जिपिं छंगु ध्वाखा दुने
दनाच्वनागु दु।
3 यरूशलेम शहरयात बांलाक
मिलय् यानाः दय्कूगु दु।
4 परमप्रभुया कुलत इस्राएलयात
ब्यूगु व्यवस्थाकथं
परमप्रभुया नांयागु प्रशंसा यायेत
अन वनी।
5 अन न्यायया सिंहासन दु,
दाऊदया वंशया सिंहासन
अन दु।
6 यरूशलेमया शान्तिया निंतिं
प्रार्थना या,
“छन्त माया याइपिं याउँक
च्वनेदयेमा।
7 छंगु पःखाः दुने नं
शान्ति दयेमा,
अले छंगु लाय्कू दुने नं
सुरक्षा दयेमा।”
8 जिमि दाजुकिजा
व जिमि पासापिनिगु निंतिं
जिं धाये, “छन्त शान्ति जुइमा!”
9 परमप्रभु झी परमेश्वरया
देगःया निंतिं
जिं छंगु भिंया लागि
प्रार्थना याये।