126
छुत्काराया लागि सुभाय्
यरूशलेमय् थाहां वनेत हाःगु म्ये
1 परमप्रभुं
लिहांवःपिन्त
सियोनय् लित हयादीबलय्
जिपिं ला म्हगस खंपिं थें जुल।
2 जिपिं न्हिला अले
जिमिसं लसताया म्ये हाला।
मेमेगु जातिं जिमिगु बारे
थथे धाल,
“परमप्रभुं इमिगु निंतिं
तःधंगु ज्या यानादीगु दु।”
3 धात्थें परमप्रभुं जिमिगु निंतिं
तःधंगु ज्या यानादिल।
जिमित यक्व लय्ताः वल।
4 हे परमप्रभु!
नेगेवया गंगु बँय् खुसित
न्ह्याःगु थें हे
जिमिगु अवस्था हाकनं
बांलाकादिसँ।
5 ख्वःख्वं प्यूपिन्सं
लय्लय्तातां म्ये हालाः
बाली लइ।
6 ख्वःख्वं पुसा ज्वनाः
ह्वलेत वंपिं मनूत
धात्थें हे लय्लय्तातां
म्ये हालाः
बालिथू ज्वनाः लिहां वइ।