127
परमेश्वरया आशिष मदुगु ज्या
सितिं वनी
सोलोमनया भजन,
यरूशलेमय् थाहां वनेत हाःगु म्ये
1 परमप्रभुं हे छेँ दय्कामदीसा,
दय्कीपिन्सं याःगु ज्या
सितिं वनी।
परमप्रभुं हे शहरया रक्षा
यानामदीसा,
पालें पिवाच्वंगु सितिं वनी।
2 नसाया निंतिं ज्या यायेत
छ सुथ न्हापां दनेगु
व चान्हय् लिबाक्क द्यंवनेगु
सितिं खः।
छाय्धाःसा वय्कलं थःत यःपिन्त
न्ह्यः बियादीगु दु।
3 स्व, काय्पिं परमप्रभुं
बियादीगु हकया सर्बय खः
अले काय्म्ह्याय्पिं
वय्कःया आशिष खः।
4 सिपाइँया ल्हातय् दुगु वाण थें
ल्याय्म्हबलय् बूपिं
काय्पिं जुइ।
5 धन्य खः व मनू,
गुम्हय्सिया यक्व काय्पिं दइ।
न्याय याइगु थासय्
थः शत्रुतनापं सामना यायेमालीबलय्
शत्रुतय्सं वयात गुबलें बुकी मखु।