140
रक्षाया लागि प्रार्थना
दाऊदया भजन, लय् तइम्हय्सिगु निंतिं
1 हे परमप्रभु,
जितः दुष्ट मनूतपाखें
बचय् यानादिसँ।
ग्यानापुपिं मनूतपाखें
जितः रक्षा यानादिसँ।
2 इमिसं थःगु नुगलय्
मभिंगु ग्वःसा ग्वइ,
अले न्हियान्हिथं
ल्वापु थनाच्वनी।
3 इमिसं नवाइगु
सर्पं न्याःगु थें खः।
इमिगु म्हुतुइ
बिख दुम्ह सर्पयागु बिख दइ।
सेला
4 हे परमप्रभु,
जितः दुष्टयागु ल्हातं
बचय् यानादिसँ।
ग्यानापुपिं मनूतपाखें
जितः रक्षा यानादिसँ।
इमिसं जिगु तुतिइ
छेर्की तयेत ग्वसाः ग्वःगु दु।
5 तःधंछुया जुइपिन्सं
जिगु लागि जाः ग्वल।
जितः तक्यंकेत
इमिसं जाः तल।
जिगु लँय् इमिसं स्वःतिपाँय्
तःगु दु।
सेला
6 हे परमप्रभु,
छि जिमि परमेश्वर खः धकाः
जिं छितः धयागु दु।
हे परमप्रभु,
छिं जिगु दयाया ख्वःसः
न्यनादिसँ।
7 हे परमप्रभु परमेश्वर,
जिगु उद्धारया बल
छिं लडाइँया इलय्
जिगु छ्यंयात
रक्षा यानादीगु दु।
8 हे परमप्रभु,
दुष्टतय्सं यय्कूगु खँ
बियादी मते।
इमिगु ग्वसाः ताःमलायेमा,
मखुसा इपिं घमण्डी जुइ।
सेला
9 जितः घेरय् याइपिनिगु छेनय्
इमिसं हे बिचाः याःगु
मभिंगु ज्या जूवनेमा।
10 मि व गन्धक
इमिगु म्हय् गायेमा,
इमित मिइ
वान्छ्वया बीमा।
इमित गालय्
क्वफानाबीमा,
अले अनं गुबलें पिहां
वये मफयेमा।
11 मखुगु खँ ल्हाइपिन्त
पृथ्वीइ सुथांलाकादी मते।
ग्यानापुपिं मनूत
याकनं हे नाश जुइमा।
12 हे परमप्रभु,
छिं दुःखय् लाःपिं
व मगाःमचाःपिनिगु
पंलिनाः न्याय यानादी
धकाः जिं स्यू।
13 धात्थें हे धर्मीतय्सं
छिगु नांयात सुभाय् बी,
भिंपिं मनूत छिगु न्ह्यःने च्वनी।