141
सन्ध्याया प्रार्थना
दाऊदया भजन
1 हे परमप्रभु,
जिं छितः इनाप याये,
जिथाय् छि याकनं झासँ।
2 जिगु प्रार्थना छिगु न्ह्यःने
नस्वाःगु धुपाँय् थें जुइमा,
अले जिं थःगु ल्हाः ल्ह्वनीबलय्
व छिगु लागि
सन्ध्याया बलि थें जुइमा।
3 हे परमप्रभु,
जिगु म्हुतुइ पिवाः तयादिसँ,
जिगु म्हुतुसिइ तालं ग्वयादिसँ।
4 दुष्ट मनूतनापं
मभिंगु ज्या यायेत
जिगु मन मभिंगु
खँपाखे मवनेमा।
अले जितः इमिगु
साःगु नसा नये म्वालेमा।
5 धर्मीतय्सं जितः दायेमा,
व जिगु निंतिं दया जुइ।
इमिसं जितः ब्वः बीमा,
व जिगु छ्यंया निंतिं
चिकं जुइ।
जिगु छेनं मयय्की मखु।
अय्नं मभिंपिं मनूतय्सं याःगु
ज्याखँया विरोधय्
जिं प्रार्थना याना हे च्वने।
6 इमि शासकतय्त पहाडया
च्वकां क्वफाइबलय्
इमिसं जिं धयागु खँ सत्य खः
धकाः सी।
7 इमिसं धाइ,
“बुँ पालिपिन्सं चापाँय्यात
तछ्याःगु थें हे
जिमिगु क्वँय् चिहानया सिथय्
थुखे उखे ह्वलाब्यूगु दु।”
8 हे दक्व शक्ति दुम्ह परमप्रभु,
जिगु मिखा छिपाखे हे
वनाच्वनी,
जिं छिके शरण काये,
जितः कालया म्हुतुइ
वान्छ्वयादी मते।
9 इमिसं जिगु लागि
ह्वःगु जाःपाखें,
मभिंगु ज्या याइपिन्सं
तःगु जाःपाखें
जितः बचय् यानादिसँ।
10 दुष्टत इमिगु थःगु जालय्
क्यनेमा,
अबलय् जि बचय् जुयाः
पिहां वये फयेमा।