3
ग्वाहालिया निंतिं सुथसिया प्रार्थना
दाऊदया भजन, दाऊदं थःकाय् अब्शालोमया थासं बिस्युं वंबलय् हाःगु भजन
1 हे परमप्रभु!
जिमि शत्रुत गुलि यक्व दुगु।
जिगु विरोधय् गुलि मनूत
दनावःगु।
2 यक्वसिनं धयाच्वन,
“परमेश्वरं वयात गुबलें नं
रक्षा यानादी मखु।”
सेला
3 तर हे परमेश्वर!
छि जिगु जवंखवं
ढाल जुयाच्वनादीगु दु।
छि जिगु गौरव खः,
छिं हे जिगु छ्यं
धस्वाका तयादीगु दु।
4 जिं तःसलं परमप्रभुया नां काये,
अले वय्कलं जितः
थःगु पवित्र पर्वतं
लिसः बियादी।
सेला
5 जि ग्वारातुलाः द्यने
अले हानं दने,
छाय्धाःसा परमप्रभुं जितः
रक्षा यानादीगु खः।
6 जितः प्यखेरं
हय्कायेत स्वयाच्वंपिं
द्वलंद्वः शत्रुत खनाः नं
जि मग्याः।
7 हे परमप्रभु, झासँ!
हे जिमि परमेश्वर,
जितः बचय् यानादिसँ।
जिमि शत्रुतय्गु न्यतालय्
दायादिसँ।
दुष्टतय्गु वा त्वथुलादिसँ।
8 परमप्रभुं रक्षा यानादी।
छिगु सुवाः
छिकपिनि मनूतय्त
दयाच्वनेमा।
सेला