92
परमेश्वरया प्रशंसाया भजन
शबाथया निंतिं छपु भजन
1 हे परमप्रभु परमेश्वर, दक्वसिबय्
तःधंम्ह,
छितः सुभाय् बीगु
व छितः तःधंकाः
भजन हालेगु बांलाःगु खँ खः।
2-3 तारयागु बाजं थानाः
अले वीणाया लय् पिकयाः
सुथय् सुथय्
छिगु सदां दयाच्वनीगु
दया मायाया बारे कनेगु
व चान्हय् चान्हय्
छि गुलि विश्वास याये
बहःम्ह खः धकाः
न्यंकेगु बांलाःगु खँ खः।
4 हे परमप्रभु,
छिं जितः थःगु ज्यां
लय्ताय्कादीगु दु।
छिं यानादीगु ज्याया कारणं
जि लय्लय्तातां म्ये हाले।
5 हे परमप्रभु,
छिगु ज्या गुलि तःधं,
छिगु बिचाः गुलि दुग्यं।
6 थ्व खँ बुद्धि मदुम्ह मनुखं
सीके फइ मखु,
मूर्खं थुइके नं फइ मखु,
7 दुष्ट मनूत घाँय् थें थाहां वयेफु,
दुष्ट ज्या याइपिनिगु भिं जुइफु,
तर इपिं सदांया लागि
नाश जुयावनी।
8 हे परमप्रभु,
छि सदांया लागि दक्वसिबय्
तःधंम्ह खः।
9 हे परमप्रभु,
छिकपिनि शत्रुत नाश जुयावनी,
अले दुष्टत उखेलाः थुखेलाः
मदइ धकाः जिमिसं स्यू।
10 छिं जितः गुँयाम्ह द्वहं थें
बल्लाकादीगु दु,
छिं जितः लसताया चिकनं
अभिषेक यानादीगु दु।
11 जिं थः शत्रुत बूगु खनागु दु,
अले दुष्टतय्गु ख्वःसः
न्यनागु दु।
12 धर्मीत ताय्गः
सिमा थें थाहां वइ,
अले लेबनानया देवदारु
सिमा थें बल्लानाः तःमा जुइ।
13 इपिं परमप्रभुया देगलय् प्यूगु
सिमा थें जुइ,
इपिं झी परमेश्वरया चुकय्
च्वन्ह्याया वइ,
14 इपिं न्ह्याबलें वाउँसे च्वनी
अले बल्लाना च्वनी।
इमिसं बुरा जुयाः नं फल बी।
15 परमप्रभु भिंम्ह खः,
अले वय्कः जिमि ल्वहंधी खः,
वय्कःयाके छुं अधर्म मदु।