2
एफिससय् च्वंगु मण्डलीयात
च्वःगु पौ
1 “एफिससय् च्वंगु मण्डलीयाम्ह दूतयात थथे धकाः च्वया छ्व -- जव ल्हातय् न्हय्गः नगु ज्वना जूम्हय्सिगु व न्हय्गू लुँयागु त्वाःदेवायागु दथुइ जुया च्वंम्हय्सिनं थथे धयादीगु दु --
2 “छिमिसं दुःख सियाः यानाच्वंगु ज्याखँ, अले सह याये फक्व सह यानाच्वंगु व मभिंपिं मनूतय्त छिमिसं दुनुगलंनिसें हे मयय्कूगु, व प्रेरित मखुसां प्रेरित खः धकाः धया जूपिन्त फताहा सावित यानाः क्यना ब्यूगु फुक्कं जिं स्यू।
3 जिगु नांयागु निंतिं छिमिसं सकतां सह याये फक्व स्वयाः नं अप्वः सह यानाच्वंगु अझ हे नं त्यानु मचासे सह यानाच्वंगु नं जिं स्यू।
4 “अय्नं छिमिसं जितः न्हापा न्हापा माया याना जूथें थौं कन्हय् मयात धकाः जिं छिमित धाये माल।
5 उकिं छिमिसं गनथाय् द्वंकागु खः लुमंकाः पश्चाताप यानाः न्हापा न्हापा याःथें थौं कन्हय् नं याये माल। मखुसा जि हे वयाः छिमिगु त्वाःदेवा उकिया थासं लिकया बी। उकिं छिमिसं पश्चाताप याये हे माः।
6 अय्नं निकोलाइटसतय्गु ज्याखँ छिमिगु दुनुगलंनिसें हे मयःगु ला बां हे लाः। जितः नं इपिं मयः।
7 “सुयाके न्हाय्पं दु वं आत्मां मण्डलीतय्त छु धयादिल धयागु न्यनाः थुइकाः का -- त्याका वःपिन्त जिं परमेश्वरयागु स्वर्गय् च्वंगु जीवन बीगु सिमायागु फल नकेबी।
स्मुर्नाय् च्वंगु मण्डलीयात
च्वःगु पौ
8 “स्मुर्नाय् च्वंगु मण्डलीयाम्ह दूतयात थथे धकाः च्वया छ्व -- सुरु व अन्त, अले सिनाः म्वाना वःम्हय्सिनं थथे धयादी --
9 “छिमिसं कष्ट फयाच्वंगु व चीमि जुयाच्वंगु जिं स्यू। अय्नं छिपिं ला तःमि खः। यहूदी मखुसां यहूदी खः धकाः धया जुइपिन्सं छिमित मभिंका जूगु नं जिं स्यू। इपिं शैतान नाप मिलय् जूपिं खः।
10 दुःख वइन धकाः छिपिं ग्याये मते। का स्व, शैतानं छिपिं मध्ये सुयातं झ्यालखानाय् कुंका बीत्यंगु दु। थुकथं छिपिं विश्वासय् गुलि बल्लाःपिं खः धकाः स्वयेत्यंगु दु। झिन्हु हे जक छिमित दुःखकष्ट जुइ। सी हे माला वंसां छिमिसं जितः विश्वास यायेगु त्वःते मते, अले छिमित जीवनयागु श्रीपेच बी।
11 “सुयाके न्हाय्पं दु वं आत्मां मण्डलीतय्त छु धयादिल धयागु न्यनाः थुइकाः का -- त्याःपिन्त नरकय् छ्वइ हे मखु।
पर्गाममय् च्वंगु मण्डलीयात
च्वःगु पौ
12 “पर्गाममय् च्वंगु मण्डलीयाम्ह दूतयात थथे धकाः च्वया छ्व -- तसकं ज्वःगु निखें धाः दुगु तरवार दुम्हय्सिनं थथे धयादी --
13 “शैतानयागु सिंहासन दुथाय् छिपिं च्वनाच्वंगु दु धकाः जिं स्यू। छिमिसं शैतान दुगु थासय् नं जितः क्वात्तुक भक्ति व विश्वास यानाच्वंगु दु धकाः, अले जिगु साक्षी बिया जूम्ह एन्टिपासयात स्याःबलय् नं छिमिसं जितः विश्वास यायेगु मत्वःतू।
14 “अय्नं जिं छिमित ब्वःबी माःगु छुं खँ दु। इस्राएलीतय्त स्यंकेत जुजु बालाकयात खँ स्यंम्ह बालामयागु बिचाः गथे खः अथे हे याना जूपिं छिमिथाय् नं सुं दु। वं इस्राएलीतय्त मूर्तियागु प्रसाद नयेगु व व्यभिचार यायेगु खँ स्यनाः स्यंकेत स्वल।
15 अथे हे निकोलाइटसयागु खँ स्यना काइपिं नं छिमिथाय् दु।
16 उकिं पश्चाताप या, मखुसा जि याकनं वयाः जिगु म्हुतुइ च्वंगु तरवारं इपिं लिसे ल्वाये।
17 “सुयाके न्हाय्पं दु वं आत्मां मण्डलीतय्त छु धयादिल धयागु न्यनाः थुइकाः का -- त्याःम्हय्सित जिं सुचुका तयागु मन्ना बी। अले छगू न्हूगु नां च्वया तःगु तुयुगु ल्वहं छगः नं बी। व काःम्हय्सिनं जक थ्व नां थुइ, मेपिन्सं थुइ मखु।
थिआटीराय् च्वंगु मण्डलीयात च्वःगु पौ
18 “थिआटीराय् च्वंगु मण्डलीयाम्ह दूतयात थथे धकाः च्वया छ्व -- छ्वयाच्वंगु मि थें च्वंगु मिखा दुम्ह, अले थीगु ली थें च्वंगु तुति दुम्ह परमेश्वरया काय्नं थथे धयादी --
19 “छिमिसं यानाच्वंगु ज्याखँ, जितः माया यानाच्वंगु, विश्वास यानाच्वंगु, सेवा यानाच्वंगु, अले सह यानाच्वंगु जिं स्यू। छिमिसं न्हापा न्हापा स्वयाः नं आः तसकं बांलाक ज्याखँ यानाच्वंगु दु धकाः जिं नं स्यू।
20 “अय्जूसां जिं धाये माःगु छता खँ दु। थः थःम्हं तुं अगमवादिनी खः धकाः धया जुइम्ह ईजेबेल धाःम्ह मिसायात छिमिसं छुं हे मधासे तयातल। जिमि दासतय्त व्यभिचार यायेगु व मूर्तियागु प्रसाद नयेगु खँ स्यनिम्हय्सित छिमिसं याःयाःथे याकातये ज्यू ला?
21 जिं वयात पश्चाताप यायेमा धकाः ई बिया तया। अय्नं वं याना जूगु व्यभिचार याये मखुत धकाः मधाः।
22 “उकिं आः जिं वयात उसाँय् मदय्काः लासाय् प्यपुंकाबी। व नाप व्यभिचार याःपिन्सं पश्चाताप मयात धाःसा व नाप तुं इमित नं तसकं दुःखकष्टय् लाका बी।
23 वया मस्तय्त जिं स्यानाबी। मनूतय्गु मन व नुगः वातुवालाः स्वइम्ह जि हे खः धकाः अले जक फुक्क मण्डलीं सीका काइ। छिमिसं याना जूगु ज्या स्वयाः जिं नं छिमित माःगु याये।
24 “आः ल्यं दनिपिं थिआटीराय् च्वंपिं वयागु खँय् मजूपिं व शैतानयागु गुप्ति खँ मस्यूपिन्त जिं आः मेगु छुं हे कु कुबीके मखुत।
25 आः थें तुं छिपिं जि मवतले विश्वासय् बल्लाना च्वँ।
26 लिपा तकं जिं धाःथे
यानाच्वंम्हय्सित व
त्याइम्हय्सित
जात जातियापिन्त शासन
याके बी।
27 वय्कलं इमित
नँयागु दण्डीं शासन याइ,
अले चायागु थल
तछ्याःथें तछ्याइ।
जितः जिमि बाःनं ब्यूगु ति हे
अधिकार इमित दइ।
28 “अले जिं इमित सुथसिगु नगु नं बी।
29 “सुयाके न्हाय्पं दु, वं आत्मां मण्डलीतय्त छु धयादिल धयागु न्यनाः थुइकाः का।”