3
सार्डिसय् च्वंगु मण्डलीयात
च्वःगु पौ।
1 “सार्डिसय् च्वंगु मण्डलीयाम्ह दूतयात थथे धकाः च्वया छ्व – परमेश्वरया न्हय्म्ह आत्मा व न्हय्गः नगु दुम्हय्सिनं थथे धयादी –
“छिमिसं यानाच्वंगु ज्याखँ जिं स्यू। मनूतय्सं छिपिं म्वानाच्वंपिं खः धकाः बिचाः याइ, अय्नं धात्थें धाये धाःसा छिपिं सीपिं खः।
2 न्ह्यलं चायेका च्वँ, ल्यंदनिगु खँयात बल्लाका ति। मखुसा याकनं हे तनावनी। जिमि परमेश्वरया न्ह्यःने छिमिसं याना जूगु ज्याखँ बांलाः मजू धकाः जिं स्यू।
3 छिमिसं न्यनागु व सयेका कयागु वचन लुमंका ति। वचनयात मानय् या, अले पश्चाताप या। छिपिं न्ह्यलं चायेका मच्वंसा जि खुँ वः थें वये। जि छिमिथाय् गुबलय् वइ धकाः छिमिसं सी मखु।
4 “अथेसां सार्डिसय् गुलिखय् मनूतय्सं थःगु लं यचुकातःगु दु। थुपिं तुइसे च्वंगु वसतं पुनाः जि नाप जुइतिनि, छाय्धाःसा थुपिं जि नाप जुइत ल्वः।
5 थथे त्याःम्हय्सित जिं तुयुगु वसतं पुंकाबी। अले जिं वयागु नां जीवनयागु सफुलिं गुबलें हुयाछ्वये मखु। जिमि बाःयागु न्ह्यःने व वय्कःया स्वर्गदूततय्गु न्ह्यःने जिं थ्व जिम्ह मनू खः धकाः धाये।
6 “सुयाके न्हाय्पं दु, वं आत्मां मण्डलीतय्त छु धयादिल धयागु न्यनाः थुइकाः का।
फिलाडेल्फियाय् च्वंगु मण्डलीयात च्वःगु पौ
7 “फिलाडेल्फियाय् च्वंगु मण्डलीयाम्ह दूतयात थथे धकाः च्वया छ्व –
“पवित्रम्ह, धात्थेंयाम्ह,
दाऊदयागु ताःचा दुम्हय्सिनं थथे धयादी –
गुम्हय्सिनं चाय्कूगु खापा सुनानं ति फइ मखु,
अले तिनाब्यूगु खापा चाय्के फइ नं मखु।
8 “छिमिसं यानाच्वंगु ज्याखँ जिं स्यू। स्व, जिं छिमिगु न्ह्यःने लुखा चाय्का बियागु दु। थ्व लुखा सुनानं ति फइ मखु। छिपिं यक्व शक्ति मदुपिं मनूत खःसां जितः त्वमतुसे विश्वास यानाच्वंगु दु धकाः जिं स्यू।
9 स्व, यहूदीत मखुसां यहूदीत खः धकाः मखुगु खँ ल्हानाजुइपिं शैतानयागु बाखं कनीगु छेँय् मुनिपिन्त जिं यायेगु स्यू। स्व, जिं इमित छिमिथाय् छ्वयाहयाः छिमिगु तुति भागि याकेहये। अले जक जिं माया याना तयापिं मनूत छिपिं हे खः धकाः इमिसं सीकी।
10 “छिमिसं न्ह्यागु दुःखकष्ट सहयाना नं जिगु वचन मानय् यानाच्वन। उकिं जिं नं छिमित संसारय् च्वंपिं फुक्कसितं जाँचय् यायेत जू वइगु दुःखकष्टं बचय् याये।
11 जि याकनं वयेत्यनागु दु, उकिं छिमिके दुगु त्वःफिके मते। अले जक छिमित बीगु श्रीपेच सुनानं लाकाकाये फइ मखु।
12 त्याःम्हय्सित जिमि परमेश्वरयागु देगःया थां यानाबी। अले अनं व गुबलें हे पिहां वनेमाली मखु। अले जिं उकी जिमि परमेश्वरयागु नां च्वयाबी, स्वर्गं जिमि परमेश्वरयागु थासं क्वहां वयाच्वंगु न्हूगु यरूशलेम धाःगु शहरयागु नां व जिगु हे न्हूगु नां नं उकी च्वयाबी।
13 “सुयाके न्हाय्पं दु, वं आत्मां मण्डलीतय्त छु धयादिल धयागु न्यनाः थुइकाः का।
लाउडिकियाय् च्वंगु मण्डलीयात च्वःगु पौ
14 “लाउडिकियाय् च्वंगु मण्डलीयाम्ह दूतयात थथे धकाः च्वया छ्व – परमेश्वरया दक्व सृष्टिया शासक, आमेन धाःम्ह, विश्वास याये बहःम्ह, खःगु खःगु जक साक्षी बीम्हय्सिनं धयादी।
15 “छिमिगु आनिबानि फुक्कं जिं स्यू। छिपिं न क्वा हे क्वाः, न ख्वाउँसे हे च्वं, बरु छिपिं कि क्वाःसा ज्यू कि ख्वाउँसा ज्यू।
16 छिपिं क्वा नं मक्वाः अले ख्वाउँ नं मजू, बरु लुमु लुमु धाःपिं जूगुलिं जिं छिमित थुकलं बी।
17 छिमिसं धाःसा ‘जि तःमिम्ह खः, जिके माक्वं सम्पत्ति दु, उकिं जितः छुं नं माःगु मदु’ धकाः धया जुयां छु याये? तर छिपिं तसकं हे दुःख ताया च्वंपिं, माया वनापुसे च्वंपिं, चीमिपिं, कांपिं, अले पचिनांगापिं धकाः छिमिके होश मदुनि।
18 उकिं छिमिसं तःमि जुइत मिइ दायातःगु लुँ, अले थःगु पचिनांगागु म्हया मछाः तंकेत तुयुगु लं, व मिखाय् तयेत मलम जिके न्या धकाः जिं सल्लाह बियाच्वना।
19 जिं माया यानापिन्त कजय् नं याये, ब्वः नं बी, उकिं जिगु वचन बांलाक मानय् यायेमाः व पश्चाताप नं यायेमाः।
20 “स्व, जिं लुखाय् दनाः सःताच्वना। सुनानं जिगु सः तायाः खापा चाय्का ब्यूसा जि दुहां वनाः व नाप नयेत्वने याये। अले वं जि नाप नयेत्वने याइ।
21 गथे जिं त्याकाः जि जिमि बाःयागु सिंहासनय् वय्कः नाप फ्यतुइ खंगु दु, अथे हे त्याम्हय्सित जिं जिगु सिंहासनय् जि नाप फ्यतुके बी।
22 “सुयाके न्हाय्पं दु, वं आत्मां मण्डलीतय्त छु धयादिल धयागु न्यनाः थुइकाः का।”