31
Ma timotemachica miyac ipan Toteco
1 TOTECO, ipan ta nimotemachijtoc.
Ax quema xiquincahuili sequinoc ma nechpinahualtica.
Xinechmanahui ta tlen nochipa tijchihua tlen xitlahuac.
2 TOTECO, ximotzonpilo huan xinechtlacaquili.
Xinechmanahuiqui nimantzi.
Xinechcahuili ma nimotlati mopan ta.
Na niitztos momaco para tinechmanahuis.
3 Ipan ta nimotemachía para tinechpalehuis.
Quena, ipan ta niitztoc ica temachili.
Tinechyacantiyas para nochi ma mitzhueyitlalica más.
4 Ta tinotlamocuitlahuijca,
xinechmaquixti tlen ni tlaquetztli tlen nocualancaitacahua quitlatijtoque ipan noojhui para nechmasiltise.
5 Nimitzmactilía notonal momaco.
Xinechmanahui, TOTECO, ta tlen tieli nopa Dios tlen titemachtli.
6 Niquincocolía nochi tlen quinhueyichihuaj teteyome,
pampa teteyome ax tleno hueli quichihuaj.
Pero na nimotemachijtoc ipan ta, TOTECO.
7 Nijpiya miyac paquilistli pampa tinechicnelía.
Ta tiquitztoc nochi nocuesol,
tiquixmajtoc nochi tlen nopantitoc.
8 Amo xinechtemactili ininmaco nocualancaitacahua.
¡Axtle! Campa tinechquetzqui eli tlacualca huan temachtli.
David tlaijiyohuiyaya ica cocolistli huan ica icualancaitacahua
9 TOTECO, xinechtlasojtla pampa niitztoc ipan cuesoli.
Nisenchocatoc hasta nijmati tlantiyohuij noixtiyolhua.
Ipan noyolo huan notlacayo nijmati nitlamitlaijiyohuijtoc ica cuesoli.
10 Ni tlacuajcualocayotl nechtzontlamiltía pampa san cuesoli nijmati.
Sesen xihuitl tlen pano san niayijtía.
Ya tlantinemi nochicahualis ipampa notlajtlacolhua hasta ya nitlacayohuactinemi.
11 Nocualancaitacahua huan hasta nocalnechcahua nechijiyaj.
Tlen nechixmatij nechimacasij.
Tlen nechitaj ojtipa nechtlalcahuíaj.
12 Nochi tlacame nechilcajtoque queja ya nimictosquía.
Nechtlahuelcajtoque queja se chachapal tepalcatl ipan tlasoli.
13 Nijcaqui quejatza nocualancaitacahua nechistlacahuíaj.
Yeca nechitzquitoc se hueyi majmajtli huan nechmajmatía.
Inijuanti san sejco moijilhuíaj quejatza huelise nechmictise.
14 Pero TOTECO, na nimotemachía ipan ta huan niquijtohua: “¡Taja tinoDios!”
15 Sesen tonali tlen niitztoc momaco eltoc.
Xinechmanahui ininmaco nocualancaitacahua tlen nechtlaijiyohuiltijtinemij.
16 TOTECO, ma monextis moteicnelijcayo ipan moxayac quema tinechtlachilía na,
nimotlatequipanojca.
Xinechmaquixti pampa ta tinechsenicnelijtoc.
17 TOTECO, na nimitztemojtoc.
Amo xiquincahuili para ma nechpinahualtica.
Xiquinpinahualti tlacame tlen ax cuajcualme.
Quena, inijuanti mocamatzacuase quema tiquintzontlamiltis.
18 TOTECO, ayoc molinis ininnenepil inijuanti tlen istlacatij quema ya mictose.
Ayoc itztose inijuanti tlen mohueyimatij quema camatij para techtlaijilhuise tojuanti tlen tinemij xitlahuac moixpa.
Quena, xiquinmicti tlen mohueyitlalíaj huan techmahuispolohuaj.
19 Pero ta, nelía hueyi moyolo ica inijuanti tlen mitztlepanitaj huan tiquinmocuitlahuía.
Nelía cuali moteicnelilis tlen ticajcoctoc para tojuanti tlen timotemachijtoque ipan ta,
tojuanti tlen tlamiyacapa titematiltijtoque para san ta tihueli titechmanahuis.
20 TOTECO, ta techtlatía campa ixtacatzi tojuanti tlen timitztlepanitaj,
huan nepa ta timocahua tohuaya.
Yeca fiero tlacame ax huelij techajsise ica tlen quisencajtoque.
Quena, momaco titechtlatía huan axaca tlen techmahuispolohua hueli techajsis.
21 Nimitztlascamati, TOTECO,
pampa tijchijqui huejhueyi tlamantli para tinechnextilis moteicnelijcayo.
Ica temachili tinechyahualojtoc para tinechmanahuis tlen nocualancaitacahua.
22 TOTECO, nimoilhuijtiquisqui para tinechtlahuelcajtoya.
¡Pero ax neli!
Tijcajqui quema nimitztzajtzili xinechpalehuiqui, huan tinechnanquili.
23 Nochi imojuanti tlen iniaxcahua TOTECO,
xiquicnelica pampa yajaya quinmocuitlahuía tlen itztoque temachme.
Pero ica tlacame tlen mohueyimatij,
TOTECO quintlaxtlahuía hasta ica itlapanca nochi tlen ax cuali quichijtoque.
24 Nochi imojuanti tlen inmotemachíaj ipan TOTECO,
xipaquica huan ximotemachica.