30
Se huicatl para quitlascamati TOTECO
1 TOTECO, nimitzhueyitlalía pampa tinechtlalanqui tlen más tlatzintla.
Ax tiquincahuilijtoc nocualancaitacahua ma noca paquica.
2 TOTECO, nimitztlajtlani motlapalehuil para xinechchicahua quema nimococohuayaya,
huan ta tinechchicajqui.
3 TOTECO, tinechmanahui quema niitztoya para nimiquis.
Tinechmacac noyolis sampa,
huan yeca ax niitztoc ostoijtic.
4 TOTECO, nochi moaxcahua ma huicaca tiohuicatl moixtla.
Ma mitzhueyichihuaca ta tlen titlatzejtzeloltic.
5 TOTECO, quema ticualani,
san elis para se tlalochtli,
pero ipan nochi tonemilis titechnextilía para tijpiya hueyi moyolo tohuaya.
Yonque tojuanti quemantzi tichocaj ica tlayohua,
ica ijnaloc tijpiyaj paquilistli ipan ta.
6 Quema cuali niitztoya huan ax tleno nechpolohuayaya,
nimoilhui axaca huelis nechtlanis.
7 TOTECO, ica moteicnelilis titechquetztoya cuali queja se hueyi tepetl tlen axaca hueli quiolinis.
Pero teipa, timoixtlati ica na huan nimajmajcamiquiyaya.
8 Huan nimitznotzqui, TOTECO.
Nimitztzajtzili para xinechtlasojtla.
9 Pampa, TOTECO, intla tinechcahuilisquía ma nimiqui,
tlachque tijtlanisquía.
Ayoc huelisquía nimitzhueyichihuasquía iniixtla nohuampoyohua.
Toteco, intla nimiquis, nimocuepas tlali,
huan tlali ax huelis mitzhueyichihuas.
Mijcatzitzi ax huelise tepohuilise para ta nelía titemachtli.
10 Huajca, TOTECO, xinechtlacaquili huan xijpiya hueyi moyolo nohuaya.
TOTECO, ta xieli tinotlapalehuijca.
11 Tinechtlacaquilijtoc huan tinechquixtilijtoc nopa cuesoli.
Tinechmacatoc hueyi paquilistli.
Tinechquixtilijtoc nopa yoyomitl tlen nimoquentijtoya pampa nimocuesohuayaya.
Huan tinechquentijtoc se cuali yoyomitl tlen tenextilía para nijpiya paquilistli.
12 Yeca TOTECO, ax hueli nimocamatzacuas.
Nimitzhueyichihuas ica tiohuicatl huan nochipa nimitztlascamatis.