11
Ma timotemachica ipan Toteco para techpalehuis
1 Amo techilhui:
“Ximochololti cuatitla huan ximomanahuiti quen se tototl.”
Amo monequi nicholos pampa na nimotemachijtoc ipan TOTECO.
2 Nochi quiijtohuaj:
“Xiquita, nopa masehualme catli mosisiníaj quicualtlalíaj cuahuitoli huan cuatlamintli,
huan onmotlatijtoque para quinmaquilise masehualme catli itztoque xitlahuaque.”
Masque quej nopa quiijtohuaj, amo melahuac.
3 Masque quiijtohuaj:
“Ayacmo oncas leyes huan amo aqui tlanahuatis xitlahuac,
huan huajca monequi masehualme catli cuali ininyolo ma choloca pampa amo aqui huelis quinmanahuis”, amo neli inincamanal.
4 TOTECO noja itztoc ipan itiopa catli tlatzejtzeloltic nepa ilhuicac.
Quena, yaya mosehuijtoc ipan isiya yejyectzi huan noja tlanahuatía.
Quiita nochi catli quichihuaj masehualme.
Quitlajtlachilía sese inemilis.
5 TOTECO quinyejyecohua catli quichihuaj catli cuali,
pero masehualme catli amo cuajcualme huan catli quinpactía mosisiníaj, amo quinequi quinitas.
6 TOTECO quichihuas ma huetzi tlicoli catli xahuantoc ininpani catli quichihuaj catli amo cuali.
Quena, quintitlanilis azufre catli lementoc para ma huetzi ininpani,
huan quintlatis ica se ajacatl catli tlahuel totonic.
7 TOTECO, yaya nelcuali.
Quinicnelía catli nemij xitlahuac.
Huan masehualme catli xitlahuac ininyolo quiixitase,
huan quimatise para Toteco quicualita catli quichihuaj.