12
Techpalehui, TOTECO
1 Techpalehui, TOTECO,
pampa ayacmo aqui catli nelía mitzneltoquilía.
Ayacmo aquime masehualme catli quiijtohuaj catli melahuac.
2 Se ica seyoc moistlacahuíaj.
Quipiyaj ome iniixayac quen nojquiya quipatlaj inincamanal.
3 TOTECO quintzontlamiltis nochi catli quipiyaj ome iniixayac huan catli mohueyimatij quema camanaltij.
4 Quintzontlamiltis catli quiijtohuaj:
“San ica tocamanal titlatlanise.
Sintla tijnequij tiistlacatise,
tojuanti tijmatij.
Amo aqui huelis technahuatis.”
5 Pero quej ni quiijtojtoc TOTECO:
“Inijuanti catli teicneltzitzi huan catli amo quipiyaj fuerza nechtzajtzilíaj por nopa fiero masehualme catli quintlaijiyohuiltíaj.
Yeca ama nimotlananas para niquinpalehuis.
Niquinmaquixtis ininmaco catli quincualancaitaj.”
6 Nelía temachtli catli quiijtohua TOTECO.
Icamanal senquistoc melahuac.
Quena, eltoc quen se cuali plata catli quinelicxitijtoque,
huan quipajpactoque miyac hueltas hasta senquistoc cuali.
7 TOTECO, ta techmocuitlahuía.
Techmanahuis para nochipa ica masehualme catli amo cuajcualme quen ama itztoque.
8 Quena, masque mosisinijca masehualme mooquichmajtinemij campa hueli huan nochi masehualme san quipatiitaj catli amo cuali,
Ta techmocuitlahuía.