113
Toteco quitlanana se catli teicneltzi
1 ¡Xijpaquilismacaca TOTECO!
¡Quena, nochi amojuanti catli anitequipanojcahua TOTECO, xijhueyimatica!
2 Ma tijhueyimatica TOTECO ama huan para nochipa.
3 Quena, nochi masehualme tlen campa hualquisa tonati hasta campa oncalaqui ma quihueyimatica TOTECO.
4 TOTECO quipiya tlanahuatili ica nochi catli itztoque ipan nochi tlalme.
Huan ihueyitilis conpano ilhuicactli.
5 ¿Ajqueya seyoc más hueyi quen TOTECO toDios catli mosehuía nepa huejcapa para tlanahuatis?
6 Tlatzintla tlen ya eltoc ilhuicactli huan tlaltipactli.
Huan yaya mohuijtzoma para tlachiyas ipan ni tlaltipactli.
7 Huan quitlanana nopa teicneltzi catli eltoc quen masitoc ipan soquitl catli huejcatla.
Huan catli huetztoc campa quitepehuaj tlasoli quitlanana huan quisehuía campa cuali.
8 Quena, quitlanana huan quisehuía ininhuaya huejhueyi tlacame
catli quinyacanaj ialtepe ehuani.
9 Yaya quichihua para nopa sihuatl catli amo quema conepixqui
ma quinpiya iconehua huan ichaj.
Quena, quichihua ma eli se tenantli catli senpactoc.
¡Paquilistli!