132
Netlatlajtili para Toteco ma quitiochihua nopa tiopamitl
1 TOTECO, xiquelnamiqui David huan quenicatza tlaijiyohui.
2 Xiquelnamiqui quenicatza David tlatestigojquetzqui ica ta, TOTECO,
catli tiiTeco Jacob, Catli Tijpiya Nochi Chicahualistli.
3 Quiijto:
“Amo nicalaquis nocalijtic,
niyon amo nimotecas ipan notlapech para nicochis.
4 Amo niixijcopis, niyon amo nicochis niyon se tlatoctzi,
5 hasta nijpantis se lugar campa huelis nijchihuas ichaj TOTECO para ipan ma mocahua,
yaya catli iTeco Jacob, Catli Quipiya Nochi Chicahualistli.”
6 Tijcajque camanaltij ipan tlali Efrata para icaxa TOTECO eltoya nopona,
huan teipa tijpantijque huejca tlen altepeme ipan cuatitlamitl.
7 Huajca ama ma tiyaca ipan itiopa Toteco.
Ma tiyase timotlancuaquetzatij iixpa para tijhueyichihuase.
8 TOTECO, ximotlanana huan xicalaqui ipan nopa tiopamitl campa eltoc mocaxa,
catli quiixnextía mochicahualis.
9 Nopa totajtzitzi catli tiquintlapejpenijtoc ma moquentica ininyoyo chipahuac catli quinixnextía para tlatzejtzeloltique,
huan nochi masehualme catli tiquiniyocatlalijtoc ma tzajtzica ica paquilistli.
10 NoTeco, pampa tiquicnelía motequipanojca David,
amo ximoicancuepa tlen nopa tlanahuatijquetl catli ta tijtlapejpeni,
para quinnahuatis momasehualhua.
11 Pampa ta, TOTECO, tijtlajtolcahuili David,
huan amo quema tiquelcahua tijchihua catli tijtlajtolcahua.
Huan ta tiquilhui para teipa tiquintlalis iixhuihua ipan isiya para tlanahuatise.
12 Huan sintla iixhuihua quichihuase catli quiijtohua nopa camanal sencahuali catli tijchijqui ica David huan sintla quitlepanitase motlajtol,
huajca inijuanti nojquiya mosehuise ipan isiya para tlanahuatise para nochipa.
13 Pampa ta TOTECO, tijtlapejpenijtoc altepetl Jerusalén para tiitztos nopona.
14 Tiquijto:
“Ya ni elis nochaj campa niitztos para nochipa.
Nopona nimocahuas pampa ya nopa catli nijnequi.
15 Nijtiochihuas ni altepetl miyac huan niquintlamacas imasehualhua catli teicneltzitzi.
16 Niquinmaquixtis itotajtzitzi tlen nochi catli quinequij quincocose,
huan itlatzejtzeloltijca masehualhua tzajtzise ica paquilistli.
17 Nopa chicahualistli catli David quipixqui sempa nijchihuas para monextis ipan icone,
huan yaya catli nicaltijtoc para nijtequimacas quen tlanahuatijquetl elis quen se tlahuili para imasehualhua.
18 Icualancaitacahua niquintlahuisos ipan se hueyi pinahualistli,
pero yaya catli tlanahuatijquetl tlanahuatis cuali huan monextis nochi ihueyitilis.”