136
Ma tijtlascamatica Toteco
1 Xijtlascamatica TOTECO pampa yaya nelía cuali,
pampa itlaicnelijcayo amo quema tlami.
2 Xijtlascamatica Toteco Dios catli más hueyi tlen nochi sequinoc “dioses”,
pampa itlaicnelijcayo amo quema tlami.
3 Xijtlascamatica Toteco Dios catli ininTeco nochi tecojme,
pampa itlaicnelijcayo amo quema tlami.
4 Xijtlascamatica TOTECO pampa san ya hueli quichihua huejhueyi tlamantli,
pampa itlaicnelijcayo amo quema tlami.
5 Xijtlascamatica yaya catli quichijchijqui ilhuicactli ica miyac tlalnamiquilistli,
pampa itlaicnelijcayo amo quema tlami.
6 Xijtlascamatica yaya catli quitlali ni tlali ipani atl,
pampa itlaicnelijcayo amo quema tlami.
7 Xijtlascamatica yaya catli quinchijchijqui nopa tlahuilme catli onca nepa ilhuicac,
pampa itlaicnelijcayo amo quema tlami.
8 Quichijchijqui nopa tonati para ma tlahui tonaya,
pampa itlaicnelijcayo amo quema tlami.
9 Huan quichijchijqui metztli huan sitlalime para ma tlahuica tlayohua,
pampa itlaicnelijcayo amo quema tlami.
10 Xijtlascamatica TOTECO catli quintzontlamilti nopa achtihui ehuani tlen tlali Egipto,
pampa itlaicnelijcayo amo quema tlami.
11 Xijtlascamatica catli quinquixti israelitame ipan inintlal nopa egiptome,
pampa itlaicnelijcayo amo quema tlami.
12 Quena, quinquixti ica ihueyi chicahualis huan ica inejmac quinpalehui,
pampa itlaicnelijcayo amo quema tlami.
13 Xijtlascamatica yaya catli quixelo nopa Hueyi Atl Chichiltic para ma panoca imasehualhua,
pampa itlaicnelijcayo amo quema tlami.
14 Huan quinpanolti nopa israelitame ipan tlali huactoc tlatlajco nopa hueyi atl,
pampa itlaicnelijcayo amo quema tlami.
15 Pero quinatzonpolihuilti Faraón huan isoldados ipan nopa hueyi atl,
pampa itlaicnelijcayo amo quema tlami.
16 Xijtlascamatica Toteco catli quinyacanqui imasehualhua ipan nopa huactoc tlali,
pampa itlaicnelijcayo amo quema tlami.
17 Xijtlascamatica yaya catli quinmanahui imasehualhua ininmaco tlanahuatiani catli quipixque miyac chicahualistli,
pampa itlaicnelijcayo amo quema tlami.
18 Yaya quintzontlamilti huejhueyi tlanahuatiani catli tlahuel quipiyayayaj chicahualistli,
pampa itlaicnelijcayo amo quema tlami.
19 Quitzontlamilti Sehón, inintlanahuatijca nopa amorreos,
pampa itlaicnelijcayo amo quema tlami.
20 Nojquiya quimicti Og, tlanahuatijquetl tlen tlali Basán,
pampa itlaicnelijcayo amo quema tlami.
21 Huan inintlal nopa tlanahuatiani,
Toteco quinmacac imasehualhua quen se tlamantli catli inintata quincahuilijtejqui,
pampa itlaicnelijcayo amo quema tlami.
22 Quena, quimacac itequipanojca Israel para ma moaxcati nopa tlali para nochipa,
pampa itlaicnelijcayo amo quema tlami.
23 Yaya catli techelnamijqui tiisraelitame quema ayacmo tijpiyayayaj chicahualistli,
pampa itlaicnelijcayo amo quema tlami.
24 Yaya techmanahui ininmaco tocualancaitacahua,
pampa itlaicnelijcayo amo quema tlami.
25 Yaya quinmaca tlacualistli nochi tlamantli catli yoltoque,
pampa itlaicnelijcayo amo quema tlami.
26 Xijtlascamatica Toteco Dios catli quinahuatía ilhuicactli,
pampa itlaicnelijcayo amo quema tlami.