137
Inintequipachol israelitame catli itztoque ipan tlali Babilonia
1 Ipan tlali Babilonia timosehuiyayaj iteno atemitl,
huan timochoquiliyayaj,
pampa tiquelnamiquiyayaj altepetl Jerusalén,
huan quenicatza onpano cuali elqui.
2 Tiquintlahuelcajtoyaj toarpas huan tiquincuapilojtoyaj ipan ininmacuayo nopa cuame.
3 Amo hueliyaya tihuicaj.
Pero inijuanti catli techhualicatoyaj ica fuerza ipan inintlal,
techilhuijque ma tihuicaca ica paquilistli nopa yejyectzitzi huicatl catli tihuicayayaj quema tiitztoyaj ipan altepetl Jerusalén.
4 Pero amo tihuelque.
Amo hueli tihuicase se huicatl para Toteco ipan seyoc tlali ica masehualme catli amo tiquiniximatij.
5 Sintla niquelcahuasquía altepetl Jerusalén,
ma quipolo ichicahualis nonejmac,
huan ma ayacmo huelis quitzotzonas nopa arpa.
6 Sintla ayacmo niquicnelisquía Jerusalén catli techpaquilismaca,
xijcahua nonenepil ma tlatzqui ipan nocamachal para ayacmo nihuicas.
7 TOTECO, amo xiquelcahua catli nopa tlali Edom ehuani quiijtojque,
quema nopa soldados tlen tlali Babilonia quisosolohuayayaj altepetl Jerusalén.
Inijuanti quiijtohuayayaj:
“Xijsosoloca nopa altepetl hasta campa tlatzquitoc.”
8 Teicneltzi ni tlali Babilonia,
pampa nojquiya quisosolose.
Nelía paquis nopa tlacatl catli quitlamisosolos huan quintzontlamiltis imasehualhua.
9 ¡Tlahuel paquis nopa tlacatl catli quinitzquis coneme tlen Babilonia huan quinxaxamatzas ipan tetl,
por catli fiero quichijtoque inintatahua ipan altepetl Jerusalén!