147
Ma tijpaquilismacaca Toteco pampa quipalehuijtoc altepetl Jerusalén
1 Xijpaquilismacaca TOTECO pampa nelía cuali para tihuicase tiohuicatl para ya.
¡Nelía yejyectzi huan quinamiqui!
2 TOTECO sempa quicualtlalis altepetl Jerusalén,
huan quinsentilis nopa israelitame catli quinsemanqui,
huan itztoque ipan sequinoc tlalme quen seyoc tlali ehuani.
3 Yaya quinyolchicahua catli quipiyaj yoltequipacholi huan quinpajtía campa mococojtoque.
4 Yaya quimati quesqui imiyaca sitlalime onca huan sesen quintocaxtlalijtoc.
5 Toteco nelía hueyi huan quipiya miyac chicahualistli.
Itlalnamiquilis amo aqui hueli quitlamimachilía.
6 TOTECO quinhueyitlalía catli moechcapanohuaj,
pero nochi amo cuajcualme quintlahuisos tlalchi.
7 Xihuicaca para anquitlascamatise TOTECO.
Xihuicaca por nochi catli quichijtoc toDios huan xitlatzotzonaca ica arpa.
8 Toteco yaya quitzacua nepa ilhuicactli ica mixtli.
Yaya quichihua ma huetzi atl ipan tlaltipactli.
Quichihua ma moscalti xihuitl ipan cuatitlamitl.
9 Yaya quintlamaca nopa tecuanime catli nemij cuatitla.
Ininpilconehua nopa cacalotl quintlamaca,
quema pehuaj chocaj pampa mayanaj.
10 Quema Toteco quiita se cahuayo catli motlalohua chicahuac,
o quema quiita se tlacatl catli quipiya miyac fuerza,
amo quipantía miyac paquilistli ipan ininchicahualis.
11 Pero TOTECO quipantía miyac paquilistli ipan masehualme catli quitlepanitaj.
Quipantía miyac paquilistli ipan catli mochiyaj ipan ya iteicnelilis.
12 Nochi amojuanti ipan ni altepetl Jerusalén,
xijhueyimatica TOTECO.
Quena, nochi catli itztoque ipan tepetl Sion,
xijpaquilismaca amoDios.
13 Pampa yaya cuali quitzactoc ipuertas amoaltepe para amo hueli quitlapos niyon se amocualancaitaca.
Huan yaya tlahuel quintiochijtoc amoconehua.
14 Yaya quititlanis tlasehuilistli ipan nochi amotlal,
huan anmechmacas trigo catli más cuali para ica ximopanoltica.
15 Yaya quintitlanis itlanahuatilhua ipan nochi tlaltipactli.
Huan quema yaya camanaltis,
icamanal nimantzi ajsis hasta campa hueli techaj.
16 Yaya quichihuas ma huetzi sitlal setl catli chipahuac quen nextli.
Huan quisemanas setl iixpa tlali hasta campa hueli.
17 ¿Ajqueya hueli quiijiyohuis nopa tlasesecayotl?
18 Pero teipa yaya quinahuatis ma huala tlatotonilotl huan atiyas nopa setl.
Quichihuas ma pehua tlaajacas huan nopa atl catli mochijqui setl ipan atlajtli sempa motlalos.
19 Yaya quinmacac israelitame itlanahuatilhua,
huan quinilhuijtoc nochi catli cuali ma quichihuaca ipan inialtepe,
para tetlajtolsencahuase xitlahuac.
20 TOTECO amo quinchihuilijtoc ni tlamantli masehualme ipan sequinoc tlalme.
Inijuanti ayamo quiiximatij itlanahuatilhua, pero tojuanti, quena.
¡Paquilistli!