148
Ma quihueyimatica Toteco nochi tlamantli catli yaya quisencajtoc
1 ¡Ma quipaquilismacaca TOTECO nochime catli itztoque ipan ilhuicactli!
Quena, tlen ajacatipa xijpaquilismacaca TOTECO.
2 Nochi amojuanti anitequihuajcahua,
xijpaquilismacaca TOTECO.
Quena, xijpaquilismacaca nochi amojuanti catli anquitequipanohuaj nepa ilhuicac.
3 Ma quipaquilismacaca tonati huan metztli.
Ma quipaquilismacaca nochi nopa sitlalime catli yejyectzi tlahuíaj.
4 Ma quipaquilismacaca nopa ilhuicactli catli eltoc más huejcapa,
huan nopa apoctli catli mopantía ajacatipa.
5 Xijpaquilismacaca TOTECO pampa yaya camanaltic huan mochijqui catli ama onca.
6 Yaya quinchijqui para eltose para nochipa,
huan quichijqui se tlanahuatili catli ica amo quema moyolcuepas.
7 Ma quipaquilismacaca TOTECO nochi catli itztoque ipan ni tlaltipactli.
Ma quipaquilismacaca nopa huejhueyi tlapiyalme catli itztoque tlatzintla hueyi atl.
8 Ma quipaquilismacaca nopa tlitl, tesihuitl, setl, apoctli,
huan nopa ajacatl catli quichihuaj ipaquilis.
9 Ma quipaquilismacaca nochi tepeme, tlachiquilme,
huan nochi cuame catli temacaj inintlajca huan nochi tiocuame.
10 Ma quipaquilismacaca TOTECO nochi tlamantli tlapiyalme,
huan nochi tecuanime, cohuame, huan totome.
11 Ma quipaquilismacaca nochi tlanahuatiani catli itztoque ipan tlaltipactli,
huan nochi jueces,
huan nochi masehualme ipan nochi tlalme.
12 Ma quipaquilismacaca telpocame, ichpocame, huehuentzitzi huan coneme.
13 Ma quipaquilismacaca TOTECO pampa san yaya quinamiqui tijhueyimatise.
Ihueyitilis nelhueyi hasta quipano ilhuicactli huan tlaltipactli.
14 Yaya quinfuerzajmacatoc imasehualhua.
Ma quipaquilismacaca TOTECO nochi itlatzejtzeloltijca masehualhua,
nochi tojuanti catli tiisraelitame catli yaya techiyocatlalijtoc para ma tiitztoca más inechca.
¡Xijpaquilismacaca TOTECO!