18
David quitlascamati TOTECO pampa tlatlantoc
1 Nimitzicnelía, TOTECO.
Na niitztoc momaco.
2 TOTECO, mopan ta nimotlatía pampa temachtli techmaquixtis.
Techyahualohua para amo huelis nechajsise nocualancaitacahua.
Taya tinotlamanahuijca.
Ipan ta, noTeco Dios, nimotlatía,
pampa na niitztoc momaco.
Quena, san ipan ta nimotemachía.
Ta techyahualohua para techmocuitlahuía.
Taya tieli quen se huejcapantic tepancali catli cuali huan temachtli.
Ica ta mochicahualis nitlatlanis.
3 San monequi nijnotzas TOTECO catli quinamiqui para nijhueyichihuas,
huan yaya nechmanahuis ininmaco nochi nocualancaitacahua.
4 Eltoya quen nechpixtoya imaco miquilistli.
Nochi catli fiero catli onca ipan ni tlaltipactli nechtlanisnequiyaya.
5 Nopa mijca ostotl nechtlaquechilijtoya hasta ayacmo nijpixqui fuerza.
San se quentzi más huan nimiquisquía.
6 Pero quema más nimotequipachohuayaya,
nijnotzqui TOTECO.
Nijtlajtlani ma nechpalehui noTeco Dios.
Huan yaya nechtlacaquili hasta nepa ipan ilhuicac.
Quena, quichihuili cuenta catli niquilhui.
7 Huajca chicahuac mojmolini tlali hasta momajmatijque nochi tepeme.
Moojolinijque nopa tepeme hasta campa ontlatzquitoque,
huan mohuihuixojque pampa Toteco Dios cualanqui.
8 Elqui quen quisayaya poctli ipan iyacatzol,
huan ipan icamac quisayaya se tlitl catli nochi quitlamitlatiyaya,
huan nochi quisosolohuayaya.
Quena, quimajcahuayaya tlicoli xaxahuacatoc pampa nelcualanqui.
9 Pampa Toteco Dios quitlapo nopa cortina tlen ilhuicac,
huan temoc para nechpalehuis.
Nejnentihualayaya ipan miyac mixtli catli nelyayahuic.
10 Toteco Dios tlejcoc ipan ieltlapal se querubín tequihua,
huan patlantihualajqui ipan ajacatl.
11 Yaya motzajqui ica tzintlayohuilotl,
huan atl quiyahualo para amo aqui quiitasquía.
12 Tlapetlanilotl quiyacantihualajqui quema ajsiyaya yaya catli tlahuel cahuani.
Huan nojquiya huetzqui tesihuitl huan tlicoli xaxahuacatoc.
13 TOTECO quichijqui ma quicaquica itoscac quen se tlatomonilotl catli quisqui ilhuicac.
Quena, Toteco Catli Más Hueyi tlahuejchijqui.
¡Tlahuel miyac tesihuitl huan tlicoli xaxahuacatoc huetzqui!
14 Quimajcajqui cuatlamintli ma quinajsi nochi nocualancaitacahua,
huan inijuanti cholojtejque.
TOTECO quinhuitejqui ica hueyi tlapetlanilotl huan quintzontlamilti.
15 Quema TOTECO tlailpitzqui,
nochi nopa atl ipan hueyi atl san sejco momanqui hasta nesqui nochi nopa tlali catli mocahua atzintla campa más tlahuejcatla.
Ica icamanal TOTECO mopannexti itzinpehualtil tlaltipactli, pampa yaya cualanqui.
16 Huan TOTECO quimelajqui imax hasta campa más huejcatla,
huan nechquixti tlen nopa hueyi atl.
17 Nechmaquixti ininmaco nocualancaitacahua catli quipixque huejhueyi chicahualistli.
Quena, nechmanahui tlen nocualancaitacahua catli más quipixque chicahualistli que na.
18 Inijuanti motlalijque noca na quema amo nijpixqui fuerza,
pero TOTECO nechtlananqui.
19 Nechquixti huan nechsehui campa amo mahuilili.
Nechmanahui pampa nechicnelía.
20 TOTECO nechmacatoc catli quinamiqui pampa nijchijtoc catli xitlahuac.
Nechtlaxtlahuijtoc pampa cuali nonemilis.
21 Nijtoquilijtoc iojhui TOTECO huan amo nimoiyocacajtoc tlen ya.
22 Niquelnamictoc nochi icamanal huan amo quema nijcajtejtoc itlanahuatil.
23 Xitlahuac niitztoc iixpa.
Nimoiyocatlalijtoc tlen nochi catli fiero.
24 Huan TOTECO nechtlaxtlahuijtoc quen quinamiqui ica catli cuali nijchijtoc,
pampa quinpantijtoc cuali nonemilis iixpa.
25 TOTECO, tiquinicnelía huan tiitztoc temachtli ica catli teicnelíaj huan catli temachme.
Tiitztoc cuali ica catli quihuejcacahua tlajtlacoli.
26 Tiquintiochihua catli tetiochihuaj,
pero tetic timotlalía ica inijuanti catli mosisiníaj.
27 Tiquinmaquixtía catli moicnonequij,
pero tiquinpinahualtía catli mohueyimatij.
28 TOTECO, ta catli tinoDios,
ta techmaca tlahuili.
Ta tijcueptoc nopa tzintlayohuilotl campa niitztoc ica tlahuili.
29 Ica mochicahualis, noTeco Dios,
niquinhuilanas nocualancaitacahua,
huan niquixcopanos nopa tepamitl catli ica quitzactoque inialtepe.
30 Iojhui Toteco Dios nelía xitlahuac.
Huan icamanal catli quitencahua,
cuali para ipan timotemachise.
TOTECO quinmanahuía nochi catli ipan ya motemachíaj.
31 Amo cana aqui seyoc Dios quen TOTECO.
Amo aqui seyoc catli huelis ipan timotemachise huan techmanahuis.
32 Toteco Dios nechmaca chicahualistli,
huan nechchihualtía ma ninejnemi xitlahuac.
33 Yaya nechfuerzajmaca para amo ma nihuetzi.
Noicxihua mochihuaj temachtli quen iicxihua se chivo quema moquetzaj campa tlahuejcapa huan tlaxixitlaca.
34 Toteco Dios nechmachtía tlaque ma nijchihuas quema onca tlahuilanalistli.
Nechfuerzajmaca para cuali ma niquitzqui nopa tetic tepos huitoli catli quichijtoque ica bronce.
35 Toteco Dios, ta techmanahuía huan techmaquixtía.
Techitzquía ica monejmac.
Ica mohueyi teicnelijcayo techhueyichijtoc.
36 Tijchijtoc noojhui más patlahuac para amo ma nihuetzis.
37 Niquintepotztocac nocualancaitacahua huan niquinajsito.
Huan amo nimocuepqui hasta quema niquintzontlamiltijtoya.
38 Niquinhuejhuelo huan ayacmo quema motlananase.
Huetzque noicxitla.
39 Toteco Dios, ta techfuerzajmacac ipan nopa tlahuilanalistli huan tijchijqui para nocualancaitacahua ma motlancuaquetzaquij noixpa.
40 Miyaqui moicancuepque para cholojtehuase huan quej nopa huelqui niquintzontlamilti.
41 Inijuanti tetzajtzilijque ma quinpalehuica,
pero amo aqui huelqui quinpalehui.
Quinotzque TOTECO,
pero yaya amo quinnanquili.
42 Quen se quitisi tlalcuanextli huan quihuica ajacatl,
na quej nopa niquinchijqui.
Huan ininpan nimoquejquetzqui quen soquitl ipan ojtli.
43 TOTECO nechmanahuijtoc tlen nopa sequinoc altepetl ehuani catli mosisiníaj huan quinequiyayaj nechhuilanase.
Yaya nechchijtoc ma nieli niinintlayacanca masehualme catli campa hueli ehuani.
Masehualme catli amo niquiniximatiyaya hualahuij para nechtequipanose.
44 Quema quicaquij nocamanal,
inijuanti nechneltoquilíaj.
Sequinoc altepetl ehuani huihuipicaj noixtla.
45 Nochi motemacaj noixpa huan huihuipicatiyohuij quema quisaj campa motlatijtoque.
46 Itztoc TOTECO.
Nijpaquilismacas yaya catli nechmocuitlahuía.
Ma tijhueyitlalica Toteco Dios,
notemaquixtijca.
47 Yaya nopa Dios catli quincuepilía ica catli fiero inijuanti catli nechcocojtoque.
Quintlalijtoc masehualme ipan miyac tlali nomaco para ma niquinnahuati.
48 Yaya nechmanahuía tlen nocualancaitacahua huan nechhueyitlalía iniixpa catli nechcualancaitaj.
TOTECO, ta techmaquixtijtoc ininmaco nopa tlahuilanca masehualme,
49 yeca nitepohuilis tlen ta campa hueli.
Nihuicas huan nijhueyitlalis motoca.
50 Miyac hueltas tijchijtoc para ma nitlatlani, na niDavid,
ninopa tlanahuatijquetl catli techtlapejpenijtoc.
Tijpiya hueyi moyolo ica na catli techtlalijtoc ma nitlanahuati.
Quena, hueyi moyolo nohuaya huan tijpiyas hueyi moyolo para nochipa ica noixhuihua.