19
Ihueyitilis Toteco monextía ipan nochi catli quichijtoc
1 Ilhuicactli tepohuilía ihueyitilis Toteco Dios.
Tlanemijya technextilía catli onpano yejyectzi yaya hueli quisencahua.
2 Quena, tonali huan yohuali ilhuicactli quisenhuiquilía tepohuilía para tlahuel hueyi itlalnamiquilis.
3 Masque amo tleno caquisti huan amo tijcaquij niyon se camanali,
nochi masehualme campa hueli quiitaj iyejyejca ilhuicactli huan quimachilíaj catli techpohuilía.
4 Eltoc quen ilhuicactli quipiya itoscac catli ajsi hasta campa ontlantoc tlaltipactli,
huan teyolmelahua para itztoc Toteco Dios.
Ipan ilhuicactli yaya quiquetzqui ichaj tonati.
5 Huan tonati quisa mojmostla huan yohui ipan iojhui ica paquilistli quen se telpocatl quisa ipan ichaj para mosihuajtiti.
Quena, nopa tonati mochihua quen se motlalojquetl catli paqui motlalohua pampa quimati quintlanis ne sequinoc.
6 Tonati quisa ilhuicactli inacastla huan quimaca huelta hasta ne seyoc inacastla.
Amo aqui huelis motlatis para amo quitonalmictis.
7 Ileyes TOTECO eltoc senquistoc cuali,
huan temaca yancuic nemilistli.
Huelis timotemachise ipan icamanal,
pampa ya nopa quichihua ma tlalnamiqui se masehuali catli moicnonequi.
8 Itlanahuatilhua TOTECO eltoc melahuac huan xitlahuac.
Quinmaca paquilistli masehualme ipan ininyolo.
Quena, sesen tlamantli catli TOTECO techilhuijtoc ma tijchihuaca eltoc quen se tlahuili catli chicahuac.
Techtlahuilía toojhui para tiquitase.
9 Senquistoc cuali para ma tijtlepanitaca TOTECO huan ma tiquimacasica para tiquixpanose.
Elis cuali para nochipa.
Catli TOTECO quiijtojtoc para ma tijchihuaca,
ya nopa melahuac.
Quena, ya nopa temachtli.
10 Noja más nijpatiita que oro.
Quena, noja más cuali que miyac oro catli senquistoc cuali.
Quema se masehuali quiselía Icamanal Toteco ipan iyolo,
eltoc más tzopelic que se sayolnectli catli yancuic quipatzcatoque.
11 Nopa tlanahuatilme nechmacaj tlalnamiquilistli, na niitequipanojca,
para amo ma nitlajtlacolchihua.
Catli quintoquilía itlanahuatilhua TOTECO hueyi quitlanis.
12 Amo aqui huelis momacas cuenta tlen itlaixpanolhua sesen huelta quema quichihua catli amo cuali.
TOTECO, techtlapojpolhui notlajtlacolhua catli amo nijmatiyaya sintla nijchijtoya.
13 Huan techpalehui para amo nimohueyimatis,
huan amo quema ma nitlajtlacolchihuas ica nopaquilis.
¡Amo! Amo xijcahua tlajtlacoli ma nechnahuati.
Quen nopa nielis se masehuali catli amo aqui huelis nechtelhuis ica niyon se tlamantli.
Huan niitztos nitlatzejtzeloltic.
14 Ma mitzpacti catli niquijtohua huan catli nimoilhuía, TOTECO,
ta tinotlamanahuijca huan tinotemaquixtijca.