30
Se huicatl para quitlascamati TOTECO
1 TOTECO, nimitzhueyitlalía pampa techtlananqui tlen más tlatzintla.
Amo tiquincahuilijtoc nocualancaitacahua ma noca paquica.
2 TOTECO, nimitztlajtlani motlapalehuil para techchicahua quema nimococohuayaya,
huan ta techchicajqui.
3 TOTECO, techmanahui quema niitztoya para nimiquis.
Techmacac nonemilis sempa,
huan yeca amo niitztoc ostoijtic.
4 TOTECO, nochi moaxcahua ma huicaca tiohuicatl moixpa.
Ma mitzhueyichihuaca ta catli titlatzejtzeloltic.
5 TOTECO, quema ticualani,
san huejcahua se tlatoctzi,
pero ipan nochi tonemilis technextilía para tijpiya hueyi moyolo tohuaya.
Masque tojuanti quemantic tichocaj ica tlayohua,
ica ijnaloc tijpiyaj paquilistli ipan ta.
6 Quema cuali niitztoya huan amo tleno nechpolohuayaya,
nimoilhui amo aqui huelis nechtlanis.
7 TOTECO, ica motlaicnelilis techquetztoya cuali quen se hueyi tepetl catli amo aqui hueli quiolinis.
Pero teipa, techcuanetlatili huan nimajmajcamiquiyaya.
8 Huan nimitznotzqui, TOTECO.
Nimitztzajtzili para techtlasojtla.
9 Pampa, TOTECO, sintla techcahuilisquía ma nimiqui,
tlaque tijtlanisquía.
Ayacmo huelisquía nimitzhueyichihuasquía iniixpa nohuampoyohua.
Toteco, sintla nimiquis, nimocuepas tlali,
huan tlali amo huelis mitzhueyichihuas. ¿Amo que?
¿Atlac mijcatzitzi huelise tepohuilise para ta nelía titemachtli?
10 Huajca, TOTECO, techtlacaquili huan xijpiya hueyi moyolo nohuaya.
TOTECO, ta xieli tinotlapalehuijca.
11 Techtlacaquilijtoc huan techquixtilijtoc nopa tequipacholi.
Techmacatoc hueyi paquilistli.
Techquixtilijtoc nopa yoyomitl catli nimoquentijtoya pampa nimotequipachohuayaya.
Huan techquentijtoc se cuali yoyomitl catli tenextilía para nijpiya paquilistli.
12 Yeca TOTECO, amo hueli nimocamatzacuas.
Nimitzhueyichihuas ica tiohuicatl huan nochipa nimitztlascamatis.