31
Ma timotemachica miyac ipan Toteco
1 TOTECO, ipan ta nimotemachijtoc.
Amo quema xiquincahuili sequinoc ma nechpinahualtica.
Techmanahui ta catli nochipa tijchihua catli xitlahuac.
2 TOTECO, ximoechcapano para techtlacaquilis.
Techmanahuiqui nimantzi.
Techcahuili ma nimotlati mopan ta.
Na niitztos momaco para techmanahuis.
3 Ipan ta nimotemachía para techpalehuis.
Quena, ipan ta niitztoc ica temachili.
Techyacantinemi para nochi ma mitzhueyitlalica más.
4 Ta tinotlamocuitlahuijca,
techmaquixti tlen ni tlaquetztli catli nocualancaitacahua quitlatijtoque ipan noojhui para nechmasiltise.
5 Nimitzmactilía notonal momaco.
Techmanahui, TOTECO, ta tinopa Dios catli titemachtli.
6 Niquincualancaita nochi catli quinhueyichihuaj teteyome,
pampa teteyome amo tleno hueli quichihuaj.
Pero na nimotemachijtoc ipan ta, TOTECO.
7 Nijpiya miyac paquilistli pampa techicnelía.
Ta tiquitztoc nochi notequipachol,
tiquiximajtoc nochi catli nopantitoc.
8 Amo techtemactili ininmaco nocualancaitacahua.
¡Amo! Campa techquetzqui tlacualca huan temachtli.
David tlaijiyohuiyaya ica cocolistli huan ica icualancaitacahua
9 TOTECO, techtlasojtla pampa niitztoc ipan tequipacholi.
Nisenchocatoc hasta nijmati tlantiyohuij noixteyolhua.
Ipan noyolo huan notlacayo nijmati nitlamitlaijiyohuijtoc ica tequipacholi.
10 Ni tlacuajcualoli nechtzontlamiltía pampa san tequipacholi nijmati.
Sesen xihuitl catli pano san nitlaayijhuía.
Ya tlantinemi nochicahualis por notlajtlacolhua hasta ya nitlacayohuactinemi.
11 Nocualancaitacahua huan hasta nocalnechcahua nechijiyaj.
Catli nechiximatij nechimacasij.
Catli nechitaj ojtipa nechtlalcahuíaj.
12 Nochi masehualme nechelcajtoque quen ya nimictosquía.
Nechtlahuelcajtoque quen se chachapal tepalcatl ipan tlasoli.
13 Nijcaqui quenicatza nocualancaitacahua nechistlacahuíaj.
Yeca nechitzquitoc se hueyi majmajtli huan nechmajmatía.
Inijuanti san sejco moijilhuíaj quenicatza huelise nechmictise.
14 Pero TOTECO, na nimotemachía ipan ta huan niquijtohua: “¡Taya tinoDios!”
15 Sesen tonali catli niitztoc momaco eltoc.
Techmanahui ininmaco nocualancaitacahua catli nechtlaijiyohuiltijtinemij.
16 TOTECO, ma monextis moteicnelijcayo ipan moixayac quema techtlachilía na,
nimotequipanojca.
Techmaquixti pampa ta techsenicnelijtoc.
17 TOTECO, na nimitztemojtoc.
Amo xiquincahuili para ma nechpinahualtica.
Xiquinpinahualti masehualme catli amo cuajcualme.
Quena, inijuanti mocamatzacuase quema tiquintzontlamiltis.
18 TOTECO, ayacmo molinis ininnenepil inijuanti catli istlacatij quema ya mictose.
Ayacmo itztose inijuanti catli mohueyimatij quema camanaltij para techtlaijilhuise tojuanti catli tinemij xitlahuac moixpa.
Quena, xiquinmicti catli mohueyitlalíaj huan techmahuispolohuaj.
19 Pero ta, nelía hueyi moyolo ica inijuanti catli mitztlepanitaj huan tiquinmocuitlahuía.
Nelía cuali motlaicnelilis catli ticajoctoc para tojuanti catli timotemachijtoque ipan ta,
tojuanti catli tlamiyacapa titematiltijtoque para san ta tihueli techmanahuis.
20 TOTECO, ta techtlatía campa ichtacatzi tojuanti catli timitztlepanitaj,
huan nepa ta timocahua tohuaya.
Yeca fiero masehualme amo huelij techajsise ica catli quisencajtoque.
Quena, momaco techtlatía huan amo aqui catli techmahuispolohua hueli techajsis.
21 Nimitztlascamati, TOTECO,
pampa tijchijqui huejhueyi tlamantli para technextilis moteicnelijcayo.
Ica temachili techyahualojtoc para techmanahuis tlen nocualancaitacahua.
22 TOTECO, nimoilhuijtiquisqui para techtlahuelcajtoya.
¡Pero amo neli!
Tijcajqui quema nimitztzajtzili techpalehuiqui, huan technanquili.
23 Nochi amojuanti catli aniaxcahua TOTECO,
xiquicnelica pampa yaya quinmocuitlahuía catli itztoque temachme.
Pero ica masehualme catli mohueyimatij,
TOTECO quintlaxtlahuía hasta ica itlanca nochi catli amo cuali quichijtoque.
24 Nochi amojuanti catli anmotemachíaj ipan TOTECO,
xipaquica huan ximotemacaca.