34
TOTECO techmocuitlahuía huan techmanahuía
1 Nijtlascamatis TOTECO tlatoctzitzi huan nochipa nijsenpaquilismacatos.
2 Nijhueyitlalis huan niquinilhuis nochi masehualme catli yaya nechchihuilijtoc.
Inijuanti catli teicneltzitzi quicaquise huan paquise.
3 Ma tijhueyichihuaca huan ma tijhueyitlalica TOTECO san sejco.
4 Nijtzajtzili TOTECO ma nechpalehuiqui,
huan yaya nechtlacaquili huan nechmanahui tlen nochi catli nechmajmatiyaya.
5 Sequinoc catli motemachíaj ipan Toteco ixcahuanij ica paquilistli nojquiya,
por catli yaya quinchihuilijtoc.
Amo quema pinahuase.
6 Masque nipilteicneltzi,
nijtzajtzili TOTECO,
huan yaya nechmaquixti ica nochi tlamantli catli nechtequipachohuayaya.
7 Itequihua TOTECO quinmocuitlahuía nochi catli quiimacasij TOTECO,
huan yaya quinmanahuía.
8 Xijyejyecoca TOTECO huan anquiitase para melahuac cuali iyolo tohuaya.
Hueyi paquilistli quipiyaj nochi masehualme catli ipan ya motemachíaj.
9 Nochi amojuanti catli aniaxcahua TOTECO, xiquimacasica,
pampa nochi catli quitlepanitaj amo tleno quinpolohua.
10 Nopa tecuanime catli más quipiyaj chicahualistli quemantic mayantinemij huan amo quipantíaj catli quicuase,
pero masehualme catli quitemohuaj TOTECO quipiyase nochi catli cuali.
11 Xihualaca noconehua, huan techtlacaquilica,
huan nimechmachtis quenicatza monequi anquitlepanitase TOTECO,
huan anquiimacasise anquiixpanose.
12 ¿Tijnequi tiitztos ica yejyectzi?
¿Tijnequi tihuejcahuas ipan ni tlaltipactli,
huan tiquitas catli cuali?
13 Monequi xijmocuitlahuis monenepil para amo tiquinmahuispolos sequinoc ica istlacatili.
14 Ximoiyocatlali ica catli amo cuali,
huan xijchihua san catli xitlahuac.
Xijchihuaca catli anhuelij para ma oncas tlasejseltili ininhuaya nochi masehualme.
Quena, ya nopa xijtemoca ica nochi amoyolo.
15 TOTECO quintlachilía catli nemij xitlahuac iixpa,
huan san quichiya para quinmacas catli quitlajtlanise.
16 Pero TOTECO sencualantoc ica inijuanti catli quichihuaj catli fiero.
Quintzontlamiltis para ma ayacmo aqui quinelnamiquis ipan ni tlaltipactli.
17 Quema masehualme catli itztoque xitlahuaque iixpa TOTECO quitzajtzilíaj,
yaya quintlacaquilía.
Huan quinmanahuía tlen nochi inincuesolhua.
18 TOTECO itztoc ininnechca masehualme catli motequipachohuaj.
Huan quinmaquixtía catli motequipachohuaj ica inintlajtlacolhua.
19 Se masehuali catli itztoc xitlahuac iixpa TOTECO quipiya miyac tequipacholi,
pero TOTECO quimanahuía ica nochi catli ipanti.
20 Pampa TOTECO quimocuitlahuía para amo postequis niyon se iomiyo.
21 Se masehuali catli fiero inemilis miquis por nopa tlamantli fiero catli quichihua.
Quena, TOTECO quintlalilis tlatzacuiltili catli quicualancaitaj catli cuali.
22 TOTECO quinmaquixtía itequipanojcahua.
Quena, quintlapojpolhuía imasehualhua catli motemachíaj ipan ya.