35
Se netlatlajtili para TOTECO ma quimaquixti ininmaco icualancaitacahua
1 TOTECO, xiquincamaijixnamiqui catli noca cualanij.
Xiquinhuilana catli quinequij nechhuilanase.
2 Xijcui nochi motlahuilanca teposhua,
huan ximotlanana para techmanahuiqui.
3 Xijquixti mohacha catli ica titlahuilana,
huan xiquinojtzacua catli nechtepotztocatihualahuij.
Huan techilhui:
“Na nimitzmaquixtis.”
4 Ma mopinahuaca huan ma mocuapoloca catli nechtemohuaj para nechmictise.
Ma mocuepaca ininchaj ica pinahualistli catli quinequij nechchihuilise catli fiero.
5 Quen se ajacatl quihuica tlasoli,
itequihua TOTECO ma quintojtocatiyas catli nechcualancaitaj.
6 Ma onca tzintlayohuilotl ipan iniojhui.
Ma tlaxixitlacas campa nemij para ma huetzica,
huan itequihua Toteco ma quintepotztocatiyas para quinmictis.
7 Pampa masque amo tleno nijchijtoya,
quitlalijque se tlaquetztli para nechmasiltise.
Quixajque se ostotl para ipan ma nihuetzi.
8 Ma quintlatocajsi se hueyi tequipacholi.
Ma masica ipan nopa tlaquetztli catli inijuanti quitlalijque huan ma motzontlamiltica.
9 Huajca quena, na nipaquis ipan TOTECO.
Nijpiyas paquilistli pampa TOTECO nechmaquixtijtos.
10 Ica nochi noyolo niquijtos:
“Amo aqui seyoc quen ta, TOTECO.
Tiquinmocuitlahuía catli amo quipiyaj fuerza para masehualme catli tetique amo huelis quinajsise.
Quena, tiquinmanahuía catli teicneltzitzi huan catli amo quipiyaj catli quinmonequilía.
Tiquinmanahuía ininmaco catli quinequij quintlacuijcuilise.”
11 Motlananaj masehualme catli amo cuajcualme huan nechcualancaitaj.
Inijuanti tlatestigojquetzaj catli amo neli,
huan nechtlaijilhuíaj ica tlamantli catli amo nijmati.
12 Nechtlaxtlahuíaj ica catli amo cuali,
masque nelcuali niquinchihuilijtoc.
San quinequij nechtequipacholmacase.
13 Pero quema inijuanti mococojque,
nimotequipacho ininhuaya huan nimoyoyonti ica nopa fiero yoyomitl para nochi quimatise nimotequipachohuayaya ininhuaya.
Hasta nimosajqui por inijuanti para nijtlajtlanis TOTECO ma quinchicahua.
Pero TOTECO amo quicajqui catli niquilhui.
14 Nimotequipachojtinemiyaya quen se tlamantli fiero ipantitosquía se nohuampox o se noicni.
Nimotequipacho huan nichocatinemiyaya quen mictosquía nonana.
15 Pero quema na nechajsic tequipacholi, inijuanti pajque.
Quema nimotepotlami huan nihuetzqui,
inijuanti mosentilijque huan nechhuetzquilijque.
Masehualme catli amo cuajcualme huan catli nechiximatiyayaj nechejelnamiquiyayaj huan nechmaquiliyayaj masque amo tleno nijchijtoya.
16 Quen masehualme catli amo cuajcualme quihuetzquilíaj tlen hueli,
inijuanti noca pajque huan motlancochhuehuechotzque noixpa ica cualantli.
17 TOTECO, ¿hasta quema noja san tijtlachilijtos nochi ni tlamantli?
Techmanahui para amo nechmictise,
pampa san setzi nonemilis.
Techmaquixti tlen ni masehualme catli mochihuaj quen tecuanime catli quinequij nechhuejhuelose.
18 Huan nimitztlascamatis tlamiyacapa ipan tlasentilistli.
Iniixpa nochi nopa miyaqui momasehualhua nimitzpaquilismacas.
19 Amo xiquincahuili nocualancaitacahua catli istlacatij ma noca paquica.
Amo xiquincahuili catli nechcualancaitaj ma moixijcopilica ica paquilistli noixpa pampa nimotequipachohua.
20 Inijuanti amo tenotzaj ica cuali.
San moilhuíaj quenicatza huelis quincajcayahuase masehualme catli itztoque ica yejyectzi ipan ni tlali.
21 Nechtlaijilhuíaj huan quiijtohuaj:
“¡Xiquitaca tijnelitztoque catli fiero quichijqui!”
22 TOTECO, ta tiquitztoc catli quichihuaj.
Amo san xiitzto huan amo tleno tijchihuas.
¡Amo techtlahuelcahua!
23 Ximotlanana huan techchihuili catli xitlahuac huan melahuac.
Quena, TOTECO, xiisihui huan techmanahuiqui.
24 TinoTeco Dios, ta catli ipa titetlajtolsencahua xitlahuac,
xitenextili para amo tleno nijchijtoc.
Amo xiquincahuili nocualancaitacahua ma noca huetzcaca.
25 Ma amo nopanti catli inijuanti quinequij.
Ma amo quiijtoca nechixpolojtoque.
Amo xiquincahuili ma moilhuica para inijuanti nechtlantoque.
26 Xijchihua para inijuanti catli noca paquij por notequipachol ma mocuapoloca huan ma ayacmo quimatica tlaque quichihuase.
Quena, xijcahua para inijuanti catli moilhuíaj para más huejhueyi que na ma mopinahualtica huan ayacmo aqui ma quintlepanitas.
27 Pero ma huicaca ica paquilistli inijuanti catli nechpalehuíaj.
Ma paquica inijuanti catli quiitaj para nijchihua catli xitlahuac.
Huan nochipa ma quiijtoca:
“Nelía hueyi TOTECO catli quipactía quipalehuis David,
pampa yaya quitequipanohua.”
28 Quena, xijtlacaquili catli nimitztlajtlanía,
huan teipa nitepohuilis para nelía xitlahuac catli tijchihua.
Quena, semilhuitl nimitzpaquilismacas.