4
Monequi timotemachise ipan Toteco Dios
1 Toteco Dios, ta techchijtoc nixitlahuac moixpa,
Se favor technanquili quema nimitznojnotza.
Ta catli nochipa techpalehuía quema nitlaijiyohuía,
ama sempa techtlasojtla huan xijcaqui quema nimotlatlajtía.
2 Huan Toteco quinanquilía.
“Anmasehualme, xijtlacaquilica ya ni:
¿Hasta quema tlamis para annoca paquise na,
catli más quinamiqui nijselis tlatlepanitacayotl?
¿Hasta quema noja anquinhueyichihuase tlaixcopincayome catli amo neli ya Dios?
¿Hasta quema noja anmocahuase ma anmechcajcayahuaca?”
3 Anmasehualme, xijmatica ya ni.
TOTECO techiyocatlalijtoc para tiiaxcahua nochi tojuanti catli techcojtoc.
Huan yaya nechtlacaquilía quema nijnojnotza huan nechchihuilía catli nijtlajtlanía.
4 Masque anhuihuipicaj ica cualantli,
amo xitlajtlacolchihuaca.
Quema anmotectose ipan amotlapech huan amo tleno molinía,
ximonejnehuilica catli eltoc ipan amoyolo.
5 Xijchihuaca catli quinequi TOTECO huan ya nopa elis quen anquimacasquíaj se tlacajcahualistli catli quipactía.
Quena, ximotemachica ipan ya.
6 Miyac quiijtohuaj:
“Amo aqui huelis techpalehuis.”
Pero ta tihueli, TOTECO.
Techcualita huan techtiochihua.
7 Ta tijtlalijtoc ipan noyolo más paquilistli,
huan amo quen catli quipiyaj masehualme catli quipixcaj miyac trigo,
o quipiyaj miyac xocomecatl iayo.
8 Yeca na nimotecas ica paquilistli ipan noyolo huan ica cuali nicochis,
pampa nijmati san ta, TOTECO, techmanahuía huan amo aqui huelis tlen nechchihuilis.