5
Mojmostla cualca David motlatlajti
1 TOTECO, xijtlacaquili nocamanal.
Techchihuili cuenta quema nitlaayijhuía.
2 Ta tinoTeco Dios catli tiitztoc tinotlanahuatijca, techtlacaquili quema nimitztlajtlanía techpalehui,
pampa amo aqui seyoc nijtlajtlanía.
San nimotlatlajtía moca ta.
3 Sese ijnaloc nelcualca nimitzpohuilía catli nechpano, TOTECO.
Mojmostla nimitztlajtlanía catli monequi,
huan san nimochiya para technanquilis.
4 Ta tiToteco Dios catli amo mitzpactía catli amo cuali.
Yeca amo tiquincahuilía amo cuajcualme ma itztoca mohuaya.
5 Catli mohueyimatij amo hueli moquetzase moixpa.
Tiquincualancaita nochi catli quichihuaj catli amo cuali.
6 Tiquintzontlamiltía masehualme catli istlacatij.
Quena, TOTECO, amo tijnequi tiquinitas catli tlacajcayahuaj huan temictíaj.
7 Pero na, pampa hueyi motlaicnelijcayo,
huelis nicalaquis mochaj.
Quena, huelis nimitzhueyichihuas ipan motlatzejtzeloltijca tiopa,
pampa nimitztlepanita huan nimajmahui para nimitzixpanos.
8 TOTECO, techyacana quen nohuaya timocajtoc tijchihuas,
pampa itztoque nocualancaitacahua.
Technextili moojhui catli xitlahuac.
9 Nocualancaitacahua amo quema quiijtohuaj catli melahuac.
Amo aqui hueli motemachía ipan inincamanal.
Ipan ininyolo san quinequij tetzontlamiltise.
Inincamac eltoc fiero quen quema quitlapohuaj se mijca ostotl.
Tecamanalhuíaj ica camanali catli yejyectzi san para tlacajcayahuase.
10 Xiquintlatzacuilti, noTeco Dios.
Xiquinmasilti ica catli amo cuali moilhuijtoque quinchihuilise sequinoc.
Xiquinhuejcamajcahua pampa miyac inintlajtlacolhua.
Quena, xiquinhuejcamajcahua pampa mohuejcachijtoque tlen ta.
11 Pero ma paquica nochi catli motemachíaj ipan ta para xiquinpalehui.
Nochipa ma huicaca ica paquilistli pampa ta tiquinmanahuía.
Catli mitzicnelíaj paquij ipan ta.
12 Pampa ta, TOTECO, tiquintiochihua catli quichihuaj catli xitlahuac moixpa.
Motlaicnelijcayo quinyahualohua quen se tepos tzajcayotl catli quinmocuitlahuía.