40
David quipaquilismaca TOTECO pampa quimanahui
1 Nijpixqui noyolo huan nimochixqui para TOTECO ma nechpalehuiqui.
Huan yaya, quena, moechcapano huan nechtlacaquili quema nijnojnotzayaya.
2 TOTECO nechtlananqui quema nijmatiyaya niitztoya ipan se ostotl campa mahuilili.
Eltoya quen nimisahuijtinemiyaya ipan soqui atoli catli huejcatla,
huan ayacmo nijmatiyaya tlaque nijchihuas.
Pero TOTECO nechmaquixti tlen nopa tequipacholi.
Quena, nechquetzqui ipan se hueyi tetl campa temachtli.
Huan teipa nechyacanqui ipan se cuali ojtli.
3 Huan teipa noTeco Dios nechmacac se huicatl yancuic,
se huicatl catli ica ma nijpaquilismacas.
Miyac catli quicaquise nochi catli TOTECO nechchihuilijtoc, motemachise ipan ya.
4 Paqui nopa masehuali catli motemachía ipan TOTECO.
Huan amo motemachía ipan catli mohueyimatij,
niyon ininpan catli quinhueyichihuaj teteyome.
5 TOTECO noDios, ta techchihuilijtoc miyac tlamantli catli huejhueyi.
Amo aqui quiaxilis mohueyi chicahualis.
Ta nochipa techpixtoc ipan motlalnamiquilis.
Quena, tlahuel miyac tlamantli catli yejyectzi tijsencajtoc techchihuilis.
Sintla nijnequisquía niteyolmelahuas sesen tlamantli catli techchihuilijtoc,
amo nihuelisquía.
Pampa nochi catli cuali techchihuilijtoc onpano catli hueli nijpohua.
6 Ya nijmati nopa catli más tijnequi para timasehualme ma timitzmacaca.
Amo hueyi ipati moixpa nopa tlapiyalme huan sequinoc tlamantli tlacajcahualistli catli masehualme mitzmacaj.
Amo hueyi ipati moixpa nopa tlacajcahualistli catli tijtlatíaj moixpa por totlajtlacolhua.
Techtlapolijtoc notlalnamiquilis para hueli nijmachilía catli más tijnequi tlen tojuanti.
Tijnequi ma timotemacaca ipan ta.
Ya nopa, quena, hueyi ipati moixpa.
7 Yeca nimitzilhuijtoc:
“Nica niitztoc.
Ya nihuala quen ijcuilijtoc nijchihuasquía ipan mocamanal.
8 ¡NoTeco Dios!
Nechpactía nijchihuas mopaquilis,
huan motlamachtil nijhuica ipan noyolo.”
9 Tlamiyacapa iniixpa momasehualhua niteyolmelajtoc para ta, TOTECO,
tiquinchihua masehualme xitlahuaque moixpa.
Cuali tijmati para amo san nicajoctoc catli nijmati.
10 Amo nijtlatijtoc nopa cuali camanali ipan noyolo para amo aqui niquilhuis.
Nochi masehualme niquinyolmelahua para ta tiquinmaquixtis.
Nochipa nitematiltis para ta nelía titemachtli huan titepalehuía.
Nepa tlamiyacapa nitepohuilis para titetlasojtla huan amo timoyolpatla.
11 TOTECO, nijmati amo quema tijcahuas techtlasojtlas.
Nimochiya ipan moteicnelijcayo,
pampa ta nochipa techmocuitlahuis.
12 Miyac tequipacholi nijpiya campa hueli.
Amo hueli nijpohua nochi.
Notlajtlacolhua nechtlantoc huan nichoca hasta amo hueli nitlachiya.
Notlajtlacolhua nelmiyac hasta quipano imiyaca notzoncal.
Tlantinemi noyolo huan nochicahualis.
13 TOTECO, techmanahuiqui.
Quena TOTECO, ximoisihuilti huan techpalehuiqui.
14 Ma mopinahualtica huan ma mocuapoloca catli quinequij nechtzontlamiltise.
Xiquintojtocatinemi catli nechcualancaitaj huan tlahuel xiquinpinahualti.
15 Nochi catli noca paquij ma huetzica.
Xiquincuepa san ininmax.
16 Pero ma paquise miyac nochi catli mitztemohuaj.
Quena, paquij catli mitzicnelíaj pampa tiquinmaquixtijtoc.
Nochipa quiijtohuaj:
“Nelía hueyi TOTECO.”
17 Masque nimotequipachojtoc huan nechpolohua catli nechmonequilía,
nijmati para ta TOTECO techelnamiqui.
Ta tinoTeco Dios, techpalehuis huan techmanahuis.
NoTeco Dios, amo xihuejcahua quema nimitznotza.
Nimantzi techpalehuiqui.