41
David catli mococohua quitlajtlanía Toteco ma quichicahua
1 Paqui nopa masehuali catli motequipachohua pampa quinicnelía catli teicneltzitzi,
pampa TOTECO quipalehuis quema hualas tlaohuijcayotl.
2 TOTECO quimocuitlahuis para amo aqui quimictis.
Huan TOTECO quitiochihuas tlamiyacapa ipan tlali Israel.
Yaya amo quicajtehuas,
niyon amo quicahuas ininmaco icualancaitacahua para ma quichihuilica catli quinequise.
3 Quema huetztos ipan tlaijiyohuilistli,
TOTECO quitlananas ipan itlapech huan quiijcuinilis nopa cocolistli.
4 Na niquilhui TOTECO:
“TOTECO, na nitlajtlacolchijtoc moca ta.
Techtlasojtla huan techchicahua.”
5 Nocualancaitacahua quinequij ma nechajsi catli fiero.
Noca camanaltij huan quinequij ma nimiqui huan ayacmo aqui nechelnamiquis.
6 Quema nechpaxalohuaj, mochihuaj quen nohuampoyohua,
pero amo nelía catli quiijtohuaj.
Quema itztoque nohuaya san quitlacaquilíaj tlaque onca para huelis quipatlase ica catli más fiero,
huan teipa quisase huan teyolmelajtinemise tlen na.
7 Quena, nocualancaitacahua mosentilíaj huan noca camanaltij.
Tepohuilíaj para ayacmo onca pajtli para na huan nimantzi nimiquis.
8 Quiijtohuaj:
“Nopa cocolistli catli yaya quipixtoc nelfiero.
Ayacmo motlananas tlen itlapech pampa nimantzi miquis.”
Quej nopa quiijtohuaj tlen na.
9 Nojquiya nechcajtejtoc catli eliyaya nonelhuampox.
Yaya catli ipan nimotemachiyaya huan catli tlacuayaya nohuaya, ama nechtlahuelcajtoc.
10 Pero ta TOTECO, techtlasojtla.
Techtlanana tlen notlapech huan niquincuepilis quen nechchihuilijtoque.
11 Nijmati techicnelía pampa amo tiquincahuilijtoc nocualancaitacahua ma nechtlanica.
12 Techpalehui pampa nijchihua catli xitlahuac huan techmacatoc tequiticayotl ma niitzto nepa moixpa para nochipa.
13 Ma tijhueyichihuaca TOTECO,
yaya catli iTeco tohuejcapan tata, Israel.
Quena, ma tijhueyichihuaca ama huan nochipa. Quej nopa ma eli.