42
Israelitame catli quinhuicatoque seyoc tlali quielnamiquij inintlal
1 Quen se masatl catli tlahuel amiqui quitemojtinemi se atlajtli para atlis,
quej nopa na nimitzyoltemohua, noTeco Dios.
2 Quena, quen se catli tlahuel amiqui,
na ipan noyolo nimitznequi Toteco,
ta catli nelnelía tiitztoc.
¿Hasta quema huelis niyas huan nimonextis moixpa?
3 Yohuali huan tonali nichoca huan amo nitlacua.
Nocualancaitacahua tlatoctzitzi nechtlatzintoquilíaj:
“¿Canque itztoc moDios?
¿Para tlen amo mitzpalehuía?”
Quen nopa nechilhuíaj.
4 Quema niquelnamiqui quen eliyaya achtihuiya nepa ipan notlal, eltoc quen atiya noyolo.
Niyohuiyaya ininhuaya miyaqui masehualme hasta ichaj Toteco Dios.
Na niquinyacanayaya nochime hasta ichaj ipan nopa hueyi ilhuitl.
Titzajtzitiyohuiyayaj ica paquilistli,
huan tijtlascamatiyayaj Toteco Dios pampa para ya tiilhuichihuayayaj.
5 Huajca nimoilhuía:
“Amo monequi nimotequipachos.
Na nimotemachijtoc ipan noTeco Dios,
huan sempa nijpaquilismacas,
pampa yaya noDios huan notemaquixtijca.”
6 Pero noTeco, nelía nimotequipachohua nica campa niitztoc ipan ni tlali catli huejca.
Yeca nimitzelnamiquis,
huan niquelnamiquis quen tijpixqui hueyi moyolo tohuaya catli tiehuaj ipan motlal.
Niquelnamiqui nopa tlali yejyectzi catli pehua campa motlalohua nopa atlajtli Jordán,
huan ontlami hasta campa motlanantoc nopa tepeme Hermón huan Mizar.
7 Ama ta techtitlanilijtoc tequipacholi catli nechijiyomictía.
Quena, miyac tequipacholi nechajsitoc quen imiyaca atl catli huetzi tlen tepeixco hasta ipan na.
Caquisti quen miyac atl catli tlacomontoc,
huan nochi nopa atl panotoc ipan na.
8 Pero ica ijnaloc TOTECO nechtitlanilis itlaicnelilis.
Huan ica tlayohua yaya nechmacas se huicatl para nijhueyichihuas,
huan nimotlatlajtía ica ya.
Quena, nijnojnotza NoTeco catli mojmostla nechmaca nemilistli.
9 Niquilhuis Toteco Dios:
“Ipan ta nimotlatía huan amo aqui hueli nechajsis.
¿Para tlen techelcajtoc?
Na san nimotequipachojtinemi,
pampa nocualancaitacahua nechtlaijiyohuiltíaj.
10 Catli nocualancaitacahua nechchihuilíaj nechcocohua hasta ajsi ipan noomiyohua,
pampa nechtlaijilhuíaj huan nechtlatzintoquilíaj tlatoctzitzi:
‘¿Canque itztoc moDios?
¿Para tlen amo mitzpalehuía?’ ”
11 Pero amo monequi nimocuesihuilmacas,
niyon nimotequipachos.
Na nimotemachijtoc ipan noTeco Dios,
huan teipa sempa nijpaquilismacas pampa yaya noDios huan noTemaquixtijca.