52
Toteco tetlasojtla huan tetlajtolsencahua
1 ¡Xijtlacaquili ta catli timoilhuía para tlahuel tihueyi!
¿Para tlen timohueyimati ica catli fiero tiquinchihuili imasehualhua Toteco Dios?
Toteco Dios quipixtoc itlaicnelilis para nochipa.
2 Pero ta nochipa timonejnehuilía san catli fiero tiquinchihuilis sequinoc.
Huan nochi istlacatili catli quisa mocamaco eli quen se cuchillo catli tlahuel tlatequi.
3 Achi más mitzpactía tijchihuas tlen fiero huan amo catli cuali.
Huan nojquiya achi más mitzpactía istlacatili huan amo catli melahuac.
4 Mitzpactía titeistlacahuis.
Huan mitzpactía tiquijtos camanali catli tecocohua.
¡Tiistlacatica tlacatl!
5 Yeca Toteco Dios mitztzontlamiltis para nochipa.
Mitzhuahuatatzas para mitzquixtis tlen mochaj,
huan ayacmo tiitztos ipan ni tlaltipactli campa itztoque masehualme.
6 Nochi masehualme catli quitlepanitaj Toteco,
quiitase catli yaya quichihuilis nopa fiero masehuali,
huan momajmatise.
Huajca inijuanti quihuetzquilise huan quiijtose:
7 “Xiquitaca catli ipantic ne masehuali catli amo quitlepanita Toteco Dios.
San motemachi ipan itomi huan nochi tlamantli pajpatiyo catli yaya quipiya,
huan quichijtinenqui catli amo cuali.”
8 Pero na cuali niijcatoc quen se olivo cuahuitl,
huan Toteco nechyahualohua para nechmocuitlahuis.
Na nimotemachía ipan Toteco para yaya ma nechtlasojtla nochipa.
9 NoTeco Dios, na nochipa nimitztlascamatis por nochi nopa cuali tlamantli catli tijchijtoc.
Huan san ipan ta nimochiyas para techtlasojtlas,
pampa nochi quimatij para ta nelía tijpiya hueyi moyolo ica catli moaxcahua.