53
Masehualme catli huihuitique
1 San se masehuali catli tlahuel huihuitic moilhuisquía ipan iyolo para amo onca Dios.
¿Para tlen quej nopa quiijtosquía?
Eltoc pampa iyolo tlahuel fiero huan san quichihua catli amo cuali.
Amo aqui se masehuali catli quichihua catli nelxitlahuac.
2 Toteco Dios hasta nepa ilhuicac quinhualtlachilía masehualme,
para quiitas sintla onca se catli nelía quitemohua huan quichihua catli cuali.
3 ¡Pero amo!
Nochi masehualme mocueptoque ipan tlajtlacolotl.
Quena, nochi tlajtlacolchijtoque huan moijtlacojtoque.
Amo aqui quichihua catli senquistoc cuali,
niyon se.
4 ¿Atlac amo quipiyaj inintlalnamiquilis nopa tlajtlacolchijca masehualme?
Inijuanti quintzontlamiltíaj momasehualhua quen elisquíaj pantzi catli quicuaj huan amo quinequij quitemose Toteco Dios.
5 Pero ajsis tonali quema Toteco Dios quinpinahualtis huan quintlatzacuiltis nopa masehualme.
Quena, quintzontlamiltis huan inintlacayohua mocahuase tepejtoque campa hueli.
Amo aqui quintlalpachos pampa yaya quintlahuelcajtoc.
6 ¡Cuali elisquía sintla Toteco hualasquía tlen altepetl Jerusalén huan quinmaquixtis nochi israelitame!
Israelitame san huelis itztose ica paquilistli quema Toteco Dios quichihuas para inijuanti catli imasehualhua ma tlatlanica.