79
Tequipacholi pampa masehualme quisosolojque Jerusalén
1 ¡NoTeco Dios, masehualme tlen sequinoc tlalme hualajque huan moaxcatijque motlal!
Motiopa quiijtlacojque huan altepetl Jerusalén quitlamisosolojtoque.
2 Nochi inintlacayo momasehualhua quinmajcajtoque para ma quincuaca totome.
Hasta quinmajcajtoque ininnacayo mototajtzitzi,
nopa tlatzejtzeloltijca tlacame catli moquetzque moixpa,
para ma quincuaca tecuanime.
3 Quena, tocualancaitacahua quintzontlamiltijque nochi nopa masehualme ipan altepetl Jerusalén.
Huan inieso catli toyajqui motlalo quen hueyatl,
huan amo mocajqui niyon se para quintlalpachos.
4 Huan ama nochi tlalme catli techyahualojtoque techpinajtíaj huan techhuetzquilíaj.
5 Toteco Dios, ¿hasta quema tlamis ticualantos ica tojuanti?
¿Huelis para nochipa mocualancayo eltos quen tlitl?
6 Xijtitlani mohueyi cualancayo ipan nopa tlalme campa amo mitziximatij,
huan ipan altepeme campa amo aqui mitzhueyimati,
pero amo xijtitlani ipan tojuanti.
7 Pampa inijuanti quintzontlamiltijque nochi moisraelita masehualhua huan quinsosolojque nochi calme.
8 ¡Amo xiquelnamiqui huan techtlatzacuilti por inintlajtlacolhua tohuejcapan tatahua,
catli inijuanti quichijque huejcajya!
Más cuali nimantzi techtlasojtla pampa ayacmo tijpiyaj fuerza.
9 Toteco Dios, titotemaquixtijca, techpalehui,
para quej nopa nochi mitzhueyitlepanitase.
¡Techmaquixti huan techtlapojpolhui totlajtlacolhua ica mohueyi tlaicnelilis!
10 Pampa sintla amo techpalehuis,
huajca nopa masehualme catli amo mitzneltocaj quiijtose:
“¿Canque itztoc ininTeco Dios?”
Huajca xiquintlatzacuilti, Toteco, iniixpa nochime, pampa quinmictijque momasehualhua.
11 Xijtlacaquili inintequipachol nopa masehualme catli tzactoque,
huan ica mohueyitilis huan mohueyi chicahualis,
xiquinmanahui catli quinixquetztoque para quinmictise.
Xiquinmaquixti para nochi ma quiitaca mohueyi chicahualis.
12 TOTECO, xiquincuepili chicome huelta catli mitzchihuilijque quema mitzpinahualtijque nopa tlalme catli san mitzhuetzquilíaj.
13 Huan huajca tojuanti, timomasehualhua catli tiitztoque quen timoborregojhua,
timitzhueyichihuase para nochi tonali huan timitzpaquilismacase ica huicatl para nochipa.